ޕަފޯސް އަތުން މޮޅުވެ، ޗެލްސީ ހަމަޔަކަށް

ޔުއެފާ ޗެމްޕިއަންސް ލީގުގައި ޕަފޯސް އެފްސީއާ ދެކޮޅަށް ކުޅުނު މެޗުން މޮޅުވެ، ޗެލްސީ ހަމަޖެހުމެއް ހޯދައިފި އެވެ. 

ޗެލްސީގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. މެޗުގައި ޗެލްސީ އިން ހަމައެކަނި ލަނޑު ޖެހީ ވެސް މެޗުގެ ދެ ވަނަ ހާފުގަ އެވެ. 

މެޗުގެ ފުރަތަމަ ހާފުގައި ޗެލްސީ އިން ވަނީ ލަނޑު ޖަހަން މަސައްކަތް ކޮށްފަ އެވެ. ނަމަވެސް، ޕާފޮސްގެ ޑިފެންސް ކައިރިން ޗެލްސީ އަށް ލަނޑެއް ޖެހޭ ގޮތެއް ނުވި އެވެ. ޕަފޯސް އިން ވެސް ވަނީ ލިބުނު ފުރުސަތުގައި ޗެލްސީގެ ގޯލަށް ނުރައްކާ ކުރަން މަސައްކަތް ކޮށްފަ އެވެ.

މެޗުގައި ލަނޑު ޖަހަން ޗެލްސީ އިން ކުރި މަސައްކަތް އެ ޓީމަށް ކާމިޔާބު ކުރެވުނީ، މެޗުގެ 78 ވަނަ މިނެޓުގަ އެވެ. އެ ލަނޑު ޗެލްސީ އަށް ޖަހައިދިނީ މޮއިސަސް ކަސައިޑޯ އެވެ. އޭގެ ފަހުން ވެސް މެޗުގައި ޗެލްސީ އިން ވަނީ ލީޑު ފުޅާ ކުރަން މަސައްކަތް ކޮށްފަ އެވެ.

މެޗުން މޮޅުވެ، ޗެލްސީ އިން މި ވަނީ ހަމަޖެހުމެއް ހޯދައިފަ އެވެ. އެގޮތުން ޗެލްސީގެ ކޯޗުކަމުން އެންޒޯ މަރެސްކާ ވަކި ކުރުމަށް ފަހު، ދާއިމީ ކޯޗަކަށް ލިއަމް ރޮސެނިއާ ހަމަޖެއްސި ފަހުން ޗެލްސީ އިން ހަތަރު މެޗު ކުޅެފައިވާ ތިން މެޗުން މި ވަނީ މޮޅުވެފަ އެވެ. އެއް މެޗުން ބަލިވެފައިވާއިރު، މިއީ ރޮސެނިއާގެ އިރުޝާދުގެ ދަށުން ޗެމްޕިއަންސް ލީގުގައި ޗެލްސީ އިން ކުޅުނު ފުރަތަމަ މެޗެވެ.

މެޗުން މޮޅުވެ ޗެލްސީ އޮތީ ޗެމްޕިއަންސް ލީގު ތާވަލްގެ އަށް ވަނަ މަގާމުގަ އެވެ. އެއީ މިހާތަނަށް ކުޅެފައިވާ ހަތް މެޗުން 13 ޕޮއިންޓާ އެކު އެވެ.