ފާމިން ލޮޕޭޒްގެ ދެ ލަނޑާ އެކު ބާސެލޯނާ މޮޅުވެއްޖެ

ޔުއެފާ ޗެމްޕިއަންސް ލީގުގައި ސްލާވިއާ ޕްރާގްއާ ދެކޮޅަށް ކުޅުނު މެޗުން ބާސެލޯނާ މޮޅުވެއްޖެ އެވެ.

ސްލާވިއާ ޕްރާގްގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު ބާސެލޯނާ އިން ކާމިޔާބު ކުރީ 4-2 އިންނެވެ. މެޗުގައި ސްލާވިއާ ޕްރާގް އިން ލަނޑު ޖަހައި ކުރި ހޯދާފައި ވަނިކޮށް، ބާސެލޯނާ އިން ވަނީ ފަހަތުން އަރައި މޮޅުވެފަ އެވެ.

މެޗު ފަށައިގެން 10 ވަނަ މިނެޓުގައި ސްލާވިއާ ޕްރާގް އަށް ލީޑު ނަގައިދިނީ ވާސިލް ކުސެޖް އެވެ. އެއީ ތޯމަސް ހޯލްސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން މެޗުގެ 34 ވަނަ މިނެޓުގައި ބާސެލޯނާ އަށް ނަތީޖާ ހަމަހަމަ ކޮށްދިނީ ފާމިން ލޮޕޭޒް އެވެ. އެ ލަނޑު ޖަހަން ލޮޕޭޒް އަށް ފުރުސަތު ތަނަވަސްކޮށްދިނީ ފްރެންކީ ޑި ޔޯން އެވެ.

އޭގެ އަށް މިނެޓު ފަހުން ލޮޕޭޒް ވަނީ ދެ ވަނަ ލަނޑެެއް ޖަހައި ބާސެލޯނާ އަށް ކުރި ހޯދައިދީފަ އެވެ. އެ ލަނޑު އޭނާ ޖެހީ ޕެޑްރީ ތަނަވަސްކޮށްދިން ފުރުސަތެއްގަ އެވެ. ނަމަވެސް، މެޗުގެ ފުރަތަމަ ހާފު ނިމުމުގެ ކުރިން ބާސެލޯނާގެ ރޮބާޓް ލެވަންޑޯސްކީ އަތުން ބައި ކޮޅަށް ވަތް ލަނޑާ އެކު، ސްލަވިއާ ޕްރާގް އަށް ނަތީޖާ ހަމަހަމަވި އެވެ. 

މެޗުގެ ދެ ވަނަ ހާފު ފަށައިގެން 63 ވަނަ މިނެޓުގައި ބާސެލޯނާގެ ތިން ވަނަ ލަނޑު ޖަހައި ލީޑު ނަގައިދިނީ ޑެނީ އޮލްމޯ އެވެ. އޭގެ ފަހުން މެޗުގެ 71 ވަނަ މިނެޓުގައި ލެވަންޑޯސްކީ ވަނީ ލަނޑު ޖަހައި ބާސެލޯނާގެ ލީޑު އިތުރަށް ފުޅާ ކޮށްފަ އެވެ. އެ ލަނޑު ޖަހަން ލެވަންޑޯސްކީ އަށް ފުރުސަތު ތަނަވަސްކޮށްދިނީ މާކަސް ރަޝްފޯޑު އެވެ.

މޮޅާއެކު ބާސެލޯނާ އިން ވަނީ ލީގު ތާވަލްގެ ނުވަ ވަނަ މަގާމަށް ޖެހިލައިފަ އެވެ. އެއީ މިހާތަނަށް އެ ޓީމު ކުޅެފައިވާ ހަތް މެޗުން 13 ޕޮއިންޓާ އެކު އެވެ. މި ސީޒަންގެ ޗެމްޕިއަންސް ލީގުގައި ބާސެލޯނާ ވަނީ ހަތަރު މެޗުން މޮޅުވެ، ދެ މެޗުން ބަލިވެފަ އެވެ. އަނެއް މެޗު ނިމުނީ އެއްވަރު ވެގެންނެވެ.