ޖެހި ޖެހިގެން ފަސް ވަނަ ފަހަރަށް މާޒިޔާ އިން ޕްރިމިއަރ ލީގު ކާމިޔާބު ކޮށްފި

މާޒިޔާ ސްޕޯޓްސް އެންޑް ރެކްރިއޭޝަން ކުލަބުން، ދިރާގު ދިވެހި ޕްރިމިއަރ ލީގުގެ ޗެމްޕިއަންކަން ކަށަވަރު ކޮށްފި އެވެ.

މާޒިޔާ އަށް ލީގު ކަށަވަރުވީ ބުދަ ދުވަހުގެ ހަވީރު އޮޑި ސްޕޯޓްސް ކުލަބާއި، ބުރު ސްޕޯޓްސް ކުލަބު ބައްދަލު ކުރި މެޗު އެއްވަރުވުމުންނެވެ. އެ މެޗު ނިމުނީ ދެ ޓީމު 1-1 އިން އެއްވަރު ވެގެންނެވެ. މެޗުގައި ބުރުގެ ޝަމްވީލް މުޙައްމަދު ލަނޑު ޖަހައި އެ ޓީމަށް ކުރި ހޯދައިދީފައި ވަނިކޮށް، އޮޑި އަށް ނަތީޖާ ހަމަހަމަ ކޮށްދިނީ ބިދޭސީ ކުޅުންތެރިޔާ ކިއާނޫ މާޝް ބްރައުން އެވެ.

އެ މެޗު އެއްވަރުވުމުން މާޒިޔާ އަށް ލީގު ޗެމްޕިއަންކަން ކަށަވަރުވީ އެވެ. އޭގެ ފަހުން ލީގުގައި ބުދަ ދުވަހުގެ ރޭ ނިއު ރޭޑިއަންޓް ސްޕޯޓްސް ކުލަބާ ދެކޮޅަށް މާޒިޔާ ނިކުތްއިރު، އެ މެޗު ނިމުނީ އެއްވަރު ވެގެންނެވެ. މެޗުގައި މާޒިޔާ އިން ދެ ލަނޑު ޖަހައި ލީޑު ހޯދާފައި ވަނިކޮށް، ނިއު އިން ވަނީ ފަހަތުން އަރައި ދެ ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ.

މެޗުގެ ދެ ވަނަ ހާފު ފަށައިގެން ދެ ވަނަ މިނެޓުގައި މާޒިޔާ އަށް ލީޑު ނަގަައިދިނީ ޙަސަން ނަޒީމް އެވެ. އޭގެ ފަހުން މެޗުގެ 55 ވަނަ މިނެޓުގައި ސަމޫހު އަލީ ވަނީ މާޒިޔާގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އޭގެ ތިން މިނެޓު ފަހުން ނިއުގެ ބިދޭސީ ކުޅުންތެރިޔާ އަލްހާޖީ ގޭރޯ ވަނީ އެ ޓީމުގެ ފުރަތަމަ ލަނޑު ޖަހައިފަ އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ނިއު އަށް ލިބުނު ޕެނަލްޓީ ކާމިޔާބުކޮށް ނަތީޖާ ހަމަހަމަ ކޮށްދިނީ އަލީ އަޝްފާގު (ދަގަނޑޭ) އެވެ.

މާޒިޔާ އިން ޖެހި ޖެހިގެން ފަސް ވަނަ ފަހަރަށް ދިވެހި ޕްރިމިއަރ ލީގު ކާމިޔާބު ކުރިއިރު، އެއް ވަނައިގައި އެ ޓީމު އޮތީ މިހާތަނަށް ކުޅެފައިވާ 17 މެޗުން 45 ޕޮއިންޓާ އެކު އެވެ. ދެ ވަނައިގައި އޮޑި އަށް 17 މެޗުން ލިބެނީ 39 ޕޮއިންޓެވެ.