ހުޅަނގު އައްސޭރީގެ ބިން ރަޖިސްޓްރީކުރުން ހުއްޓާލުމަށް އީޔޫއިން އިޒްރޭލަށް ގޮވާލައިފި
ހިފާފައިވާ ހުޅަނގު އައްސޭރީގެ ބިންތައް ރަޖިސްޓްރީކުރުމަށް އިޒްރޭލުން ނިންމި ނިންމުމަކީ ބައިނަލްއަގުވާމީ ގާނޫނުތަކާ ހިލާފު ޣައިރު ގާނޫނީ އަމަލެއް ކަމަށް ބުނެ އެ ނިންމުން ބަދަލުކުރުމަށް އީޔޫއިން ގޮވާލައިފި. އީޔޫގެ ތަރުޖަމާނު ވިދާޅުވީ މިއީ މަސްރަހު އިތުރަށް ގޯސްވެގެންދާނެ ކަމެއް ކަމަށާއި، އެހެން ގައުމެއްގެ ބިންތައް އަމިއްލަ ބާރުގެ ދަށަށް ގެނައުމަކީ ބަލައިގަނެވޭނެ ކަމެއް ނޫން ކަމަށް.
ހުޅަނގު އައްސޭރީގެ ދެކުނު ހެބްރޮން ހިލްސްގައި ހުންނަ ކާމަލް ސެޓްލްމަންޓް ކައިރީގައި އޮންނަ ހައިވޭއެއްގައި، 2025 އޮގަސްޓް 4 ވަނަ ދުވަހު އިޒްރޭލުގެ ދިދައެއް ނަގާފައި. | ގެޓީ އިމޭޖަސް
ހިފާފައިވާ ހުޅަނގު އައްސޭރީގެ ބިންތައް ރަޖިސްޓްރީ ކުރުމުގެ މަސައްކަތް ކުރިއަށް ގެންދިއުމަށް އިޒްރޭލުން ނިންމި ނިންމުން ބަދަލުކުރުމަށް ޔޫރަޕިއަން ޔޫނިއަން (އީޔޫ) އިން ހޯމަ ދުވަހު ގޮވާލައިފި އެވެ.
އީޔޫ އިން ވަނީ އިޒްރޭލުގެ މި ނިންމުމަކީ މަސްރަހު އިތުރަށް ގޯސްވެގެންދާނެ ކަމެއް ކަމަށް ބުނެ އިންޒާރު ދީފައެވެ.
އީޔޫގެ ޚާރިޖީ ކަންކަމާ ބެހޭ ތަރުޖަމާނު އަންވަރު އަލް އަނޫނީ ވިދާޅުވީ، ހިފާފައިވާ ހުޅަނގު އައްސޭރީގެ މައްޗަށް އިޒްރޭލުގެ ބާރު ފުޅާކުރުމަށް ފަހަކަށް އައިސް އަޅަމުންދާ ފިޔަވަޅުތަކަށް ފަހު، ބިންތައް ރަޖިސްޓްރީ ކުރަން ނިންމި ނިންމުމަކީ މަސްރަހު އިތުރަށް ގޯސްކުރުމަށް އެޅި ފިޔަވަޅެއް ކަމަށެވެ.
މީގެ އިތުރުން، އެހެން ގައުމެއްގެ ބިންތައް އަމިއްލަ ބާރުގެ ދަށަށް ގެނައުމަކީ ބައިނަލްއަގުވާމީ ގާނޫނުތަކާ ޚިލާފު ޣައިރު ގާނޫނީ އަމަލެއްކަން ތަކުރާރުކޮށް ފާހަގަކުރައްވައި، އިޒްރޭލުން މި ނިންމުން އަނބުރާ ގެންދިއުމަށް އޭނާ ވަނީ ގޮވާލައްވާފަ އެވެ.
