އީރާންގެ ލީޑަރު ޚާމަނާއީ ހުންނަވަން ޖެހޭނީ ކަންބޮޑުވެފައި: ޓްރަމްޕް

އީރާންގެ ރޫހާނީ ލީޑަރު އާޔަތުﷲ އަލީ ޚާމަނާއީ ހުންނަވަން ޖެހޭނީ ވަރަށް ކަންބޮޑުވެފައި ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، އީރާންގެ "އިސްވެރިޔާ" ހުންނަވަން ޖެހޭނީ ވަރަށް ކަންބޮޑުވެފައިވާ ކަމަށާއި، އެއީ ލާޒިމު ކަމެއް ކަމަށެވެ. އެއާ އެކު، އެމެރިކާ އިން އަންނަނީ އީރާން އާއެކު މަޝްވަރާ ކުރަމުން ކަމަށް ވެސް ޓްރަމްޕް ވަނީ ވިދާޅުވެފަ އެވެ. އަދި އެމެރިކާ އިން އީރާންގެ ހިމެނޭ ސަރަހައްދުގައި ހަނގުރާމަވެރި ބާރުތައް އިތުރު ކުރަމުން ގެންދާ ކަމަށް ވެސް ޓްރަމްޕް ވިދާޅުވި އެވެ. 

ޓްރަމްޕް މިހެން ވިދާޅުވެފައިވާއިރު، އީރާން އާއި އެމެރިކާއާ ދެމެދު ކުރިއަށް ގެންދާ މަޝްވަރާތައް ހުކުރު ދުވަހު އޮންނާނެ އެވެ. އީރާންގެ ފޮރިން މިނިސްޓަރު އައްބާސް އަރާގްޗީ ބުދަ ދުވަހު ވިދާޅުވެފައި ވަނީ، އެމެރިކާ އާއެކު ކުރިއަށް ގެންދާ މަޝްވަރާތައް ހުކުރު ދުވަހު އޮމާންގައި އޮންނާނެ ކަމަށެވެ. އެމެރިކާގެ އޮފިޝަލަކު ވެސް ވަނީ، ހުކުރު ދުވަހު މަޝްވަރާތައް ކުރިއަށް ގެންދާނެ ކަމަށް ވިދާޅުވެފަ އެވެ.

އީރާން އާއި އެމެރިކާއާ ދެމެދު ނުތަނަވަސްކަން އިތުރުވެފައި ވަނީ، ޓްރަމްޕްގެ އަމުރުފުޅަށް އެމެރިކާގެ ހަނގުރާމަ މަތީ އުޅަނދުތައް އެ ސަރަހައްދުގައި ޙަރަކާތްތެރި ވަމުން އަންނާތީ އެވެ. ޓްރަމްޕް ވިދާޅުވެފައި ވަނީ، އީރާން އިން އެއްބަސްވުމަކަށް ނައިސްފި ނަމަ، އެ ޤައުމާ ދެކޮޅަށް އަސްކަރީ ބާރު ބޭނުން ކުރަން ޖެހިދާނެ ކަމަށެވެ. މީގެ ކުރިން ވެސް އެމެރިކާ އިން ވަނީ، އީރާންގެ ނިއުކްލިއާ މަރުކަޒު ތަކަށް އަމާޒުކޮށް ހަމަލާ ދީފަ އެވެ. 

އިތުރަށް ވާހަކަ ދައްކަވަމުން ޓްރަމްޕް ވިދާޅުވީ، އެމެރިކާ އިން އީރާން އަށް ހަމަލާ ދިން ފަހުން، އަލުން އަނެއްކާ ވެސް ނިއުކްލިއާ ތަނެއް ބިނާ ކުރުމަށް އީރާން އިން ވިސްނަމުން އައި ކަމަށެވެ. އެގޮތުން ޓްރަމްޕް ވިދާޅުވީ، އީރާން އިން ޤައުމުގެ އެހެން ސަރަހައްދެއްގައި ނިއުކްލިއާ އައު ތަނެއް ޤާއިމު ކުރުމަށް ވިސްނަމުން އައި ކަމަށާއި، އެކަން އެމެރިކާ އަށް އެނގުނު ހިސާބުން އީރާން އަށް އިންޒާރު ދީފައިވާނެ ކަމަށެވެ. 

އެއާ އެކު ޓްރަމްޕް ވިދާޅުވީ، އީރާން އިން އެގޮތުގައި މަސައްކަތް ކުރިއަށް ގެންގޮސްފި ނަމަ، ވަރަށް ނުރައްކާތެރި ފިޔަވަޅު ތަކެއް އަޅަން ޖެހޭނެ ކަމަށެވެ.  މީގެ ކުރިން ވެސް އެމެރިކާ އާއި، އީރާންއާ ދެމެދު ވަނީ ނިއުކްލިއާ މަޝްވަރާތައް ކުރިއަށް ގެންގޮސްފަ އެވެ. 2025 ވަނަ އަހަރުގެ ޖޫން މަހުގެ ތެރޭގައި، އިޒްރޭލް އާއި، އެމެރިކާ އިން އީރާން އަށް ދިން ހަމަލާ ތަކުގެ ސަބަބުން އެ މަޝްވަރާ ތަކަށް ވަނީ ހުއްޓުން އައިސްފަ އެވެ.