ޓްރަމްޕްގެ ބޯޑް އޮފް ޕީސްގެ ފުރަަތަމަ ބައްދަލުވުމުގައި އިޒްރޭލްގެ ފޮރިން މިނިސްޓަރު ބައިވެރި ވާނެ

އެމެރިކާގެ ރައީސް ޑޮނަލްޑް ޓްރަމްޕް އުފައްދަވާފައިވާ ބޯޑް އޮޕް ޕީސްގެ ފުރަތަމަ ބައްދަލުވުމުގައި އިޒްރޭލްގެ ފޮރިން މިނިސްޓަރު ގިޑިއޯން ސާރް ބައިވެރި ވާނެ ކަމަށް ހާމަ ކޮށްފި އެވެ. 

ޓްރަމްޕްގެ ބޯޑު އޮފް ޕީސްގެ ފުރަތަމަ ބައްދަލުވުން ބޭއްވުމަށް ހަމަޖެހިފައި ވަނީ ފެބްރުވަރީ މަހުގެ 19 ވާ ބުރާސްފަތި ދުވަހު އެވެ. ދަ އިޒްރޭލީ އޮފިޝަލް އިން ހާމަ ކޮށްފައިވާ ގޮތުގައި އެ ބައްދަލުވުމުގައި ސާރް ބައިވެރި ވާނެ ކަމަށެވެ. މިދިޔަ ހަފުތާާގެ ތެރޭގައި އިޒްރޭލް އިން ވަނީ ރަަސްމީކޮށް އެ ބޯޑުގައި ބައިވެރިވާން ނިންމައިފަ އެވެ. 

ރޮއިޓާސް އަށް މައުލޫމާތު ދެމުން އެމެރިކާގެ އޮފިޝަލުން މި ހަފުތާގެ ތެރޭގައި ބުނެފައި ވަނީ، ބޯޑު އޮފް ޕީސްގެ އެ ބައްދަލުވުމުގައި ޣައްޒާ އަލުން އާރާސްތު ކުރުމާއި ބިނާ ކުރުމަށް، ޓްރަމްޕް ގެންގުޅުއްވާ ބިލިއަން ޑޮލަރުގެ ޕްލޭން އިއުލާން ކުރައްވާނެ ކަމަށެވެ. އަދި އދ އިން ހުއްދަ ދީގެން ފަލަސްޠީނުގެ ސަރަހައްދަށް ފޮނުވާ ސްޓެބިލައިޒޭޝަން ފޯސް ތަމްސީލު ކުރާނެ ފަރާތްތައް ވެސް ހާމަ ކުރާނެ ކަމަށް ބުނެފައިވެ އެވެ. އެ ބައްދަލުވުން އޮންނާނީ އެމެރިކާގެ ވެރި ރަށް ވޮޝިންޓަންގަ އެވެ. 

އެ ބައްދަލުވުމުގައި އެކި އެކި ޤައުމު ތަކުގެ އިސްވެރިން ބައިވެރިވާނެ ކަމަށް ބުނެފައިވެ އެވެ. އެގޮތުން ޖުމުލަ 20 ޤައުމެއްގެ ވަފުދުން އެ ބައްދަލުމުގައި ބައިވެރިވާނެ ކަމަށް ލަފާ ކޮށްފައިވެ އެވެ. މި ބޯޑު އުފައްދަން ތާއީދު ކޮށްފައި ވަނީ އދ.ގެ ސަލާމަތީ މަޖިލީހުގެ ޤަރާރަކުން ކަމަށާއި، މިއީ ޣައްޒާ ހަނގުރާމަ ނިންމުމަށް ޓްރަމްޕް ގެންގުޅުއްވާ ޕްލޭންގެ ބައެއް ކަމަށް ވެސް ބުނެފައިވެ އެވެ. 

މި ބޯޑުގައި މެދު އިރުމަތީގެ ސަރަހައްދީ ބާރު ގަދަ ބައިވެރިންނާއި، ދުނިޔޭގެ ބާރު ގަދަ ޤައުމު ތަކުން ބައިވެރިވެފައިވާއިރު، ބައިނަލްއަޤުވާމީ ބާރު ތަކާއި، ހުޅަނގުގެ އެމެރިކާގެ ދާއިމީ އެކުވެރިން މިކަމުގައި ވަރަށް ސަމާލުކަމާ އެކު މަސައްކަތް ކުރަމުން އަންނަ ކަމަށް މާހިރުން ވަނީ ފާހަގަ ކޮށްފަ އެވެ. ބައްދަލުވުމާ ގުޅޭ ގޮތުން އެމެރިކާ އިން ބުނެފައި ވަނީ، އެ ބައްދަލުވުމުގެ ސަމާލުކަން އޮންނާނީ ޣައްޒާ އަށް ކަމަށާއި، ދެ އަހަރުގެ ހަނގުރާމައިގައި ސުންނާފަތިވެފައިވާ އެ ސަރަހައްދު އާރާސްތު ކުރުމަަށް އިސްކަން ދޭނެ ކަމަށެވެ. 

ޓްރަމްޕްގެ ފަރާތުން ހުށަހެޅި ހަނގުރާމަ ހުއްޓާލުމުގެ އެއްބަސްވުމަށް ހަމާސް އާއި އިޒްރޭލް އިން ވެސް އެއްބަސްވެފައިވެ އެވެ. އެގޮތުން މިދިޔަ އަހަރުގެ އޮކްޓޫބަރު މަހުގެ ތެރޭގައި ހަނގުރާމަ ހުއްޓާލުމުގެ އެއްބަސްވުމެއް ވަނީ ޤާއިމު ކޮށްފަ އެވެ. ނަމަވެސް، ހަނގުރާމަ ހުއްޓާލުމުގެ އެއްބަސްވުމަށް ފަހު ވެސް އިޒްރޭލް އިން ގެންދަނީ ޣައްޒާ ގައި ޤަތުލު އާންމު ހިންގަމުންނެވެ. 

ހަމާސް އާއި އިޒްރޭލް އިން ގެންދަނީ، ދެ ފަރާތުން ވެސް އެއް ބަޔަކު އަނެއް ބަޔަކަށް ހަނގުރާމަ ހުއްޓާލުމުގެ އެއްބަސްވުމާ ޚިލާފުވެފައިވާ ކަމުގެ ތުހުމަތު ކުރަމުންނެވެ. ނަމަވެސް، ޓްރަމްޕްގެ ޕްލޭންގައި ހިމެނޭ ހަނގުރާމަ ހުއްޓާލުމުގެ ދެ ވަނަ މަރުޙަލާ އަށް ބާރު އަޅަމުން އަންނަ ކަމަށް ރިޕޯޓުތައް ބުނެ އެވެ. އެ ފިޔަވަހީގައި ހިމެނެނީ އިޒްރޭލްގެ ސިފައިން ޣައްޒާ އިން އެއްކޮށް ފޭބުމާއި، ހަމާސް އިން އެ ޖަމާއަތުގެ ހަތިޔާރުތައް ބެހެއްޓުމެވެ.