ޓްރަމްޕް އުފައްދަވާފައިވާ "ބޯޑް އޮފް ޕީސް" ގައި ޕޮލެންޑާއި އިޓަލީން ބައިވެރިނުވާނެކަން އެ ދެ ގައުމުން ބުނެފި

އެމެރިކާގެ ރައީސް ޑޮނަލްޑް ޓްރަމްޕް އުފައްދަވާފައިވާ "ބޯޑް އޮފް ޕީސް" ނުވަތަ ސުލްހައިގެ މަޖިލީހުގައި ޕޮލެންޑާއި އިޓަލީން ބައިވެރިނުވާނެކަން އެ ދެ ގައުމުން ބުދަ ދުވަހު ހާމަކޮށްފި އެވެ. މިއާއެކު، ވޮޝިންޓަނުގެ ގާތް އެކުވެރި ގައުމުތަކުގެ ތެރޭގައި ބެލެވުނު މި މަޖިލީހާ ދުރުގައި ތިބި ގައުމުތަކުގެ ލިސްޓަށް މި ދެ ގައުމު މިވަނީ އިތުރުވެފަ އެވެ.

ޣައްޒާގެ ހަނގުރާމަ ހުއްޓާލުމުގެ އެއްބަސްވުމުގެ ބައެއްގެ ގޮތުގައި ފެށި މި މަސައްކަތަކީ، ދުނިޔޭގެ އެކި ކަންކޮޅުތަކުގައި ހިނގަމުންދާ ހަމަނުޖެހުންތައް ހައްލުކުރުމަށް ފުޅާ ދާއިރާއެއްގައި މަސައްކަތްކުރާނެ މަޖިލީހެއް ކަމަށް ޓްރަމްޕް ދެކެވަޑައިގަންނަވަ އެވެ. ނަމަވެސް ބައެއް ގައުމުތަކުން ކަންބޮޑުވަނީ، މި މަޖިލީހަކީ އދ. އާ ވާދަކުރާނެ އިދާރާއަކަށް ވެދާނެތީ އެވެ.

މީގެ އިތުރުން، ރަޝިޔާ އާއި ބެލަރޫސް މި މަޖިލީހުގައި ބައިވެރިވުމަށް ދައުވަތު ދީފައިވުމަކީ ވެސް ހުޅަނގުގެ ގިނަ ގައުމުތަކުން މިކަމުގައި ތަފާތު ގޮތަކަށް ދެކެމުންދާ ސަބަބެކެވެ.

ސަރުކާރުގެ ބައްދަލުވުމެއްގައި ވާހަކަދައްކަވަމުން ޕޮލެންޑުގެ ބޮޑުވަޒީރު ޑޮނަލްޑް ޓުސްކް ވިދާޅުވީ، މި މަޖިލިސް އެކުލަވާލާފައިވާ ގޮތާމެދު ގައުމީ ފެންވަރުގައި ބައެއް ޝައްކުތައް ހުރުމާއެކު، މި ހާލަތުގައި ޕޮލެންޑުން "ބޯޑް އޮފް ޕީސް" ގައި ބައިވެރިނުވާނެ ކަމަށެވެ. ނަމަވެސް އެ މަޖިލީހުގެ މަސައްކަތްތައް ދިރާސާކުރަމުން ގެންދާނެ ކަމަށް އޭނާ ވިދާޅުވި އެވެ.

ޓުސްކް އިތުރަށް ވިދާޅުވީ، އެމެރިކާއާއެކު އޮންނަ ގުޅުމަކީ އަބަދުވެސް ޕޮލެންޑުން އެންމެ އިސްކަންދޭ ކަންތައް ކަމަށާއި، އެހެންކަމުން މި މަޖިލީހުގައި ބައިވެރިވެވޭނެ ފަދަ ގޮތަކަށް ހާލަތު ބަދަލުވެއްޖެނަމަ، އެ ފުރުސަތު ބަންދުނުކުރައްވާނެ ކަމަށެވެ.

ބުދަ ދުވަހުގެ ފަހުގެ ވަގުތެއްގައި ބޭއްވުމަށް ހަމަޖެހިފައިވާ ގައުމީ ސަލާމަތާ ބެހޭ މަޖިލީހުގެ ބައްދަލުވުމުގައި، ޓުސްކް އޭނާގެ ސިޔާސީ ވާދަވެރިޔާ، ރައީސް ކަރޯލް ނަވްރޮކީއާ ބައްދަލުކުރެއްވުމަށް އޮތީ ހަމަޖެހިފަ އެވެ. މި ބައްދަލުވުމުގެ އެޖެންޑާގައި "ބޯޑް އޮފް ޕީސް" އާ ގުޅޭ މަޝްވަރާތައް ހިމެނެ އެވެ.

މީގެ އިތުރުން، އިޓަލީގެ ފޮރިން މިނިސްޓަރު އެންޓޯނިއޯ ޓަޖާނީ ވެސް ބުދަ ދުވަހު ވަނީ އެ ގައުމުން މި އެއްބަސްވުމުގައި ސޮއިނުކުރާނެކަން ކަށަވަރުކޮށްދެއްވާފައެވެ.

ސްކައި ޓީޖީ24 ނިއުސް ޗެނަލަށް ދެއްވި އިންޓަވިއުއެއްގައި ޓަޖާނީ ވިދާޅުވީ، އިޓަލީގެ ގާނޫނުއަސާސީ ހުރަސްއަޅާ ބޮޑެތި ކަންތައްތަކެއް ހުރުމުގެ ސަބަބުން "ބޯޑް އޮފް ޕީސް" ގައި ބައިވެރިވެވެން ނެތް ކަމަށެވެ.

ނަމަވެސް، މެދުއިރުމަތީގައި ސުލްހަ ގާއިމުކުރުމަށްޓަކައި ކުރެވޭ މަސައްކަތްތަކުގައި އެހީތެރިކަން ބޭނުންވާނަމަ، އެކަމަށް އިޓަލީ އޮތީ ތައްޔާރަށް ކަމަށް އޭނާ އިތުރަށް ވިދާޅުވި އެވެ.

އިޓަލީގެ ގާނޫނުއަސާސީ ބުނާގޮތުން، އެ ގައުމަށް ބައިނަލްއަގުވާމީ ޖަމިއްޔާތަކާ ގުޅެވޭނީ އެހެން ގައުމުތަކާ ހަމަހަމަ އުސޫލަކުންނެވެ. ނަމަވެސް "ބޯޑް އޮފް ޕީސް" ގެ މިހާރުގެ ގަވާއިދުތައް އޮތްގޮތުން ޓްރަމްޕަށް ބޮޑެތި ބާރުތަކެއް ލިބިދޭތީ، އެއީ ހަމަހަމަ އުސޫލެއް ނޫން ކަމަށް ރޯމްއިން ގަބޫލުކުރެ އެވެ.

ޓްރަމްޕާ ގާތް ގުޅުމެއް ބާއްވަވާ އިޓަލީގެ ބޮޑުވަޒީރު ޖިއޯޖިއާ މެލޯނީ ވިދާޅުވީ، އިޓަލީއަށް މި މަޖިލީހުގައި ބައިވެރިވެވޭނެ މަގު ފަހިކުރުމަށްޓަކައި، "ބޯޑް އޮފް ޕީސް" ގެ އުސޫލުތަކަށް ބަދަލު ގެނައުމަށް މިދިޔަ މަހު ޓްރަމްޕްގެ އަރިހުން އެދިވަޑައިގެންފައިވާނެ ކަމަށެވެ.