އިޒްރޭލުން ޣައްޒާގެ އެކި ސަރަހައްދުތަކަށް ދިން ވައިގެ އަދި ބަޑީގެ ހަމަލާތަކުގައި ފަލަސްތީނުގެ ފަސް މީހަކު ޝަހީދުކޮށްލައިފި

އިޒްރޭލުން ދިން ވައިގެ ހަމަލާތަކާއި ބަޑީގެ ހަމަލާތަކުގައި އަންގާރަ ދުވަހު ޣައްޒާގެ ފަސް ފަލަސްތީނު މީހުން ޝަހީދުކޮށްލާފައިވާ ކަމަށް ސިއްހީ އޮފިޝަލުން ބުނެފިއެވެ. މިއީ އެމެރިކާ މެދުވެރިވެގެން ގައްޒާގައި ގާއިމުކޮށްފައިވާ ހަތަރު މަސްވީ ހަނގުރާމަ ހުއްޓާލުމުގެ އެއްބަސްވުމަށް ބުރޫއަރާ ފަދަ ގޮތަކަށް ހިންގި އެންމެ ފަހުގެ ހަމަނުޖެހުންތަކެވެ.

މެޑިކަލް އޮފިޝަލުން ބުނި ގޮތުގައި ޣައްޒާގެ މެދުތެރޭގައި އޮންނަ ދީރުލް ބަލާހްގައި ދިން ވައިގެ ހަމަލާއެއްގައި، އިލެކްޓްރިކް ބައިސްކަލެއްގައި ދަތުރުކުރި ދެ މީހަކު ވަނީ ޝަހީދުވެފަ އެވެ. އޭގެ ފަހުން، އިޒްރޭލުގެ ޑްރޯން ހަމަލާއެއްގައި ދީރުލް ބަލާހްއިން އަންހެނަކު ޝަހީދުކޮށްލާފައިވާއިރު، ދެކުނުގެ ޚާން ޔޫނިސްގައި އިޒްރޭލުގެ ސިފައިން ވަނީ ބަޑިޖަހައި ފިރިހެނަކު މަރާލާފަ އެވެ.

މީގެ އިތުރުން، ޣައްޒާގެ އުތުރުގައި އޮންނަ ޖަބާލިއާގައި އިޒްރޭލު ސިފައިން ބަޑިޖަހައި އިތުރު ފިރިހެނަކު ޝަހީދުކޮށްލާފައިވާ ކަމަށް ފަލަސްތީނުގެ މެޑިކަލް އޮފިޝަލުން ބުނެ އެވެ.

މި ހަމަނުޖެހުންތައް ހިނގާފައި މިވަނީ، ދެކުނުގެ ސިޓީއެއް ކަމަށްވާ ރަފަހްގައި ބިންގަރާހަކުން ނުކުމެ އިޒްރޭލު ސިފައިންނަށް ބަޑީގެ ހަމަލާދިން ހަތަރު މުޖާހިދުން، އިޒްރޭލު ސިފައިން އިއްޔެ ޝަހީދުކޮށްލާފައި ވަނިކޮށެވެ.

އަންގާރަ ދުވަހު ޝަހީދުވި ފަސް މީހުންނާ ގުޅޭގޮތުން ސީދާ އެއްޗެއް ބުނުމެއް ނެތި، އިޒްރޭލުގެ  އަސްކަރިއްޔާއިން ބުނީ، ހޯމަ ދުވަހު ރަފަހްގައި ހިނގި ހާދިސާއާ ގުޅިގެން ހަމާސްގެ މުޖާހިދުންނަށް އަމާޒުކޮށް ހަމަލާތަކެއް ދީފައިވާނެ ކަމަށެވެ.

ޣައްޒާ ސިޓީގައި، ހޯމަ ދުވަހުގެ ރޭ އެ ސަރަހައްދުގެ އެޕާޓްމަންޓް އިމާރާތަކަށް އިޒްރޭލުން ދިން ވައިގެ ހަމަލާއެއްގައި ޝަހީދުވި ތިން މީހެއްގެ ޖަނާޒާގައި އެތައް ބަޔަކު ބައިވެރިވެ، އިޒްރޭލާ ދެކޮޅަށް އަޑުއުފުލާފައިވެ އެވެ.

އޮކްޓޯބަރު މަހު ހަނގުރާމަ ހުއްޓާލުމުގެ އެއްބަސްވުން ގާއިމުކުރި ފަހުން، އިޒްރޭލުގެ ހަމަލާތަކުގައި މަދުވެގެން 580 ފަލަސްތީނު މީހުން ޝަހީދުވެފައިވާ ކަމަށް ޣައްޒާގެ ހެލްތު މިނިސްޓްރީން ބުނެ އެވެ. އިޒްރޭލުން ބުނާ ގޮތުގައި އެ މުއްދަތުގެ ތެރޭގައި ޣައްޒާގެ މުޖާހިދުން ދިން ހަމަލާތަކުގައި އެ ގައުމުގެ ހަތަރު ސިފައިން ވަނީ މަރުވެފަ އެވެ.

ޣައްޒާ ހަނގުރާމަ ފެށުނީ 2023 ވަނ އަހަރުގެ އޮކްޓޯބަރު 7 ވަނަ ދުވަހު ހަމާސް އިން އިޒްރޭލުގެ ދެކުނަށް ދިން ކުއްލި ހަމަލާއާ ގުޅިގެންނެވެ. އިޒްރޭލުގެ ހިސާބުތަކުން ދައްކާ ގޮތުގައި އެ ހަމަލާގައި 1,200 އަށްވުރެ ގިނަ މީހުން މަރުވި އެވެ. ފަލަސްތީނުގެ ހެލްތު މިނިސްޓްރީގެ ތަފާސްހިސާބުތަކުން ދައްކާ ގޮތުގައި، އޭގެ ފަހުން އިޒްރޭލުން ޣައްޒާ އަށް ދެމުންދާ ވައިގެ އަދި އެއްގަމު ހަމަލާތަކުގައި މިހާތަނަށް 72,000 އަށްވުރެ ގިނަ މީހުން ވަނީ ޝަހީދުވެފަ އެވެ.