އަނެއްކާ ވެސް އިތުރު ހަނގުރާމަމަތީ މަނަވަރެއް އެމެރިކާ އިން މެދުއިރުމައްޗަށް ފޮނުވަން ތައްޔާރުވަނީ
އީރާނުގެ ނިއުކްލިއާ އަދި މިސައިލް ޕްރޮގްރާމަށް އަމާޒުކޮށް ފިއްތުންތައް އިތުރުކުރުމުގެ ގޮތުން، މެދުއިރުމައްޗަށް ދެވަނަ އެއާކްރާފްޓް ކެރިއަރެއް ފޮނުވުމަށް އެމެރިކާއިން ވަނީ ނިންމާފައި. މަޝްވަރާގެ މަތިން މައްސަލަ ހައްލުކުރުމަށް މަސައްކަތް ކުރިއަށްދިޔަ ނަމަވެސް، އެއްބަސްވުމަކަށް ނާދެވިއްޖެނަމަ އަސްކަރީ ފިޔަވަޅު އަޅާނެކަމުގެ އިންޒާރު ރައީސް ޓްރަމްޕް ވަނީ ތަކުރާރުކުރައްވާފައި. ނަމަވެސް އީރާނުން ބުނަމުންދަނީ އެ ގައުމުގެ ދިފާއީ މިސައިލް ޕްރޮގްރާމާ ގުޅޭގޮތުން އެއްވެސް ދޫދިނުމެއް ނުއަޮންނާނެ ކަމަށް.
އަރަބި ކަނޑުގައި އޮތް އެމެރިކާގެ މަތިންދާބޯޓު އުފުލާ މަނަވަރު، ޔޫއެސްއެސް އަބްރަހަމް ލިންކަންގައި ހުންނަވައިގެން، މެދުއިރުމައްޗަށް ކަނޑައަޅުއްވާފައި ހުންނަވާ އެމެރިކާގެ ހާއްސަ މަންދޫބު ސްޓީވް ވިޓްކޮފް، އިޝާރާތް ކުރައްވަނީ ފެބްރުއަރީ 7، 2026. | ރޮއިޓާސް
އީރާނާއެކު އުފެދިފައިވާ ނުތަނަވަސްކަން ކުޑަކުރުމަށް ޚާރިޖީ ގޮތުން މަސައްކަތްތަކެއް ކުރެވެމުންދިޔަ ނަމަވެސް، މެދުއިރުމަތީގައި އެމެރިކާގެ އަސްކަރީ ބާރު އިތުރަށް ވަރުގަދަކުރުމަށް މަސައްކަތް ކުރަމުންދާކަން އެމެރިކާގެ ރައީސް ޑޮނަލްޑް ޓްރަމްޕް ކަށަވަރުކޮށްދެއްވައިފި އެވެ.
ބުރާސްފަތި ދުވަހު ޓްރަމްޕްގެ "ޓްރޫތު ސޯޝަލް" ޕްލެޓްފޯމުގައި، އެއްވެސް އިތުރު ކޮމެންޓަކާ ނުލައި ހިއްސާކުރައްވާފައިވަނީ "މެދުއިރުމަތީގައި ހަރަކާތްތެރިވުމަށް ދެވަނަ އެއާކްރާފްޓް ކެރިއަރެއް ފޮނުވުމަށް ޕެންޓަގަނުން ތައްޔާރުވަނީ" މި ސުރުޚީގެ ދަށުން ވޯލްސްޓްރީޓް ޖާނަލްގައި ޝާއިއުކޮށްފައިވާ ރިޕޯޓެކެވެ. އެ ރިޕޯޓުގައި އެމެރިކާގެ އޮފިޝަލުންނާ ހަވާލާދީ ބުނެފައިވަނީ، މިހާރުވެސް އެ ސަރަހައްދުގައި އޮތް "ޔޫއެސްއެސް އަބްރަހަމް ލިންކަން" އާ ގުޅުމަށްޓަކައި، އެއާކްރާފްޓް ކެރިއަރު ސްޓްރައިކް ގްރޫޕެއް ތައްޔާރުވުމަށް ޕެންޓަގަނުން އަސްކަރިއްޔާ އަށް އަމުރުކޮށްފައިވާ ކަމަށެވެ.
މީގެ އިތުރުން، ދުނިޔޭގެ އެންމެ ބޮޑު އެއާކްރާފްޓް ކެރިއަރު ކެރީބިއަން ކަނޑުން ފުރައިގެން މެދުއިރުމަތީގެ ސަރަހައްދަށް ދިއުމަށް އަމުރުކޮށްފައިވާކަން، މި ރޭވުންތަކުގެ މައުލޫމާތު އެނގޭ ފަރާތަކުން ބުރާސްފަތި ދުވަހު އެސޯސިއޭޓެޑް ޕްރެސް (އޭޕީ) ނިއުސް އެޖެންސީ އަށް ވަނީ ކަށަވަރުކޮށްދީފަ އެވެ.
ނިއުޔޯކް ޓައިމްސްއިން އެންމެ ފުރަތަމަ ރިޕޯޓްކުރި މި ނިންމުމާއެކު، "ޔޫއެސްއެސް ޖެރަލްޑް އާރް ފޯޑް" އާއި އޭގެ އަސްކަރީ މަނަވަރުތައް އެ ސަރަހައްދަށް ދިއުމުން، މެދުއިރުމަތީގައި އެމެރިކާގެ ދެ އެއާކްރާފްޓް ކެރިއަރާއި އެއާ ގުޅޭ ހަނގުރާމަމަތީ މަނަވަރުތައް ހަރަކާތްތެރިވާނެ އެވެ. މިއީ އީރާނުގެ ނިއުކްލިއާ ޕްރޮގްރާމާ ގުޅޭގޮތުން އެއްބަސްވުމަކަށް އައުމަށް ޓްރަމްޕް އީރާނަށް ފިއްތުންތައް އިތުރުކުރުމުގެ ބައެކެވެ. މި މައުލޫމާތު ހިއްސާކުރި ފަރާތުން ވާހަކަދައްކާފައި ވަނީ އަސްކަރީ ހަރަކާތްތަކުގެ ސިއްރު ހިފެހެއްޓުމުގެ ގޮތުން ނަން ހާމަނުކުރުމަށް ޝަރުތުކޮށްފަ އެވެ.
"ޔޫއެސްއެސް އަބްރަހަމް ލިންކަން" އެއާކްރާފްޓް ކެރިއަރާއި މިސައިލް ހަމަލާ ދިނުމުގެ ގާބިލުކަން ލިބިފައިވާ ތިން ޑިސްޓްރޯޔަރު މަނަވަރު މެދުއިރުމައްޗަށް ގޮސްފައިވަނީ މީގެ ދެ ހަފުތާއަކަށް ވުރެ ގިނަ ދުވަސް ކުރިންނެވެ.
މި ޚަބަރުތައް ފެންމަތިވެފައިވަނީ، އީރާނާ ދެކޮޅަށް ހަރުކަށި ސިޔާސަތުތަކެއް ގެންގުޅުމަށް ބާރުއަޅުއްވަމުންދާ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއާ ވައިޓް ހައުސްގައި ޓްރަމްޕް ބައްދަލުކުރެއްވިތާ މަދު ގަޑިއިރުތަކެއްގެ ތެރޭގަ އެވެ. އެ ބައްދަލުވުމުގައި ވެސް ޓްރަމްޕް ވަނީ އީރާނާއެކު އެއްބަސްވުމަކަށް އައުމަށް އިސްކަންދެއްވާކަން އަލުން ހާމަކުރައްވާފަ އެވެ.
ނަތަންޔާހޫއާ ބައްދަލުކުރެއްވުމަށްފަހު ޓްރަމްޕް ލިޔުއްވާފައި ވަނީ، އީރާނާއެކު އެއްބަސްވުމަކަށް އާދެވިދާނެތޯ ބެލުމަށް މަޝްވަރާތައް ކުރިއަށް ގެންދިއުމަށް ބާރުއެޅުން ފިޔަވައި، އެހެން އެއްވެސް ވަކި ގޮތެއް ނިންމާފައިނުވާނެ ކަމަށެވެ. އަދި އެއްބަސްވުމަކަށް އާދެވިއްޖެނަމަ އެއީ އެންމެ ބޭނުންތެރި ގޮތް ކަމަށް ބޮޑުވަޒީރަށް ދަންނަވާފައިވާނެ ކަމަށާއި، އެކަން ނުވެއްޖެނަމަ ދެން ވާނެ ގޮތެއް ބަލަން ޖެހޭނެ ކަމަށްވެސް ޓްރަމްޕް ވިދާޅުވި އެވެ.
މިދިޔަ އަހަރަށް ފަހު އެމެރިކާ އާއި އީރާނާ ދެމެދު ބޭއްވުނު ނުސީދާ މަޝްވަރާތަކުގެ ފުރަތަމަ ބުރު މިދިޔަ ހަފުތާގައި އޮމާންގައި ވަނީ ބާއްވާފަ އެވެ. ވޮޝިންޓަނާއި ތެހެރާނުންވެސް މަޝްވަރާގެ މަގު އިޚްތިޔާރުކުރާނެ ކަމަށް ބުނެފައިވީ ނަމަވެސް، އިތުރު މަޝްވަރާއެއް ބާއްވާނެ ތާރީޚެއް އަދި އާންމުކޮށްފައެއް ނުވެ އެވެ.
މިހާރު ކުރިއަށްދާ ޑިޕްލޮމެޓިކް މަސައްކަތްތައް ހަލާކުކޮށްލުމަށް ނަތަންޔާހޫ އަށް ފުރުސަތު ނުދިނުމަށް ތެހެރާނުން ވަނީ ވޮޝިންޓަނަށް އިންޒާރުދީފަ އެވެ.
އީރާނުގެ ސެކިއުރިޓީ ޗީފް އަލީ ލަރީޖާނީ ބުދަ ދުވަހު އަލްޖަޒީރާ އަށް ދެއްވި ބަސްދީގަތުމެއްގައި ވިދާޅުވީ، އީރާނުގެ މަޝްވަރާތައް ކުރިއަށްދަނީ ހަމައެކަނި އެމެރިކާ އާ އެކު ކަމަށާއި، އިޒްރޭލާއެކު އެއްވެސް ވާހަކައެއް ނުދައްކާ ކަމަށެވެ. ނަމަވެސް، އިޒްރޭލުން މި ކަމުގެ ތެރެއަށް ވަދެގަނެގެން އުޅެނީ މި މަޝްވަރާތައް ހުއްޓުވައި ފެއިލްކޮށްލުމުގެ ނިޔަތުގައި ކަމަށް އޭނާ ތުހުމަތުކުރެއްވި އެވެ.
ބުރާސްފަތި ދުވަހުގެ ވަގުތެއްގައި ޓްރަމްޕް ވަނީ، އީރާނާއެކު މަޝްވަރާ ނުކުރުމަށް ނަތަންޔާހޫ ބާރުއަޅަމުންދާ ކަމަށް ދެކެވޭ ވާހަކަތައް ދޮގުކުރައްވާފަ އެވެ. ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، އޭނާ ބޭނުފުޅުވާހާ ހިނދަކު އީރާނާ އެކު ވާހަކަދައްކަވާނެ ކަމަށާއި، އެއްބަސްވުމަކަށް އާދެވޭތޯ ބައްލަވާނެ ކަމަށެވެ.
އަންނަ މަހު އީރާނާއެކު އެއްބަސްވުމަކަށް އާދެވިދާނެ ކަމަށް ލަފާކުރައްވަމުން ޓްރަމްޕް އިތުރަށް ވިދާޅުވީ، ތެހެރާނުން "އަވަހަށް" އެއްބަސްވުމަކަށް އަންނަން ޖެހޭނެ ކަމަށެވެ. ޓްރަމްޕް ބޭނުންވަނީ އީރާނުގެ އަތުގައި "ނިއުކްލިއާ ހަތިޔާރު" އަދި "މިސައިލް" ނުހުންނާނެކަން ކަށަވަރުކުރެވޭ ފަދަ އެއްބަސްވުމެކެވެ.
ނަމަވެސް، ނިއުކްލިއާ ހަތިޔާރު އުފައްދަން މަސައްކަތްކުރާ ކަމަށް ކުރެވޭ ތުހުމަތުތައް ދޮގުކުރާ އީރާނުން ބުނެފައިވަނީ، އެ ގައުމުގެ މިސައިލް ޕްރޮގްރާމާ ގުޅޭގޮތުން އެއްވެސް ދޫދިނުމެއް ނުއޮންނާނެ ކަމަށެވެ. އީރާނުގެ ޚާރިޖީ ވަޒީރު އައްބާސް އަރަގްޗީ މިދިޔަ ހަފުތާގައި އަލްޖަޒީރާ އަށް ވިދާޅުވީ، މިސައިލް ޕްރޮގްރާމަކީ ގައުމުގެ ދިފާއީ ކަމެއް ކަމަށާއި، އެއީ "ދުވަހަކުވެސް މަޝްވަރާކުރެވޭނެ" ކަމެއް ނޫން ކަމަށެވެ.
މަޝްވަރާތައް ނާކާމިޔާބުވެއްޖެ ނަމަ، އީރާނަށް އަލުން ހަމަލާދީފާނެ ކަމުގެ އިންޒާރު ޓްރަމްޕް ވަނީ ތަކުރާރުކޮށް ދެއްވާފަ އެވެ.
މިދިޔަ އަހަރުގެ ޖޫން މަހު އިޒްރޭލުން އީރާނަށް ދިން އަސްކަރީ ހަމަލާތަކުގައި އެ ގައުމުގެ އަސްކަރިއްޔާގެ އިސް އޮފިޝަލުންނާއި، ނިއުކްލިއާ ސައިންސްވެރިންގެ އިތުރުން ސަތޭކައަށްވުރެ ގިނަ އާންމުން ވަނީ މަރުވެފަ އެވެ.
އީރާނުން އެކަމަށް ރައްދުދިނީ އިޒްރޭލަށް އެތައް ސަތޭކަ މިސައިލެއް ފޮނުވާލައިގެންނެވެ. އޭގެ ތެރެއިން އެތައް މިސައިލެއް އިޒްރޭލުގެ ވައިގެ ދިފާއީ ނިޒާމު ފޫއަޅުވާލައި އަމާޒަށް ވާސިލުވި އެވެ.
ހަނގުރާމަ ހުއްޓާލުމުގެ އެއްބަސްވުމަކަށް އައުމުގެ ކުރިން، އެމެރިކާއިން ވެސް ވަނީ އިޒްރޭލާ ގުޅިގެން އީރާނުގެ ނިއުކްލިއާ ތިން މަރުކަޒަކަށް ބޮން އަޅާފަ އެވެ.
މަސްދަރު: އަލް ޖަޒީރާ
