ޓްރަމްޕް: އިރާނުން އެމެރިކާ އާ އެކު އެއްބަސްވުމަކަށް ނައުމަކީ ވަރަށް ބޮޑު މޮޔަކަމެއް

އިރާނުން އެމެރިކާއާއެކު އެއްބަސްވުމަކަށް ނައިސްފިނަމަ އެއީ އެ ގައުމުގެ "މޮޔަ" ކަން ކަމުގައި ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. އަންގާރަ ދުވަހު ދެއްކި އިންޓަވިއުއެއްގައި ޓްރަމްޕް ވިދާޅުވީ، އެމެރިކާއާއެކު ވެވޭ ކޮންމެ އެއްބަސްވުމެއްގައި ނިއުކްލިއާ ހަތިޔާރާއި މިސައިލް އުފެއްދުން މަނާކުރާ މާއްދާތައް ހިމަނަންޖެހޭނެ ކަމަށެވެ.

ފޮކްސް ބިޒްނަސް ނެޓްވޯކްގެ "ކަޑްލޯ" ޕްރޮގްރާމަށް ދެއްވި އިންޓަވިއުއެއްގައި ޓްރަމްޕް ވިދާޅުވީ، އިރާނުން އެމެރިކާއާއެކު އެއްބަސްވުމަކަށް އަންނަން ބޭނުންވާ ކަމަށް ގަބޫލުކުރައްވާ ކަމަށާއި، އެފަދަ އެއްބަސްވުމަކަށް ނައުމަކީ އެ ގައުމުން ހަދާނެ ވަރަށް ބޮޑު ގޯހެއް ކަމަށެވެ. އަދި މީގެ ކުރިން އިރާނުގެ ނިއުކްލިއާ ބާރުތައް އެމެރިކާއިން ނައްތާލާފައިވާނެ ކަމަށާއި، މިފަހަރު އިތުރު ބާރުތަކެއް ނައްތާލަން ޖެހޭތޯ ބަލަންޖެހޭ ކަމަށްވެސް ޓްރަމްޕް ވިދާޅުވިއެވެ.

އިރާނުގެ ވެރިރަށް ތެހެރާނުން ވަނީ މިދިޔަ ހަފުތާގައި އޮމާންގައި އެމެރިކާއާއެކު އަލުން މަޝްވަރާތައް ފަށާފައެވެ.

މިދިޔަ ޖޫން މަހު އިޒްރޭލާއި އިރާނާ ދެމެދު 12 ދުވަހަށް ކުރިއަށްދިޔަ ހަނގުރާމައިގެ ތެރޭގައި، ތެހެރާނުގެ ނިއުކްލިއާ މަރުކަޒުތަކަށް ހަމަލާދިނުމަށް އަމުރުކުރެއްވި ޓްރަމްޕް ވިދާޅުވީ، ކުރިއަށް އޮތް ތަނުގައި ވެވޭ ކޮންމެ އެއްބަސްވުމަކީވެސް "ރަނގަޅު" އެއްބަސްވުމަކަށް ވާންޖެހޭނެ ކަމަށެވެ.

އިރާނުގެ މިހާރުގެ ސަރުކާރާއެކު ވެވޭ އެއްބަސްވުމެއް ދެމިއޮންނާނެތޯ ސުވާލުކުރުމުން ޓްރަމްޕް ވިދާޅުވީ، އެއީ ވަރަށް މުހިންމު ސުވާލެއް ކަމަށާއި، ގިނަ ބަޔަކު ގަބޫލުކުރާ ގޮތުގައި އެފަދަ އެއްބަސްވުމެއް ދެމިއެއް ނޯންނާނެ ކަމަށެވެ. އަދި އޭނާ ބޭނުންވަނީ ނިއުކްލިއާ ހަތިޔާރާއި މިސައިލް އަދި އެނޫންވެސް ބޭނުންވާ ހުރިހާ ކަންކަމެއް ހިމެނޭ ވަރުގަދަ އެއްބަސްވުމެއް ކަމަށް ޓްރަމްޕް ވިދާޅުވި އެވެ. މީގެ އިތުރުން، ފާއިތުވި އަހަރުތަކުގައި އިރާނުން އެމެރިކާއަށް ވަރަށް ބޮޑަށް އޮޅުވާލާފައިވާތީ، ބައެއް ފަރާތްތަކުން އެ ގައުމާ މެދު ކަންބޮޑުވުން ފާޅުކުރާ ކަމަށްވެސް ޓްރަމްޕް ފާހަގަކުރެއްވި އެވެ.