އެމެރިކާ އާއި އީރާންގެ މަޝްވަރާތައް ޖެނީވާގައި ކުރިއަށް ގެންދަން ތައްޔާރު ވަނީ

އެމެރިކާ އާއި އީރާންއާ ދެމެދު ކުރިއަށް ގެންދަމުން އަންނަ ނިއުކްލިއާ މަޝްވަރާ ތަކުގެ ބައްދަލުވުން ޖެނީވާގައި ބާއްވަން ތައްޔާރު ވަމުން އަންނަ ކަމަށް ސްވިޒަލެންޑް އިން ބުނެފި އެވެ.

ހޮނިހިރު ދުވަހު ސްވިޒަލެންޑް އިން ބުނެފައި ވަނީ، ޖެނީވާގައި ބައްދަލުވުން ބޭއްވުމަށް ތައްޔާރު ވަމުން އަންނަނީ އޮމާން މެދުވެރި ވެގެންނެވެ. މެދު ކެނޑިފައި އޮތް މަޝްވަރާތައް މި މަހުގެ ކުރީ ކޮޅު ފަށާފައިވާއިރު، ފުރަތަމަ ބުރުގެ މަޝްވަރާތައް ބޭއްވީ އޮމާންގެ ވެރި ރަށުގަ އެވެ. 

ސްވިޒަލެންޑްގެ ފޮރިން މިނިސްޓްރީގެ ތަރުޖަމާނަކު އޭއެފްޕީ އަށް މައުލޫމާތު ދެމުން ބުނެފައި ވަނީ، އެމެރިކާ އާއި އީރާންއާ ދެމެދު ވާހަކަ ދައްކަން ފަސޭހަ ކޮށްދިނުމަށް ސްވިޒަލެންޑް އިން ހުރިހާ ވަގުތެއްގައި ވެސް އޮތީ ތައްޔާރަށް ކަމަށެވެ. އެއާ އެކު، ސްވިޒަލެންޑުގެ ޖެނީވާގައި މަޝްވަރާ ބައްދަލުވުން ކުރިއަށް ގެންދިޔުމަށް ކުރަން ޖެހޭ މަސައްކަތް ކުރަމުން އަންނަ ކަމަށް ވަނީ ހާމަ ކޮށްފަ އެވެ. 

މަޝްވަރާ ތަކުގެ ފުރަތަމަ ބައްދަލުވުމުގައި އީރާންގެ ފަރާތުން ބައިވެރިވެފައި ވަނީ އެ ޤައުމުގެ ފޮރިން މިނިސްޓަރު އައްބާސް އަރާގްޗީ އެވެ. އަދި އެމެރިކާގެ ފަރާތުން ބައިވެރިވެފައި ވަނީ އެ ޤައުމުގެ ރައީސް ޑޮނަލްޑް ޓްރަމްޕްގެ ޚާއްސަ މަންދޫބު ސްޓީވް ވިޓްކޮފް އާއި، ޓްރަމްޕްގެ ދަރިކަލުން ޖެރާޑް ކުޝްނާ އެވެ. އެ މަޝްވަރާ ތަކަށް ފަހު ދެ ޤައުމުން ވެސް ވަނީ އިތުރު މަޝްވަރާ ތަކަށް ތައްޔާރު ކަމަށް ހާމަ ކޮށްފަ އެވެ. 

މަޝްވަރާތައް ކުރިއަށް ގެންދަމުން އަންނައިރު، އެެމެރިކާގެ ރައީސް ޑޮނަލްޑް ޓްރަމްޕް ގެންދަވަނީ އީރާން އަށް އެކި ގޮތް ގޮތުން އިންޒާރުތައް ދެއްވަމުންނެވެ. އެގޮތުން އީރާންއާ ދެކޮޅަށް އަސްކަރީ ބިރު ދެއްކުމާއި، ހަތިޔާރުގެ ބާރު ބޭނުން ކުރާނެ ކަމުގެ އިންޒާރު ތަކުރާރުކޮށް ޓްރަމްޕް ގެންދަވަނީ ދެއްވަމުންނެވެ. 

އެންމެ ފަހުން ހުކުރު ދުވަހު ޓްރަމްޕް ވިދާޅުވެފައި ވަނީ، އީރާންގައި މިހާރު އޮތް ވެރިކަން ބަދަލުވުމަކީ އެ ޤައުމަށް އެންމެ ރަނގަޅު ގޮތް ކަމަށް ވެދާނެ ކަމަށެވެ. އެއާ އެކު، އީރާންއާ ދެކޮޅަށް އަސްކަރީ ބާރު އިތުރު ކުރުމުގެ ގޮތުން އެމެރިކާގެ ދެ ވަނަ އެއާކްރާފްޓް ކެރިއަރު މެދު އިރުމަތީގެ ސަރަހައްދަށް ފޮނުވުމަށް ތައްޔާރު ވަމުން އަންނަ ކަމަށް ވެސް ޓްރަމްޕް ވަނީ އިއުލާން ކުރައްވައިފަ އެވެ. 

ސްވިޒަލެންޑް އިން ވަނީ، އެމެރިކާ އާއި އީރާާންއާ ދެމެދު ޑިޕްލޮމެޓިކް ގުޅުން ދެމެހެއްޓުމުގައި މުހިންމު ދައުރެއް އަދާ ކޮށްފަ އެވެ. ވަކި އަތަކަށް ނުޖެހި، ނިއުޓްރަލް ގޮތެއްގައި އޮންނަ ކަމަށް މަޝްހޫރުވެފައިވާާ ސްވިޒަލެންޑް އިން އީރާން އާއި އެމެރިކާގެ މައްސަލައިގައި ގެން ގުޅެމުން އަންނަނީ މެދު މިނުގެ އުސޫލު ތަކެއް ކަމަށް މާހިރުން ފާހަގަ ކޮށްފައިވެ އެވެ. 

އެމެރިކާ އިން އަންނަނީ އަންނަ ހަފުތާގެ ތެރޭގައި ޖެނީވާގައި ރަޝިޔާ އާއި، ޔޫކްރެއިންއާ ދެމެދު ވެސް ވަކިން ވާހަކަތައް ދެއްކުމަށް ތައްޔާރު ވަމުންނެވެ.