އީރާން އާއި އެމެރިކާ އިން ގެންދަނީ ނިއުކްލިއާ އެއްބަސްވުމަށް ދޫ ދެމުން ކަމަށް ތުރުކީ އިން ބުނެފި

އެމެރިކާ އާއި އީރާން އިން ނިއުކްލިއާ އެއްބަސްވުމަކާ މެދު ދޫދެމުންދާ ކަމަށް ތުރުކީގެ ފޮރިން މިނިސްޓަރު ހަކަން ފިދާން ވިދާޅުވެއްޖެ އެވެ. 

ބުރާސްފަތި ދުވަހު ފައިނޭންޝަލް ޓައިމްސް އަށް ދެއްވި އިންޓަވިޔުއެއްގައި ފިދާން ވިދާޅުވީ، ވަކި މިންވަރަކަށް ޔުރޭނިއަން މުއްސަނދި ކުރުމަށް އީރާން އަށް ފުރުސަތު ދިނުމަށް އެމެރިކާ އިން ބޭނުންވާ ކަމަށް ފެނިވަޑައިގަންނަވާ ކަމަށެވެ. އޭނާ މިހެން ވިދާޅުވެފައި ވަނީ، އެމެރިކާ އާއި، އީރާންއާ ދެމެދު ނުސީދާ މަޝްވަރާތައް ފެށިގެން ކުރިއަށްދާ ދަނޑިވަޅެއްގަ އެވެ.

އެމެރިކާ އާއި އީރާންއާ ދެމެދު ކުރިއަށް ގެންދަމުން އަންނަ މަޝްވަރާ ތަކުގައި ބައިވެރިވެ ވަޑައިގަންނަވާ ފިދާން ވިދާޅުވީ، ކަނޑައެޅިފައިވާ ވަކި އިންތަކެއްގެ ތެރޭގައި އީރާން އަށް ޔުރޭނިއަމް މުއްސަނދި ކުރުމަށް އެމެރިކާ އިން ރުހޭ ކަމަށް ފެނުމަކީ، ރަނގަޅު ފާލެއް ކަަމަށެވެ. އެމެރިކާ އިން މިހާތަނަށް ވަކާލާތު ކޮށްފައި ވަނީ، އީރާން އިން ޔުރޭނިއަމް މުއްސަނދި ކުރުނަށް މުޅިން ހުއްޓާލުމަށެވެ. 

މީގެ އިތުރުން ފިދާން ވިދާޅުވީ، އެމެރިކާ އާއެކު އެއްބަސްވުމަަކށް އަންނަން ޖެހޭ ކަމަށް އީރާން އިން މިހާރު ޤަބޫލު ކުރާ ކަމަށެވެ. އަދި އީރާން އިން ދޫ ނުދޭނެ ވަކި ކަންތައް ތަކެއް ހުރިކަން، އެމެރިކާ އިން ވެސް މިހާރު ޤަބޫލު ކުރާ ކަމަށާއި، އެހެންވެ އީރާން އަށް މަޖުބޫރު ކުރުމަކީ ބޭކާރު ކަމެއް ކަމަށް ފިދާން ވިދާޅުވި އެވެ. 

އެމެރިކާ އާއި އީރާންއާ ދެމެދު މިދިޔަ އަހަރުގެ ތެރޭގައި ފަސް ބުރެއްގެ މަތިން މަޝްވަރާތައް ކުރިއަށް ގެންދިޔައިރު، އެމެރިކާ އިން ބާރު އަޅާފައި ވަނީ އީރާން އިން 60 އިންސައްތައާ ހަމައަށް މުއްސަނދި ކޮށްފައިވާ ޔުރޭނިއަމްގެ ރަސްމީ ރިޒާޒް ދޫކޮށްލުމަށެވެ. މިއީ ނިއުކްލިއާ ހަތިޔާރު އުފެއްދުމަށް ބޭނުންވާ 90 އިންސައްތައިގެ މުއްސަނދިކަމާ ވަރަށް ގާތް މިންވަރެއް ކަމަށް ފާހަގަ ކުރެވެ އެވެ. 

އީރާންގެ ރައީސް މަސްއޫދު ޕެޒެޝްކިއަން ވިދާޅުވެފައި ވަނީ، އެ ޤައުމާ ދެކޮޅަށް އަޅާފައިވާ މާލީ ދަތި ކުރުމުގެ ފިޔަވަޅުތައް އުވާލުމަށް އެދި ވަކާލާތު ކުރަމުން ދާނެ ކަމަށެވެ. ޔުރޭނިއަމް މުއްސަނދި ކުރުން ހިމެނޭހެން ނިއުކްލިއާ ހަކަތަ ބޭނުން ކުރުމުގެ ހައްގުތައް ހޯދުމުގައި އީރާން އިން ސާބިތުވެ އޮންނާނެ ކަމަށް ވެސް ޕެޒެޝްކިއާން ވިދާޅުވެފައިވެ އެވެ. 

ފައިނޭންޝަލް ޓައިމްސް އަށް ފިދާން ވިދާޅުވެފައި ވަނީ، އީރާން އިން ހަގީގީ އެއްބަސްވުމަކަށް އަންނަ އިޚުލާސްތެރިކަމާ އެކު ބޭނުންވާ ކަމަށް އޭނާ އަށް ޤަބޫލު ކުރެވޭ ކަމަށެވެ. އަދި 2015 ވަނަ އަހަރު އެމެރިކާ އާއި، އެހެނިހެން ބާރު ތަކާ އެކު އެއްބަސްވުމަކަށް އައި ފަދައިން، ޔުރޭނިއަމް މުއްސަނދި ކުރުމާއި، އެ މިންވަރު ހިފެހެއްޓުމަށާއި، އަދި ހަރުކަށި އިންސްޕެކްޝަން ނިޒާމަކަށް އީރާން އިން އެއްބަސް ވާނެ ކަމަށް ވެސް އޭނާ ވިދާޅުވި އެވެ. 

އެމެރިކާ އާއި އީރާންއާ ދެމެދު މަޝްވަރާތައް ފަށާފައިވާއިރު، ދެ ޤައުމުން ވެެސް ވަނީ މަޝްވަރާ ތަކާ މެދު އުންމީދު ފާޅު ކޮށްފަ އެވެ. އަދި މަޝްވަރަތާއް ކުރިއަށް ގެންދެވޭނެ ކަމަށް ދެ ޤައުމުގެ އޮފިޝަލުން ވެސް ވަނީ ހާމަކޮށްފަ އެވެ.