ފަހު ވަގުތު ބުރުން ވިކްޓަރީއާ އެއްވަރު ކޮށްފި

މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ބުރު ސްޕޯޓްސް ކުލަބާއި، ވިކްޓަރީ ސްޕޯޓްސް ކުލަބު ބައްދަލު ކުރި މެޗު އެއްވަރު ވެގެން ނިމިއްޖެ އެވެ.

ހުކުރު ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ނިމުނީ ދެ ޓީމު 1-1 އިން އެއްވަރު ވެގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ވިކްޓަރީ އިންނެވެ. ނަމަވެސް، މެޗުގެ ފަހު ވަގުތުގައި ލަނޑު ޖަހައިގެން ބުރުން ވަނީ ވިކްޓަރީއާ އެއްވަރު ކޮށްފަ އެވެ.

މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން މިނެޓަކަށް ވެފައި ވަނިކޮށް ވިކްޓަރީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ބިދޭސީ ކުޅުންތެރިޔާ މިލޯސް ލެޗްނީ އެވެ. އެއާއެކު، ވިކްޓަރީ އިން މެޗުގެ ފުރަތަމަ ހާފު ނިންމާލީ ލީޑުގައި އޮވެގެންނެވެ. 

ދެ ވަނަ ހާފަށް ނިކުމެ ވިކްޓަރީ އިން ލީޑު ފުޅާ ކުރުމަށް މަސައްކަތް ކުރިއިރު، ބުރުން ވަނީ ނަތީޖާ ހަމަހަމަ ކުރުމަށް މަސައްކަތް ކޮށްފަ އެވެ. މެޗުގެ ނަތީޖާ ހަމަހަމަ ކުރުމަށް ބުރުން ކުރި މަސައްކަތް ކާމިޔާބު ކުރެވުނީ މެޗުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށެވެ. އެއީ ޢަބްދުﷲ ޔާމީން ޖެހި ލަނޑުންނެވެ. 

ވިކްޓަރީ އަތުން ހޯދި ޕޮއިންޓާ އެކު، މިވަގުތު ބުރު އޮތީ ލީގު ތާވަލްގެ ތިން ވަނަ މަގާމުގަ އެވެ. އެއީ މިހާތަނަށް އެ ޓީމު ކުޅެފައިވާ 15 މެޗުން 27 ޕޮއިންޓާ އެކު އެވެ. ހަތަރު ވަނައިގައި އޮތް ނިއު ރޭޑިއަންޓް ސްޕޯޓްސް ކުލަބަށް 27 ޕޮއިންޓު ލިބެނީ 14 މެޗުންނެވެ. ނަމަވެސް، މެޗުގެ އަދަދު ހަމަކޮށް، އަލުން ތިން ވަނަ އަށް ޖެހިލުމުގެ ފުރުސަތު ނިއު ރޭޑިއަންޓް އަށް އޮންނާނެ އެވެ.

ލީގުގައި މިހާތަނަށް ކުޅެފައިވާ 15 މެޗުން 21 ޕޮއިންޓާ އެކު ވިކްޓަރީ އޮތީ ހަ ވަނަ މަގާމުގަ އެވެ.