ވިކްޓަރީ އަތުން މޮޅުވެ، އޮޑިން ދެ ވަނަ މަގާމު ދަމަހައްޓައިފި

ދިރާގު ދިވެހި ޕްރިމިއާ ލީގުގައި ވިކްޓަރީ ސްޕޯޓްސް ކުލަބާ ދެކޮޅަށް ކުޅުނު މެޗުން މޮޅުވެ، އޮޑި ސްޕޯޓްސް ކުލަބުން އެ ޓީމުގެ ފޯމުގައި މަގާމު ދަމަހައްޓައިފި އެވެ.

ހުކުރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު އޮޑިން ކާމިޔާބު ކުރީ 3-0 އިންނެވެ. މެޗުގައި އޮޑިން އެ ޓީމުގެ ތިން ލަނޑު ވެސް ޖެހީ މެޗުގެ ފުރަތަމަ ހާފުގަ އެވެ. މެޗުގެ ދެ ވަނަ ހާފުގައި ވެސް އެ ޓީމުން ވަނީ ރަނގަޅަށް ކުޅެ، ލަނޑު ޖަހަން ފުރުސަތު ތަކެއް ތަނަވަސްކޮށްފަ އެވެ.

މެޗު ފަށައިގެން 13 ވަނަ މިނެޓުގައި އޮޑި އަށް ލީޑު ނަގައިދިނީ އެ ޓީމުގެ ބިދޭސީ ކުޅުންތެރިޔާ، ކިއާނޫ މާޝް ބްރައުން އެވެ. އެ ލަނޑު އޭނާ ޖެހީ އަޙުމަދު އައިހަމް ތަނަވަސްކޮށްދިން ފުރުސަތެއްގަ އެވެ. އޭގެ ފަސް މިނެޓު ފަހުން، ޢަބްދުﷲ ލޫތު އިބްރާހީމް ވަނީ އޮޑީގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އަދި މެޗުގެ ފުރަތަމަ ހާފުގެ ފަހު ވަގުތުގައި މުޒުދާން ޙަސަން ވަނީ އޮޑީގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ. 

މޮޅާއެކު އޮޑިން ވަނީ ދެ ވަނައިގައި ފަސް ޕޮއިންޓުގެ ލީޑެއް ނަގައިފަ އެވެ. އެގޮތުން މިހާތަނަށް ލީގުގައި ކުޅެފައިވާ 16 މެޗުން އޮޑި އަށް ލިބެނީ 38 ޕޮއިންޓެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޮތް ނިއު ރޭޑިއަންޓް ސްޕޯޓްސް ކުލަބަށް ލިބެނީ 33 ޕޮއިންޓެވެ. އެއް ވަނައިގައި މާޒިޔާ ސްޕޯޓްސް އެންޑް ރެކްރިއޭޝަން އަށް ލިބެނީ 44 ޕޮއިންޓެވެ.