ވިކްޓަރީ ބަލިކޮށް، މާޒިޔާގެ ރެކޯޑު ކުރިއަށް

މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ވިކްޓަރީ ސްޕޯޓްސް ކުލަބާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އިން އެއް ވަަނައިގައި ލީޑު ފުޅާ ކޮށްފި އެވެ. 

ހޮނިހިރު ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު މާޒިޔާ އިން ކާމިޔާބު ކުރީ 3-0 އިންނެވެ. މެޗުގައި މާޒިޔާ އިން އެ ޓީމުގެ ތިން ލަނޑު ވެސް ޖެހީ މެޗުގެ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގައި ދެ ޓީމުގެ ފަރާތުން ވެސް ދާދި ހަމަހަމަ ކުޅުމެއް ފެނުނުއިރު، ދެ ޓީމަށް ވެސް ލަނޑު ޖަހަން ފުރުސަތު ލިބުނެވެ. ނަމަވެސް، ފުރުސަތުގެ ބޭނުން ނުކުރެވި ފުރަތަމަ ހާފު ނިމުނީ އެއްވެސް ލަނޑެއް ނުފެނި އެވެ. 

މެޗުގެ ދެ ވަނަ ހާފު ފަށައިގެން ދިހަ ވަނަ މިނެޓުގައި މާޒިޔާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އަޙުމަދު އައިހަމް އެވެ. އޭގެ ހަތް މިނެޓު ފަހުން މާޒިޔާ އަށް ލިބުނު ޕެނަލްޓީ ކާމިޔާބުކޮށް، ލީޑު ފުޅާ ކޮށްދިނީ ހަމްޒާ މުޙައްމަދު (ހަމްޕު) އެވެ. މެޗުގައި މާޒިޔާގެ ތިން ވަނަ ލަނޑު މެޗގެ 68 ވަނަ މިނެޓުގައި ޖެހީ ޒުވާން ކުޅުންތެރިޔާ މުޙައްމަދު އިލާން އިމްރާން އެވެ. އެއީ މާޒިޔާ އަށް ލިބުނު ހިލޭ ޖެހުމެއްގައި ހަމްޕު ފޮނުވާލި ބޯޅަ، ވިކްޓަރީގެ ކީޕަރުގެ އަތުގައި ޖެހިފައި ރީބައުންސް އަށް އައި ވަގުތު، ގޯލަށް ފޮނުވާލައިގެން އިލާން ޖެހި ލަނޑެކެވެ. 

މޮޅާއެކު މާޒިޔާ އިން ވަނީ އެއް ވަނައިގައި 11 ޕޮއިންޓުގެ ލީޑެއް ނަގައިފަ އެވެ. އެއީ މިހާތަނަށް ލީގުގައި ކުޅެފައިވާ 14 މެޗުން 40 ޕޮއިންޓާ އެކު އެވެ. މި ސީޒަންގެ ލީގުގައި މާޒިޔާ އިން މޮޅު ކުޅުމެއް ދައްކަމުން އަންނައިރު، 13 މެޗުން އެ ޓީމު ވަނީ މޮޅުވެފަ އެވެ. އަނެއް މެޗު އެއްވަރުވެފައިވާއިރު، އެއްވެސް މެޗަކުން މާޒިޔާ ބަލިވެފައި ނުވެ އެވެ. 

މާޒިޔާގެ ފަހަތުން ދެ ވަނައިގައި އޮތީ އޮޑި ސްޕޯޓްސް ކުލަބެވެ. އެއީ މިހާތަނަށް ކުޅެފައިވާ 13 މެޗުން 29 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ތިން ވަަނައިގައި ނިއު ރޭޑިއަންޓް ސްޕޯޓްސް ކުލަބަށް ލިބެނީ 24 ޕޮއިންޓެވެ.