ވެލެންސިއާ އަތުން ބުރަށް ހަތަރު ލަނޑުގެ މޮޅެއް

މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ކުލަބު ވެލެންސިއާއާ ދެކޮޅަށް ކުޅުނު މެޗުން މޮޅުވެ، ބުރު ސްޕޯޓްސް ކުލަބުން ގަދަ ހަތަރެއްގެ އުންމީދު ދަމަހައްޓައިފި އެވެ.

އާދީއްތަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ބުރުން ކާމިޔާބު ކުރީ 4-1 އިންނެވެ. މެޗުގެ ފުރަތަމަ ހާފުގައި ވެލެންސިއާ އިން ލަނޑު ޖަހައި ލީޑު ނަގާފައި ވަނިކޮށް، ބުރުން ވަނީ ފަހަތުން އަރައި ދެ ލަނޑު ޖަހައިގެން ލީޑު ނަގައިފަ އެވެ. މެޗުގައި ބުރުގެ އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 27 ވަނަ މިނެޓުގައި ޙަސަން ނަވާޒު ޖެހި ލަނޑާ އެކު، ވެލެންސިއާ އިން ވަނީ ލީޑު ނަގައިފަ އެވެ. ނަމަވެސް، އޭގެ ހަތަރު މިނެޓު ފަހުން ބުރަށް ލިބުނު ޕެނަލްޓީ ކާމިޔާބުކޮށް ނަތީޖާ ހަމަހަމަ ކޮށްދިނީ މުޙައްމަދު ނާއިމް އެވެ. އެއީ ވެލެންސިއާގެ އޭރިޔާ ތެރެއިން އެ ޓީމުގެ ކުޅުންތެރިޔެއްގެ އަތުގައި ބޯޅަ ޖެހުމުން ދިން ޕެނަލްޓީ އެކެވެ.

އޭގެ ފަހުން މެޗުގެ 37 ވަނަ މިނެޓުގައި ބުރުގެ ދެ ވަނަ ލަނޑު ޖަހައި ލީޑު ނަގައިދިނީ ބިދޭސީ ކުޅުންތެރިޔާ ޑިއަވަންޑޫ ނިއަންގް ޑިއާނޭ އެވެ. މެޗުގެ ދެ ވަނަ ހާފުގައި ޑިއާނޭ ވަނީ އިތުރު ލަނޑެއް ވެސް ޖަހައި، ބުރަށް ތިން ލަނޑުގެ ލީޑެއް ހޯދައިދީފަ އެވެ. އަދި މެޗުގައި ބުރުގެ ހަތަރު ވަނަ ލަނޑު، 75 ވަނަ މިނެޓުގައި ޖެހީ ޢަބްދުﷲ ޔާމީން އެވެ.

މި ނަތީޖާއާ އެކު ބުރު އޮތީ ލީގު ތާވަލްގެ ހަތަރު ވަނަ މަގާމުގަ އެވެ. އެއީ މިހާތަނަށް ލީގުގައި ކުޅެފައިވާ 14 މެޗުން 26 ޕޮއިންޓާ އެކު އެވެ. މިފަހަރުގެ ލީގުގައި ހަތް މެޗުން ބުރު މޮޅުވެފައިވާއިރު، ދެ މެޗުން ވަނީ އެއްވަރުވެ އަދި އަނެއް ހަތަރު މެޗުން ވަނީ ބަލިވެފަ އެވެ.