ރައީސް މުއިއްޒަކީ ހިސާބު ޖައްސަވާފައި ވައުދުވެވަޑައިގަންނަވާ ބޭފުޅެއް ނޫން، 2025 ގެ ވައުދުތައް ފުއްދުމަށް އެކަނި ވެސް 200 ބިލިއަނަށް ވުރެ ގިނަ ރުފިޔާ ބޭނުންވާނެ: މެންބަރު ޝަމްހީދު
ރައީސް ޑރ. މުއިއްޒު ވެވަޑައިގަންނަވާ ވައުދުތަކަކީ އެއްވެސް ދިރާސާއެއްގެ މައްޗަށް ބިނާވެފައިވާ ކަންކަން ނޫން ކަމަށް ވިދާޅުވެ، ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު ސަރުކާރަށް ވަރަށް ބޮޑަށް ފާޑުވިދާޅުވި. ސަރުކާރުގެ ކުންފުނިތައް ބޮޑު ގެއްލުމުގައި ހިންގަމުންދާއިރު، ރިޔާސީ ބަޔާނުގައިވާ ވައުދުތައް ފުއްދުމަށް އެކަނިވެސް 200 ބިލިއަނަށް ވުރެ ގިނަ ރުފިޔާ ބޭނުންވާނެ ކަމަށް އޭނާ ފާހަގަކުރެއްވި. މީގެ އިތުރުން، މި ސަރުކާރުން މަސައްކަތް ކުރަނީ ހަގީގީ ނަތީޖާ ދެއްކުމުގެ ބަދަލުގައި 2028 ވަނަ އަހަރުގެ އިންތިޚާބަށް އަމާޒުކޮށްގެން ކަމަށްވެސް ޝަމްހީދު ވިދާޅުވި.
ރާއްޖެޓީވީގެ ޓީވީޓޯކް ޕްރޮގްރާމްގައި ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު ވާހަކަ ދައްކަވަނީ | ރާއްޖެއެމްވީ
ރައީސް ޑރ.މުހައްމަދު މުއިއްޒަކީ ހިސާބު ޖައްސަވާފައި ވައުދުވެވަޑައިގަންނަވާ ބޭފުޅެއް ނޫން ކަމަށާއި، 2025 ވަނަ އަހަރުގެ ވައުދުތައް އެކަނި ފުއްދުމަށް ވެސް 200 ބިލިއަނަށް ވުރެ ގިނަ ފައިސާ ބޭނުންވާނެ ކަަމަށް ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު ވިދާޅުވެއްޖެ އެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި މެންބަރު ޝަމްހީދު ވަނީ ރައީސް މުއިއްޒު ވެވަޑައިގެންނެވި ވައުދުތަކަށް އިޝާރާތް ކުރައްވައި ވަރަށް ބޮޑަށް ފާޑު ވިދާޅުވެފަ އެވެ. އެންމެ ފަހުން އިއްވެވި ރިޔާސީ ބާޔަނަކީ ވެސް ރިޔާސީ ބަޔާނެއްގައި ހުންނަން ޖެހޭ ހުރިހާ ސިފަތަކެއް ކަނޑުވާލާފައިވާ ބަޔާނެއް ކަމަށް އޭނާ ވިދާޅުވި އެވެ.
މެންބަރު ޝަމްހީދު ވިދާޅުވީ 2026 ވަނަ އަހަރުގެ ރިޔާސީ ބަޔާނުގައި ރިސޯޓުތަކެއް ތަރައްގީކޮށް، ރައްޔިތުންނަށް ހިއްސާ ބަހައި، ޑޮލަރުން ފައިސާ ބަހަން ރައީސް މުއިއްޒު ވައުދުވެވަޑައިގެންނެވި ނަމަވެސް އެ އުސޫލުން އެކަން ނުކުރެވޭނެ ކަމަށެވެ. 2026 ގެ ރިޔާސީ ބަޔާނުގައި 2025 ވަނަ އަހަރުގެ ރިޔާސީ ބަޔާނުގައި ކުރާނެ ކަމަށް ވައުދުވެވަޑައިގެންނެވި ކަންކަމުގައި ފަހުގެ މައުލޫމާތު ހިއްސާ ކުރަން ޖެހޭނެ ކަމަށާއި، ނަމަވެސް އެފަދަ އެއްވެސް މައުލޫމާތެއް ހިމަނާފައިނުވާ ކަމަށް މެންބަރު ޝަމްހީދު ވިދާޅުވި އެވެ.
މެންބަރު ޝަމްހީދު ވިދާޅުވީ 2025 ވަނަ އަހަރުގެ ރިޔާސީ ބަޔާނުގައި އެމަނިކުފާނު ވެވަޑައިގެންނެވި ވައުދުތައް ފުއްދުމަށް އެކަނި ވެސް 200 ބިލިއަނަށް ވުރެ ގިނަ ރުފިޔާ ބޭނުންވާނެ ކަމަށެވެ. އަދި ރައީސް މުއިއްޒުގެ އިތުރުން މިސަރުުކާރުގެ ވަޒީރު ބޭފުޅުން ވެސް ކަމެއް ކުރާއިރު، އެއީ ވާނެ ކަމެއްތޯ ނުވަތަ ނޫން ބަލައި އިތުރަށް ދިރާސާ ނުކުރާ ކަަމަށެވެ.
މީގެ އިތުރުން މެންބަރު ޝަމްހީދު ވިދާޅުވީ މިސަރުކާރުން އިތުރު ކުންފުނިތައް ހެދުމުގެ މަސައްކަތް ކުރާއިރު، މިހާރު ވެސް ސަރުކާރު ހިއްސާވާ ކުންފުނިތައް ހިންގަމުންދަނީ ގެއްލުމުގައި ކަމަށާއި، އެކުންފުނިތަކުން ރައްޔިތުންނާއި ގައުމަށް ފައިދާއެއް ނުވާ ކަމަށެވެ.
2025 ވަނަ އަހަރުގެ ރިޔާސީ ބަޔާނުގައިވި ވައުދުތައް އަޅުގަނޑު ގޭގައި އިދެގެން ވަރަށް ކުޑަކުޑަ ކޮށް ހިސާބު ޖެހިން މަތިމަތިން. 200 ބިލިއަން ރުފިޔާއަށް އަރާ. 2025 ގެ ހުރިހާ ވައުދެއް އެއްކޮށްލާއިރު. މިސަރުކާރުގެ އެއްވެސް ވައުދަކީ މިއަދާ ހަމައަށް އެބޭފުޅުންގެ ބަޔާންތަކާއި ޖަލްސާތަކުގައި ދައްކާ އެއްވެސް ވާހަކައެއް އެއްވެސް އިޝާރާތެއް ނުކުރާނެ އަދަދުތަކަށް. މި ފަންޑު ކުރާނެ ގޮތެއް މިއީ ކޮންތާކު ކިހިނެއް ހޯދާ ފައިސާއެއް ކަމެއް. މިއީ ފީސިބަލް ކަމެއް ތޯ ނޫންތޯ. ދެން އަޅުގަނޑު ރޭގައި ޖަލްސާގައި ބުނިން މިދިޔަ އަހަރު 2025 ވަނަ އަހަރު ނިމުނުއިރު ހަގީގަތުގައި ސަރުކާރު ކުންފުނިތަކަށް ބަޖެޓު ދޭން ޖެހުނު 6.2 ބިލިއަން ރުފިޔާ. އެއީ ދިވެހިރާއްޖޭގެ އާބާދީގެ ކޮންމެ މީހެއްގެ ބޮލަކަށް ސާދަސަތޭކަ ޑޮލަރު މިކޮޅުން އެކޮޅަށް މިދިޔައީ. ސަރުކާރުން ކުންފުނި ހިންގައިގެން ރައްޔިތަކަށް މިއަދު ފައިދާއެއް އަދި ނެތް ވެފައި. އާރްޑީސީގެ މިދިޔަ އަހަރު ތިން މަހުގެ ގެއްލުމުގެ ކަވަރު ކުރުމަށް 250 މިލިއަން. އާރްޑީސީއަށް އެކަނި. ތިން މަހަށް.ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު
މެންބަރު ޝަމްހީދު ވިދާޅުވީ ރައީސް މުއިއްޒާއި، ޕީއެންސީން މިހާރު ވެސް މަސައްކަތް ކުރަމުން ދަނީ 2028 ގެ ރިޔާސީ އިންތިޚާބަށް ކަމަށެވެ. އަދި 2030 ވަނަ އަހަރުގެ ތަސައްވުރު މިހާރު ވެސް ރައްޔިތުންނަށް ދައްކަމުން ދަނީ އެބޭނުމުގައި ކަމަށް އޭނާ ވިދާޅުވި އެވެ. ނަމަވެސް މާޒީގައި ކަންކަން ހިނގާފައިވާ ގޮތް ރައްޔިތުން ބަލަން ޖެހޭ ކަމަށާއި، ގެއްލުމާއި ފައިދާ ރައްޔިތުންނަށް މިހާރު ފެންނަމުންދާ ކަމަށް މެންބަރު ޝަމްހީދު ވިދާޅުވި އެވެ.
