އިންޑިއާ އެމްބަސީ އިން ބަޖެޓް ހަމަޖައްސަދިން، މަނަދޫ މަލްޓިޕަރޕަސް ސްޕޯޓްސް ކޮމްޕްލެކްސް މަޝްރޫއުގެ ހާލަތު ސާފުނުވޭ: ކައުންސިލް

ނިމިދިޔަ އެމްޑީޕީގެ ސަރުކާރުގައި އިންޑިއާ އެމްބަސީގެ ހިލޭ އެހީގެ ދަށުން ނ. މަނަދޫގައި ބިނާކުރުމަށް ބަޖެޓު ހަމަޖައްސާފައިވާ މަލްޓިޕަރޕަސް ސްޕޯޓްސް ކޮމްޕްލެކްސްގެ މަޝްރޫއަށް، ސަރުކާރު ބަދަލުވި ފަހުން ވީގޮތެއް ސާފުނުވާ ކަމަށް އެ ރަށު ކައުންސިލް މެމްބަރު މޫމިނާ ސޯލިހް ވިދާޅުވެއްޖެ އެވެ.

ރާއްޖެ އެމްވީ އަށް މައުލޫމާތު ދެއްވަމުން މޫމިނާ ވިދާޅުވީ، މި މަޝްރޫއަކީ ރަށުގެ ޒުވާނުންނަށް ވަރަށް މުހިންމު މަޝްރޫއެއް ނަމަވެސް، މިހާރު އެ މަސައްކަތް އޮތް ހިސާބެއް ކައުންސިލަށް ސާފުނުވާ ކަމަށެވެ.

މޫމިނާ ވިދާޅުވި ގޮތުގައި، މަނަދޫގައި މަލްޓިޕަރޕަސް ސްޕޯޓްސް ކޮމްޕްލެކްސްއެއް އިމާރާތްކުރުމަށް ބޭނުންވާ ފަންޑު އިންޑިއާ އެމްބަސީ މެދުވެރިކޮށް ހަމަޖައްސައިދިނީ ނިމިދިޔަ ސަރުކާރުގަ އެވެ. ނަމަވެސް، އެ މަސައްކަތް ކުރުމަށް އޭރު އިއުލާނު ކުރުމުން ކުންފުނިތަކުން ހުށަހެޅި އަގުތައް، ލިބިފައިވާ ބަޖެޓަށް ވުރެ ބޮޑުވުމުގެ ސަބަބުން މަސައްކަތް ފެށުން އޭރު މަޑުޖެހުނީ ކަމުގަ އެވެ.

މި މަޝްރޫއާ ގުޅޭގޮތުން 2025 ވަނަ އަހަރު މަނަދޫ ކައުންސިލުން މިނިސްޓަރު ރާފިއު އާއި ބައްދަލުކޮށް ސުވާލުކުރުމުން، އެ މަސައްކަތް އަދިވެސް ކުރިއަށް ގެންދެވޭނެ ކަމުގެ ޔަގީންކަން މިނިސްޓަރު ދެއްވި ކަމަށް މޫމިނާ ވިދާޅުވި އެވެ. އެގޮތުން ލިބިފައިވާ ބަޖެޓާ އެއްވަރަށް މަޝްރޫއުގެ ސްކޯޕް ކުޑަކުރުމަށްފަހު އަލުން މަސައްކަތް ފަށާނެ ކަމަށް މިނިސްޓްރީން ބުނެފައިވާ ކަމަށާއި، އެކަމަށް ބޭނުންވާ ބިން ކަނޑައަޅައި މިހާރު މިނިސްޓްރީއާ ހަވާލުކޮށްފައިވާނެ ކަމަށް ވެސް އޭނާ ފާހަގަކުރެއްވި އެވެ.

ސްޕޯޓްސް ކޮމްޕްލެކްސްގެ މަސައްކަތް ފެށޭނެ އަލިމަގެއް ނުފެނި އޮތްއިރު، މި ސަރުކާރުން ވަނީ މަނަދޫގައި ފިޓްނެސް ސެންޓަރެއް އިމާރާތްކުރުމުގެ މަސައްކަތް ފަށާފައި ކަމަށް މޫމިނާ ވިދާޅުވި އެވެ. ނަމަވެސް އެ ފިޓްނެސް ސެންޓަރު ނިންމުމަށް ސަރުކާރުން ދިން މުއްދަތު ހަމަވާން ކައިރިވެފައި ވާއިރު، އެތަނުގެ މަސައްކަތް ވެސް އެކަށީގެންވާ ބާރުމިނެއްގައި ކުރިއަށް ނުދާކަން މޫމިނާ ފާހަގަކުރެއްވި އެވެ.

ރައީސް ޑރ. މުހައްމަދު މުއިއްޒުގެ ވެރިކަމަށް ދެ އަހަރު ފާއިތުވެގެން ގޮސްފައިވާއިރު، ރާއްޖޭގެ ގިނަ ރަށްތަކެއްގައި ތަރައްގީގެ މަޝްރޫއުތައް އެކަށީގެންވާ ގޮތެއްގައި ކުރިއަށް ނުދާކަމުގެ ޝަކުވާ އާންމުން ދަނީ ކުރަމުންނެވެ. ހާއްސަކޮށް ނިމިދިޔަ އެމްޑީޕީ ސަރުކާރުން ރަށްރަށުގައި ފަށާފައިވާ އުމްރާނީ ތަރައްގީގެ ގިނަ މަޝްރޫއުތަކެއް މިހާރު ހުއްޓިފައި ނުވަތަ މަޑުޖެހިފައިވާކަން ގިނަ ބަޔަކު ފާހަގަކުރެ އެވެ.

އަތޮޅުތަކުގެ ރަށްރަށުގައި އަސާސީ ހިދުމަތްތައް ގާއިމްކޮށް، ރައްޔިތުންގެ ދިރިއުޅުމުގެ ފެންވަރު މަތިކުރުމަށްޓަކައި ކުރީ ސަރުކާރުން ގިނަ މަސައްކަތްތަކެއް ފަށާފައިވީ ނަމަވެސް، މި ސަރުކާރުން އެ މަޝްރޫއުތައް ކުރިއަށް ގެންދިއުމުގައި ލަސްތަކެއް އުޅޭތީ ރައްޔިތުންގެ މެދުގައި ވަނީ ކަންބޮޑުވުން އުފެދިފަ އެވެ.