މިހާރު ދާ ގޮތަށް ކަންކަން ދާ ނަމަ ޚަރަދު ކުޑަ ކުރުމުގެ ނަމުގައި ރާއްޖެ އަށް އިލެކްޓްރޯނިކް ވޯޓިން ގެންނާނެ، މިކަމަށް ހޭލާ ތިބެން ޖެހޭ: ޑރ.ޝަމްހީދު
ޚަރަދު ކުޑަކުރުމުގެ ނަމުގައި އިންތިޚާބުތައް އެއްކޮށްލުމަށް ސަރުކާރުން ހުށަހެޅި ހުށަހެޅުމަކީ، ކުރިމަގުގައި އިލެކްޓްރޯނިކް ވޯޓިން ތައާރަފުކޮށް ވެރިކަން ދަންމާލުމަށް ރޭވިގެން ކުރާ ކަމެއް ކަމަށް މެންބަރު އަހުމަދު ޝަމްހީދު ތުހުމަތު ކުރެއްވި.
ރައްޔިތުންގެ މަޖިލީހު ގެ ހުޅުމާލޭ ދެކުނު ދާއިރާގެ މެންބަރު އަހުމަދު ޝަމްހީދު | ވީޑިއޯ ސްކްރީން ޝޮޓް
މިހާރު ދާ ގޮތަށް ކަންކަން ދާ ނަމަ ޚަރަދު ކުޑަ ކުރުމުގެ ނަމުގައި ރާއްޖެ އަށް އިލެކްޓްރޯނިކް ވޯޓިންގެ ނިޒާމް ގެންނާނެ ކަމަށާއި، މިކަމަށް ހޭލާ ތިބެން ޖެހޭ ކަމަށް ރައްޔިތުންގެ މަޖިލީހު ގެ ހުޅުމާލޭ ދެކުނު ދާއިރާގެ މެންބަރު އަހުމަދު ޝަމްހީދު ވިދާޅުވެއްޖެ އެވެ.
އޭނާ އެފަދައިން ވިދާޅުވީ އެމްޑީޕީ ޕީޖީ އިން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުންނެވެ.
ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއްކޮށްލުމަށް ސަރުކާރުން މަޖިލީހަށް ހުށަހެޅީ އެއީ ޚަރަދުކުޑަ ކުރުމަށް ކުރި ކަމެއްގެ ގޮތުގައި ދައްކައިގެން ކަމަށް ޑރ.ޝަމްހީދު ވިދާޅުވި އެވެ. މިއަދު އިންތިޚާބުތައް އެއްކޮށްލަނީ ޚަރަދުކުޑަކުރުމަށް ކަމަށް ރައްޔިތުން ބަލައިގަނެފި ނަމަ ދެން ފެންނާނީ ޚަރަދު ކުޑަކުރުމަށް ކަމަށް ބުނެ އިތުރު ބަދަލުތައް ވޯޓުލުމުގެ ނިޒާމަށް ގެންނަ މަންޒަރު ކަމަށް ވެސް އޭނާ ވަނީ ވިދާޅުވެފަ އެވެ.
"ޚަރަދު ކުޑަކުރުމުގެ ބޭނުމުގައި ކަމަށް މިކަން ކުރަނީ ރައްޔިތުން ބަލައިގަނެފި ނަމަ ދެން ރައްޔިތުންގެ ކުރިމައްޗަށް ގެންނާނީ އިލެކްޓްރޯނިކް ވޯޓިން. ރަށަކަށް ދާކަށް ވެސް ނުޖެހޭނެ. ކަރުދާހެއް ވެސް ޕްރިންޓް ކުރާކަށް ނުޖެހޭނެ. ބަޓަނަކަށް ފިއްތާލީމަ އެސްޓޯނިއާގައި ހުންނަތަނަކުން ނަތީޖާ ނިކުމެގެން އަންނާނީ." ޝަމްހީދު ވިދާޅުވި އެވެ.
މިހާރު ވެސް އެހެން އެއްވެސް ޕާޓީ އެއްގެ ބައިވެރިވުމެއް ނެތި ދިގު މުއްދަތުގެ ތަރައްޤީގެ ޕްލޭން އެއް ސަރުކާރުން އެކުލަވާލަމުންދާ ކަމަށް ޝަމްހީދު ވިދާޅުވި އެވެ. އެ ޕްލޭން ތަންފީޒްކުރަން އިތުރު ދައުރެއް ބޭނުންވާނެ ކަމަށް ސަރުކާރުން ބުނާނެ ކަމަށް ވެސް އޭނާ ވިދާޅުވި އެވެ. ސަރުކާރުން އެކަން އެގޮތަށް ކުރަމުން ދަނީ 20 އަހަރަށް ވެރިކަން ދަންމާލުމުގެ ވިސްނުން ސަރުކާރުގެ ކިބައިގައި ހުރުމުން ކަަމަށް ޝަމްހީދު ވަނީ ވިދާޅުވެފަ އެވެ. އެ ހުރިހާ ކަމެއް ވެސް ކުރަމުން ދަނީ ވަރަށް ބޮޑަށް ރޭވިގެން ކަމަށް އޭނާ ވަނީ ވިދާޅުވެފަ އެވެ.
ޝަމްހީދު ވަނީ އިންތިޚާބުތައް އެއްކޮށްލުމާއި މެދު އާއްމުންގެ ވޯޓެއް ނަގާ ނަމަ އާއްމުން ނުކުމެ އެކަމަށް ނޫނެކޭ ބުނަން ޖެހޭ ކަމަށް ވިދާޅުވެފަ އެވެ. ރައްޔިތުން 5 އަހަރުގެ ދައުރަކަށް މީހުން އިންތިޚާބު ކުރުން އެ ދައުރު ކުރުކޮށް ދިގުކޮށް ހެދުމަކީ އެއީ އެހެން ބަޔަކަށް ކުރެވިގެން ވާނެ ކަމެއް ނޫން ކަމަށް އޭނާ ވިދާޅުވި އެވެ.
