ސަރުކާރަށް މެޖޯރިޓީ ދީފިއްޔާ ކައުންސިތައް އުވާލާނެ: ޣަފޫރު

ކައުންސިލުތަކުގެ މެޖޯރިޓީ ރައީސް ޑރ. މުހައްމަދު މުއިއްޒުގެ ސަރުކާރަށް ލިބިއްޖެނަމަ ރާއްޖޭގެ ހުރިހާ ކައުންސިލެއް އުވާލާނެ ކަމަށް ހަނިމާދޫ ދާއިރާގެ މެންބަރު އަދި އެމްޑީޕީގެ ޗެއަރޕާސަން އަބްދުލްޣަފޫރު މޫސާ ވިދާޅުވެއްޖެ އެވެ. 

ލޯކަލް ކައުންސިލް އިންތިހާބުގެ ކެމްޕޭން ލޯންޗު ކުރުމަށް ބޭއްވި ޖަލްސާއެއްގައި ވާހަކަދައްކަވަމުން ޣަފޫރު ވިދާޅުވީ މިއީ އެމްޑީޕީއަށް ވޯޓުލާން ލިބޭ އެންމެ ފަހު ފުރުސަތު ކަމަށެވެ.

ޣަފޫރު ވިދާޅުވީ ރައްޔިތުންނަށް އޮޅުވާލައިގެން ދޮގާ މަކަރާ ހީލަތް ހެދުން ނޫން އެއްވެސް ކަމެއް މި ސަރުކާރުން ނުކުރާ ކަމަށެވެ. އެމްޑީޕީގެ ވެރިކަމުގައި 9000 ފުލެޓް އެޅުމާއި 9000 ގޯތި މާލެއިން ދިނުމާއި ހުޅުމާލެއާއި ގުޅީފަޅާއި އުތުރުތިލަފަޅުން 40563 ގޯތި ދޭން ނިންމާފައިވާ ކަމަށް އޭނާ ފާހަގަކުރެއްވި އެވެ.

ރައީސް މުއިއްޒު ވިދާޅުވި ގޯތިތައް ކޮބައިތޯ ސުވާލުކުރައްވަމުން ޣަފޫރު ވިދާޅުވީ އެ ގޯތިތައް ނުދޭހާ ހިނދަކު މާލެއާއި ދިވެހިރާއްޖޭގެ ރައްޔިތުން މި ސަރުކާރަށް ވޯޓުދޭކަށް ނުޖެހޭނެ ކަމަށެވެ. އެމްޑީޕީގެ ވެރިކަމުގައި ހުޅުމާލެއިން 1350 ގޯތި ކަނޑާފައި ދީފައިވާ ކަމަށާއި އަދިވެސް ގޯތި ކަނޑާނެ ބިން އޮންނަ ކަމަށް އޭނާ ވިދާޅުވިއެވެ.

އެއީ ރިޔާސީ ވަޢުދެއް. އެ ވަޢުދުގެ މަތީގައި މި ސަރުކާރު އައީ. ކީއްވެގެންތޯ ވަޢުދު ނުފުއްދުނީ؟ އަޅުގަނޑުމެން 1350 ގޯތި ކަނޑާފައި ހުޅުމާލެއިން ދިނީމޭ. އަދިވެސް އޮންނާނެ ގޯތި ކަނޑާނޭ ބިން. ކީއްވެގެންތޯ ގޯތި ކަނޑާފައި ދޭން ނުކެރިގެންތިޔުޅެނީ؟ އަޅުގަނޑުމެން އަޑުއެހީމޭ މި ސަރުކާރަށް ނިސްބަތްވާ ބޭފުޅުން ރައްޔިތުންގެ މަޖިލީހުގައި ވާހަކަދެއްކިއިރުގައި، ދައުލަތަށް ވީ ގެއްލުމުގެ ވާހަކަ ދައްކައި، މާލިއްޔަތު ކޮމިޓީއަށް ހުށަހަޅައިގެން ވީ ގެއްލުމުގެ އޮޑިޓު ހަދާ ވާހަކަ މި ބޭފުޅުން ދެއްކި ވާހަކަ. އެ ވޯޓެއް މިހާރުވެސް އެ މައްސަލަ މާލިއްޔަތު ކޮމިޓީގައި ދައުލަތަށް ވީ ގެއްލުމުގެ އޮޑިޓު ހެދުމުގެ ވާހަކަ މި ބޭފުޅުން ހުށަހަޅާފަ. މާލޭގެ ރައްޔިތުން ނުކުމެ ރޮއިއާދޭސްކުރީމާ މިއަދު މިއިން އެއްވެސް ބޭފުޅަކަށް ނުކެރުނޭ އެ ވާހަކަ ދައްކާކަށް.

ހަނިމާދޫ ދާއިރާގެ މެންބަރު އަދި އެމްޑީޕީގެ ޗެއަރޕާސަން އަބްދުލްޣަފޫރު މޫސާ 

އޭނާ ވިދާޅުވީ މިހާރުގެ ސަރުކާރުން ރައްޔިތުންނަށް ކޮންކަމެއްތޯ ކޮށްދެވުނީ ސުވާލުކުރައްވަމުން އޭނާ ވިދާޅުވީ ކަނާތުންނާއި ވާތުންނާއި ވައްކަންކުރުން ނޫން އެހެން ކަމެއް ނުކުރެވުނު ކަމަށެވެ. ޣަފޫރު ވިދާޅުވީ ސަރުކާރަށް ކައުންސިލުތަކުގެ މެޖޯރިޓީ ދިނުމުން ރާއްޖޭގެ ހުރިހާ ކައުންސިލެއް އުވާލާނެ ކަމަށް މިއަދު ޔަޤީންވާ ކަމަށެވެ. ރައްޔިތުންގެ މަޖިލީހުގެ ސުޕަރ މެޖޯރިޓީ ދިނުމުން ލާމަރުކަޒީ ގާނޫނު ފުނޑާލި ކަމަށް ފާހަގަކުރައްވަމުން އޭނާ ވިދާޅުވީ މިއީ އެމްޑީޕީއަށް ވޯޓުލާން ލިބޭ އެންމެ ފަހު ފާހަގަ ކަމަށެވެ.

ކުރަން މި އުޅެނީ ކޮންކަމެއް. މި ކައުންސިލުތައް މި ސަރުކާރަށް ދީފިއްޔާ އެ ބޭފުޅުން ބޭނުންކޮށްގެން ހުރިހާ ކައުންސިލެއް އުވާލާނީ. އެނޫން އެހެން ކަމެއް މި ބޭފުޅުން ނުކުރާނެ. ރައްޔިތުންގެ މަޖިލީހުގެ ސުޕަރ މެޖޯރިޓީ ދިނީމާ، މާލިއްޔަތު ދިނީމާ ލާމަރުކަޒީ ގާނޫނު ފުނޑާލީ، އެއީ މި ބޭފުޅުންނަކީ. އެހެންވީމާ، މި ބޭފުޅުންނަށް ކައުންސިލުގެ މެޖޯރިޓީ ދީފިއްޔާ ރާއްޖޭގެ ހުރިހާ ކައުންސިލެއް އެ ބޭފުޅުން ލައްވާ މި ބޭފުޅުން އުވާލާނެ. އެއީ އަޅުގަނޑުމެންނަށް މިއަދު ޔަޤީންވާ ކަމަކީ. އަނެއް ކަމަކީ، މި ސަރުކާރަށް އަޅުގަނޑުމެން ކައުންސިލުތަކުގެ މެޖޯރިޓީ ދީފިއްޔާ ދެން އަޅުގަނޑުމެންނާ ވޯޓެއްގައި ލާ ފާހަގައެއް އަޅުގަނޑުމެންނަކަށް ނުފެންނާނެ. މިއީ އަޅުގަނޑުމެންނަށް ވޯޓުލާން ލިބޭ އެންމެ ފަހު ފާހަގައެއް. މި ފާހަގަ އަޅުގަނޑުމެން މި ސަރުކާރަށް އާއެކޭ ބުނެފިއްޔާ، ވަލްޙަމްދުލިއްލާހި! މި ޤައުމުން ވޯޓުލިނުމުގެ ހުރިހާ ކަމެއް ނިމިދިޔައީ. އެގޮތަކަށް ދޫކޮށްގެންނުވާނެ. 

ހަނިމާދޫ ދާއިރާގެ މެންބަރު އަދި އެމްޑީޕީގެ ޗެއަރޕާސަން އަބްދުލްޣަފޫރު މޫސާ 

ޣަފޫރު ވިދާޅުވީ މި ޤައުމަށް ޑިމޮކްރަސީ ގެނައުމަށްޓަކައި ޕީއެންސީ މީހެއްގެ ގައިން ހެއްލިދާކޮޅެއް ނޯންނާނެ ކަމަށެވެ. އަދި މިއަދު ނުކުމެ މި ޑިމޮކްރަސީގެ ވާހަކަ ދައްކަން ސަރުކާރު ލަދުގަންނަންޖެހޭނެ ކަމަށާއި، މި ސަރުކާރަކީ ޙުދުމުޚްތާރު ވެރިކަމެއް ކުރަން ވިސްނުމުގައި އުޅޭ ބައެއް ކަމަށް ޣަފޫރު ވިދާޅުވި އެވެ. 

އޭނާ ވިދާޅުވީ ޑިމޮކްރަސީގެ ނަން ބޭނުންކޮށްގެން މި ޤައުމު ހަލާކުކޮށް، ފަސާދަކުރަމުންދާ ކަމަށާއި، ރައްޔިތުންނަށް ހަދަނީ ދޮގު ކަމަށެވެ.