އެމްޑީޕީ ވެރިކަމުގައި ނެތް ކޮންމެ ދަނޑިވަޅެއްގައި ރާއްޖޭގެ މުސްތަގްބަލް ނިގުޅައިގަންނަން އުޅޭ "ޕައިރެޓުން"ތަކެއް ތިބޭ: ތިނަދޫ މޭޔަރު
އެމްޑީޕީން ބޭއްވި "ހޭވައްލާ ތައްޔާރު" ޖަލްސާގައި ތިނަދޫ މޭޔަރު ސައުދު އަލީ ވިދާޅުވީ، މި ސަރުކާރުން ކައުންސިލްތަކުގެ ބާރުތައް ނިގުޅައިގަނެ އިނދަޖައްސާލާފައިވާ ކަމަށް.
ތިނަދޫގެ މޭޔަރ ސައުދު އަލީ ހޭވައްލާ ތައްޔާރު ޖަލްސާގައި ވާހަކަދައްކަވަނީ. | ސްކްރީން އިމޭޖް
އެމްޑީޕީ ވެރިކަމުގައި ނެތް ކޮންމެ ދަނޑިވަޅެއްގައި ރާއްޖޭގެ މުސްތަގްބަލް ނިގުޅައިގަންނަން އުޅޭ "ޕައިރެޓުން"ތަކެއް ތިބޭ ކަމަށް ތިނަދޫގެ މޭޔަރ ސައުދު އަލީ ވިދާޅުވެއްޖެ އެވެ.
ސައުދު އެފަދައިން ވިދާޅުވީ އެމްޑީޕީ އިން ލޯކަލް ކައުންސިލް އިންތިޚާބުގެ ކެމްޕެއިން ލޯންޗްކުރުމަށް އާޓީފިޝަލް ބީޗް ސަރަހައްދުގައި ހުކުރުވިލޭރޭ ބޭއްވި "ހޭވައްލާ ތައްޔާރު" ޖަލްސާގައި ވާހަކަދައްކަވަމުންނެވެ.
ރައްޔިތުން އެދޭ ހެޔޮ ބަދަލުތައް ރައްޔިތުންނަށް ގެނެސްދީފައި ވަނީ އެމްޑީޕީ އިން ވީ ގުރުބާނީގެ ސަބަބުން ކަމީ ދެބަސް ވެވެން ނެތް ހަގީގަތެއް ކަމަށް ސައުދު ވިދާޅުވި އެވެ. އެމްޑީޕީ ރާއްޖޭގެ ވެރިކަމުގައި ނެތް ކޮންމެ ފަހަރަކު ރައްޖޭގެ މުސްތަގްބަލް ނިގުޅައިގަންނަން މަސައްކަތް ކުރާ ބަޔަކު ތިބި ކަމަށް ވެސް ސައުދު ވިދާޅުވި އެވެ.
"މުސްތަގްބަލް ނިގުޅައިގަންނަން އުޅޭ ޕައިރެޓުންތަކެއް. ވަގުންތަކެއް އެބަ ތިބި. މިކަމާއި ދެކޮޅަށް ތެދުވަން ޖެހޭ." ސައުދު ވިދާޅުވި އެވެ.
ސައުދު ވަނީ ކައުންސިލް އިންތިޚާބުގައި އެމްޑީޕީ އަށް ކުރި ލިބޭނެ ކަމަށް ޤަބޫލުކުރެވޭތީ އެމްޑީޕީ ކެނޑިޑޭޓަށް ތާއީދު ކުރާ މީހުންގެ ވަޒީފާ ބަދަލުކޮށް، ވަޒީފާ ގެ ބިރު ދައްކަމުންދާ ކަމަށް ވެސް ވިދާޅުވެފަ އެވެ. ހަމަ އެހެންމެ، ދަރިންނާއި ދަރިންގެ ދަރީންގެ މުސްތަގްބަލަށްޓަކައި ތެދުވެ އެކުގައި އެމްޑީޕީ އިން މަސައްކަތް ކުރަން ޖެހޭ ކަމަށާއި، ކުރިއަށް އޮތް ކައުންސިލް އިންތިޚާބުގައި އެމްޑީޕީ އަށް އާއްމުން ވޯޓު ދޭން ޖެހޭ ކަމަށް ސައުދު ވިދާޅުވި އެވެ.
ސައުކާރުން ވަނީ ރަށްރަށުގެ ކައުންސިލްތައް އިނދަ ޖައްސާ ބާރުތައް ނިގުޅައިގަނެފައި ކަމަށާއި އެކަން ބަދަލުކުރަން ލިބޭ ފުރުސަތަކީ ކުރިއަށް އޮތް ކައުންސިލް އިންތިޚާބު ކަމަށް ސައުދު ވަނީ ވިދާޅުވެފަ އެވެ. އެމްޑީޕީގެ ވެރިކަމެއްގައި ލާމަރުކަޒީ ނިޒާމަށް އަލުން ބާރުވެރިކަން ހޯދާދޭނެ ކަމަށް ސައުދު ވިދާޅުވި އެވެ.
