ޕީއެންސީ މެންބަރުން އެމްޑީޕީ މެންބަރުންނަށް "ލާދީނީ" ކިޔަސް ކުރެވޭނެ ކަމެއް ނެތް: އަބްދުއްރަހީމް
މިސްކިތްތަކަށް ގެއްލުން ދިނުމަކީ ޓެރަރިޒަމްގެ އަމަލެއްގެ ގޮތުގައި ކަނޑައެޅުމަށް އެމްޑީޕީން ހުށަހެޅި ބިލުގެ ބަހުސްގައި، ސަރުކާރު ހިންގާ ޕީއެންސީގެ މެންބަރުން އެމްޑީޕީއަކީ "ލާދީނީ" ފިކުރުގެ ބައެއް ކަމަށް ބުނެ ބަހުގެ ހަމަލާތައް އަމާޒުކޮށްފި. މިކަމާ ގުޅިގެން އިދިކޮޅު މެންބަރުން ކަންބޮޑުވުން ފާޅުކުރެއްވުމުން، މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ އެފަދަ ވާހަކަތައް ހުއްޓުވޭނީ ގާނޫނެއް ފާސްކޮށްގެން ކަމަށާއި، މިހާރު އޮތް ގޮތުން އެކަން ހުއްޓުވުމަށް ރިޔާސަތަށް ކުރެވޭނެ ކަމެއް ނެތް ކަމަށް.
ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ. | ރާއްޖެއެމްވީ
ރައްޔިތުންގެ މަޖިލީހުގެ ތަޅުމުގައި އިދިކޮޅު އެމްޑީޕީ މެންބަރުންނަށް ނިސްބަތް ކޮށް ސަރުކާރު ހިންގާ ޕީއެންސީ މެންބަރުން "ލާދީނީ" ޓެގު އެޅުވި ނަމަވެސް އެކަން ހުއްޓުވުމަށް ކުރެވޭނެ ކަމެއް ނެތް ކަމަށް މަޖިިލީހުގެ ރައީސް އަބްދުއްރަހީމް އަބްދުއްﷲ ވިދާޅުވެއްޖެ އެވެ.
ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި ވަނީ މިސްކިތްތަކަށް ގެއްލުން ދިނުމަކީ ޓެރަރިޒަމްގެ އަމަލެއްގެ ގޮތުގައި ކަނޑައެޅުމަށް ޓެރަރިޒަމް މަނާކުރުމުގެ ގާނޫނަށް ގަލޮޅު އުތުރު ދާއިރާގެ އިދިކޮޅު އެމްޑީޕީ މެންބަރު މުހައްމަދު އިބްރާހިމް (ކުޑޫ) ހުށަހެޅުއްވި ބިލުގެ ބަހުސް ފަށާފަ އެވެ.
އެ ބިލަށް ބަހުސް ކުރައްވަމުން ސަރުކާރު ހިންގާ ޕީއެންސީ ގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު ވަނީ ތަކުރާރު ކޮށް އެމްޑީޕީ މެންބަރުންނަށް ނިސްބަތްކޮށް އެ މެންބަރުންނަކީ "ލާދީނީ" ފިކުރުގެ ބައެއް ކަމަށް ވިދާޅުވެފަ އެވެ.
އެމްޑީޕީ އަކީ އަބަދުވެސް ލާދީނީ ފިކުރުގެ ބައެއް. އެމީހުންގެ ވާހަކަތަކުން، އެމީހުންގެ ވެރިންގެ ވާހަކަތަކުން މިހާރުވެސް ހުންނާނެ. މިއީ އަޅުގަނޑު ދައްކާ ވާހަކަތަކެއް ނޫން. އޯޑިއޯތަކާ ވީޑިއޯތަކުން ފެންނަން ހުންނާނެ،ޕީއެންސީ ގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު
ބިލަށް ބަހުސް ކުރެެއްވުމުގެ ބަދަލުގައި މެންބަރު ފަލާހުގެ ވާހަކައިގައި މުޅިން ވެސް ވިދާޅުވީ އެމްޑީޕީ އަކީ އިސްލާމް ދީނާ ދުރު ޕާޓީ އެއް ކަމަށެވެ. އަދި ބިލަށް ބަހުސް ކުރުމަށް ދިން ވަގުތު ޖުމްލަކޮށް ބޭނުން ކޮށްފައިވަނީ އެމްޑީޕީގެ ކުރީގެ ވެރިންނާ މިހާރުގެ ވެރިންގެ ވާހަކަ ދެއްކެވުމަށެވެ.
މެންބަރު ފަލާހުގެ ވާހަކައާ ގުޅިގެން ކަނޑިތީމު ދާއިރާގެ މެންބަރު އަމީން ފައިސަލްގެ އިތުރުން ވައިކަރަދޫ ދާއިރާގެ މެންބަރު ހުސައިން ޒިޔާދު ވެސް ވަނީ ކަންބޮޑުވުން ފާޅު ކުރައްވާފަ އެވެ.
އެއަށްފަހު ބިލު ހުށަހެޅުއްވި މެންބަރު ވެސް ވަނީ އެކަމުގެ ކަންބޮޑުވުން ފާޅުކުރައްވާފަ އެވެ. ރިޔާސަތުގައި ކުޑޫ އެދިވަޑައިގެންފައި ވަނީ އެމްޑީޕީ މެންބަރުންނަކީ "ލާދީނީ" މީހުންގެ ގޮތުގައި ލޭބަލް ކޮށް، އެ ޓެގް އެޅުވުން ހުއްޓުވައިދިނުމަށެވެ.
މިއީ އަނގަ ހައްދު ޖަހަން ޖެހޭ ދީނުން ބޭރުވާ ކަހަލަ ވާހަކަ އެކަކު އަނެކަކާ ދިމާލަށް ގޮވުން، ވަރަށް އިހުތިރާމާއެކު ދަންނަވަން އެކަން ހުއްޓުވައިދެއްވާށޭ، އަޅުގަނޑުމެން ވެސް ފެންނަ ތަންތަނުން ތި ބޭފުޅުން ވެސް ފެންނާނީ. އަޅުގަނޑުމެން ބޮލުގައި ކެނޑިނޭޅި ތި އިލްޒާމު އަޅުވާ ކަމަށްވަންޏާ އަޅުގަނޑުމެންނަށް ލިބިދާނެ ގެއްލުމަކަށް ވެސް ތި ބޭފުޅުން ޒިންމާވާން ޖެހޭނެ.ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ)
މެންބަރު ކުޑޫ ކަންބޮޑުވުން ފާޅުކުރެއްވުމުން ރިޔާސަތުގައި އިންނެވި ޕީއެންސީ ގެ މެމްބަރު މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ އެކަމުގައި ރިޔާސަތަށް ކުރެވޭނެ ކަމެއް ނެތް ކަމަށެވެ. އަދި އެކަން ހުއްޓުވަން ބޭނުން ނަމަ ޖެހޭނީ ގާނޫނެއް ފާސް ކުރަން ކަމަށް އަބްދުއްރަހީމް ވިދާޅުވި އެވެ.
ލާދީނީ ކިޔާ ކިޔުން ހުއްޓުވަން މި ތަނުން ގާނޫނެއް ފާސްކޮށްފިއްޔާ ދެން އެކަން ހުއްޓުވިދާނެ. އެހެން ނޫނީ މިހާރު އޮތްގޮތުން އަޅުގަނޑަކަށް އެކަން ހުއްޓުވެނެ ގޮތެއް ނެތް.މަޖިލީހުގެ ރައީސް އަބްދުއްރަހީމް އަބްދުﷲ
އެއަށްފަހު ވެސް ފަލާހު ވަނީ ތަކުރާރުކޮށް ފުރުސަތު ނަންގަވައިގެން އެމްޑީޕީ މެންބަރުންނަކީ ދީނާ ދުރު "ލާދީނީ" ފިކުރުގެ ބައެއް ކަމަށް ވިދާޅުވެފަ އެވެ. އެއީ ކަން އޮތް ގޮތް ކަމަށާ އެކަން އެމްޑީޕީ އިން ބޭނުން ވިޔަސް ނުފޮރުވޭނެ ކަމަށް ފަލާހު އެކި ފަހަރު މަތިން ވިދާޅުވި އެވެ.
ފަލާހުގެ އިތުރުން ވެސް ޕީއެންސީ އިން ބަހުސްގައި ބައިވެރިވެވަޑައިގެން ވާހަކަދެއްކެވި ހުރިހާ މެންބަރުން ވެސް ވަނީ އެފަދަ ބަހުގެ ހަމަލާތައް އެމްޑީޕީ މެންބަރުންނަށް ރައްދު ކޮށްފަ އެވެ. ޕީއެންސީ އިން ބިލަށް ބަހުސް ކުރުމުގެ ބަދަލުގައި މުޅިން ވެސް ދެއްކެވީ އެމްޑީޕީ މެންބަރުންގެ ވާހަކަ އެވެ.
