މިއަދު ވޯޓެއް ނެގިޔަސް, ޑރ. މުއިއްޒު އަށް ވުރެ ގިނަ ވޯޓު މޭޔަރު އާތިފް ހޯއްދަވާނެ: ނިޔާޒު

ކުޅުދުއްފުށި ސިޓީގައި ވެރިޔަކަށް ހުރި ބޭފުޅާގެ މައްޗަށް ވަކި ޑރ. މުޢިއްޒު އަކަށްވެސް އަމުރެއް ނުހިންގޭނެ ކަމަށާއި, މިއަދު ވޯޓެއް ނެގިޔަސް ވެސް ޑރ. މުޢިއްޒު އަށް ވުރެ ގިނަ ވޯޓު އެ ސިޓީގެ މޭޔަރު މުޙައްމަދު އާތިފް ހޯއްދަވާނެ ކަމަށް ރައްޔިތުންގެ މަޖިލީހުގެ ހުޅުމާލޭ ދާއިރާގެ ކުރީގެ މެންބަރު އަލީ ނިޔާޒު ވިދާޅުވެއްޖެ އެވެ.

ނިޔާޒު މިފަދައިން ވިދާޅުވީ އަންގާރަ ދުވަހުގެރޭ ލޯކަލް ކައުންސިލް އިންތިޚާބަށް ތައްޔާރުކުރާ މެނިފެސްޓޯގެ ތަނބުތަކުގެ ތެރެއިން އެއް ތަނބު ކަމަށްވާ "ވިޔަފާރިއަށް ފަހި" އިފްތިތާޙްކުރުމަށް ކުޅުދުއްފުށި ސިޓީ އަދި މާލޭގައި ބޭއްވި ޖަލްސާގަ އެވެ.

އަންގާރަ ދުވަހުގެ ރޭ ބޭއްވި އެ ޖަލްސާގައި ވާހަކަފުޅު ދައްކަވަމުން ނިޔާޒު ވިދާޅުވީ, ކުޅުދުއްފުށި ސިޓީގެ ތަރައްޤީ އަށް މިދިޔަ ދެ އަހަރު ތެރޭގައި ގިނަ ކަންތައްތަކެއް ކޮށްދެއްވާފައި ނުވިޔަސް, އެ ސިޓީގެ އިޤުތިޞާދު ހިފަހައްޓައި, ހުއްޓުނަ ނުދިޔުމަށްޓަކައި, އެ ސިޓީގެ މޭޔަރާއި ރައްޔިތުން ކުރި މަސައްކަތަކީ ލާމަރުކަޒީ ނިޒާމަށް ބަލައިގެން ހޯދި ވަރަށް ބޮޑު ކުރިއެރުމެއް ކަމަށެވެ.

މިގޮތުން މައި ސަރުކާރަށް ބަރޯސާނުވެ, ކަންކަން ހިންގޭނެކަން ސާބިތުކޮށްދެއްވާފައިވާއިރު, ކުރިއަށް އޮތް ދައުރުގައިވެސް އެ ސިޓީގެ ކަންކަން ހިންގުމަށްޓަކައި މޭޔަރު އާތިފް އިންތިޚާބު ކުރައްވައި އެ ސިޓީގެ ތަރައްޤީ ބާރު ދުވެލީގައި ކުރިއަށް ދާނެކަމަށް ނިޔާޒު ވިދާޅުވެފައިވެ އެވެ.

އަދި ނިޔާޒު ވަނީ, ލާމަރުކަޒީ ނިޒާމަށް ގެނައި 16 ވަނަ އިސްލާހާއެކު ކުޅުދުއްފުށި ސިޓީގެ ތަރައްޤީގެ ޕްލޭން މަޑުޖައްސައި ހިފަހައްޓައި, އެ ސިޓީގެ ލާމަރުކަޒީ ތަރައްޤީއަށް ހުރަސް އަޅާފައިވަނީ ރައީސް ޑރ. މުއިއްޒު ކަމަށް ވިދާޅުވެފަ އެވެ.

މީގެ އިތުރުން ޤާނޫނު އަސާސީގައި ރަށްތައް ހިންގުމަށްވަނީ ލާމަރުކަޒުކޮށް ކަމަށާއި, ދިވެހިރާއްޖޭގައި އޮންނަންވާނީ ރިޔާސީ ނިޒާމެއް ކަމާއި, ދިވެހިރާއްޖެ ހިންގަން ޖެހޭނީވެސް ލާމަރުކަޒީ އުސޫލަކުން ކަމަށާއި, މިގޮތުން ލާމަރުކަޒީ އުސޫލުން ހިންގުމަށް އެކަން ކުރަން ޖެހޭނީ ސަރުކާރުން އައްޔަނުކުރާ ވެރިން ނޫންކަމަށް ޤާނޫނުގައި އަސާސީގައި ވަރަށް ސާފުކޮށް ބުނެފައިވާ ކަމަށް ނިޔާޒު ފާހަގަކުރައްވާފައިވެ އެވެ.

މިފަދައިން ފާހަގަކުރައްވަމުން މެންބަރު ނިޔާޒު ވިދާޅުވީ, ކުޅުދުއްފުށީގެ ވެރިޔަކަށް ހުރި ބޭފުޅާގެ މައްޗަށް ވަކި ޑރ. މުޢިއްޒު އަކަށްވެސް އަމުރެއް ނުހިންގޭނެކަމަކީ ޤާނޫނު އަސާސީ ދަންނަ ކަމެއް ކަމަށެވެ.

އަޅުގަނޑަށް ހަމަ ޔަގީން މިއަދު ވޯޓެއް ނެގިޔަސްވެސް ޑރ މުޢިއްޒު އަށް ވުރެއް ގިނަ ވޯޓު ޢާޠިފް ހޯއްދަވާނެ. މިރަށުން ހޯއްދަވާނެ. އެއީ މި ނިޒާމު އެތުރިފަ އޮތް ގޮތަކީ, އެހެންވީމަ ދެ ފަށަރަލަ އަކަށް މި ހިނގަނީ. އެއީ, މައި ސަރުކާރުން މުޅި ރާއްޖޭގެ ރައްޔިތުން އިންތިޚާބުކޮށްފަ ހުންނެވި ރައީސުލްކުމްހޫރިއްޔާ އަކާއި, އަދި އެ ރަށެއްގެ ކަންކަން ބެލެހެއްޓުމަށްޓަކައި އެ ރަށުގެ ރައްޔިތުން އިންތިހާބުކޮށްފަ ހުންނަ ވެރިއެއް. މިއީ މި ނިޒާމު ހިނގާ ގޮތަކީ.

މެންބަރު އަލީ ނިޔާޒު ވިދާޅުވެފައިވެއެވެ.

އަންގާރަ ދުވަހުގެ ރޭ ކުޅުދުއްފުށި ސިޓީ އަދި މާލޭގައި ބޭއްވި ޖަލްސާ ގައި އެމްޑީޕީގެ ރައީސް އަބްދުالله ޝާހިދު އާއި ޗެއަރޕަރސަން މެންބަރު އަބްދުލް ޣަފޫރު މޫސާ އަދި ކުޅުދުއްފުށި ސިޓީ, މާލެ ސިޓީ, ތިނަދޫ ސިޓީގެ މޭޔަރުންނާއި, ރައްޔިތުންގެ މަޖިލީހާއި ޤައުމީ މަޖިލީހުންގެ މެންބަރުންގެ އިތުރުން ލޯކަލް ކައުންސިލް އިންތިޙާބުގައި ވާދަކުރާ ކެނޑިޑޭޓުން ބައިވެރިވެވަޑައިގެންފައިވެ އެވެ.