މޭޔަރު އާޒިމް މެމްބަރު ސައުދާ އަށް: ﷲ ގަންދީ ހުވައި ކޮށްގެން ހުންނަވާ، ދީނާއި މުގައްދަސް ބިނާތަކާ ގުޅުވައިގެން އިތުރުފުޅު ނުހައްދަވާ!
މިސްކިތްތަކާއި ދީނީ ކަންކަމާ ގުޅުވައިގެން އިތުރުފުޅު ނުހެއްދެވުމަށް ގޮވާލައްވަމުން، މިސްކިތްތަކަށް ބޭނުންވާ މުވައްޒަފުން ނެގުމަށް މުއިއްޒުގެ ސަރުކާރުން ހުރަސްއަޅަމުންދާކަމަށް މޭޔަރު ވަނީ ވިދާޅުވެފައި. އަދި މިސްކިތްތަކުގެ ކަންކަން އެންމެ ރަނގަޅަށް ބަލަހައްޓަނީ މިހާރުގެ ކައުންސިލުންކަން ފާހަގަކުރެއްވި.
މާލެ ސިޓީ ކައުންސިލްގެ މޭޔަރ އާދަމް އާޒިމް. | ރާއްޖެ އެމްވީ
މާލެ ސިޓީގެ މިސްކިތްތަކުގައި މަސައްކަތް ކުރައްވާ ފަރާތްތަކާއި ގުޅުވާ މާލެ ސިޓީ މޭޔަރު އާދަމް އާޒިމް އާއި ބެހޭގޮތުން ރައްޔިތުން މަޖިލީހުގެ މެންބަރު ސައުދާ ދެއްކެވި ވާހަކަ އަށް ހޫނު ރައްދެއް ދެއްވައިފި އެވެ.
މާލެ ސިޓީ ކައުންސިލްގެ މޭޔަރު މިސްކިތްތަކުގައި މަސައްކަތްކުރާ ފަރާތްތަކަށް ކުރާ އުނދަގޫތައް ހުއްޓާލަންޖެހޭ ކަމަށް ވިދާޅުވެ ބުދަ ދުވަހު ރައްޔިތުން މަޖިލީހުގައި ދެއްކެވި ވާހަކަ އަށް ރައްދު ދެއްވާ އެކްސް ގައި ކުރެއްވި ޕޯސްޓެއްގައި މޭޔަރު އާޒިމް ވިދާޅުވީ، މާތްﷲ ގަންދީ ހުވާކޮށްގެން ތިއްބަވައި، ދީނާއި މުގައްދަސް ބިނާތަކާ ގުޅުވައިގެން އިތުރުފުޅު ހައްދަވަން ފެއްޓެވުމަކީ ރައްޔިތުންނަށް އޮޅޭނެ ކަމެއް ނޫން ކަމަށެވެ. އަދި މެޗު ނުފެށެނީސް ތިޔަ ނެންގެވީ 'ފަހު ކާޑު' ކަމަށް އާޒިމް ވިދާޅުވި އެވެ.
ރައްޔިތުންގެ އިތުބާރަކީ ކުޅޭކުޅޭ އެއްޗަކަށް ނަހައްދަވާ! ﷲ ތިޔަބޭފުޅުންނަށް ހެޔޮ މަގު ދައްކަވައި، ފާފަ ފުއްސަވާށި. އާމީންމާލެ ސިޓީ މޭޔަރު އާދަމް އާޒިމް
މީގެ އިތުރުން މިދިޔަ މަހު އެމްޑީޕީ އިން ބޭއްވި ހަރުގެ ޖަލްސާއެއްގައި ވާހަކަ ދައްކަވަމުން އާޒިމް ވިދާޅުވީ، މިސްކިތްތަކަށް ބޭނުންވާ މުވައްޒަފުން ނެގުންވެސް މިސަރުކާރުން ހުއްޓުވާފައިވާކަމަށެވެ. އަދި މިސްކިތްތަކަށާއި ދީނީ ކަންކަމަށް އެންމެ ބޮޑަށް އިސްކަންދީފައިވަނީ އެމްޑީޕީގެ ވެރިކަމުގައި ކަމަށާއި އަދި އެމްޑީޕީ އަށް ނިސްބަތްވާ މޭޔަރެއްގެ ގޮތުން އޭނާ ގެ މޭޔަރު ކަމުގައި ކަމަށް އާޒިމް ވިދާޅުވި އެވެ.
އެދުވަހުގެ ޖަލްސާގައި އާޒިމް ވިދާޅުވީ މިހާރުގެ ރައީސުލްޖުމްހޫރިއްޔާ މާލެ ސިޓީ މޭޔަރު ކަމުގައި ހުންނެވި އިރު މިސްކިތްތަކާ މެދު ވަރަށް އިހާނެތިކޮށް ކަންތައް ކުރެއްވި ކަމަށެވެ. އެގޮތުން މިސްކިތްތައް ސާފު ކުރަން ބޭރު މީހުން މަގުމަތިން ނަގާފައިވާކަމަށް އާޒިމް ވިދާޅުވި އެވެ. އެހެން ނަމަވެސް މިހާރު މަސައްކަތްތައް ކުރަމުން ދަނީ ހުސް ދިވެހިން ލައިގެން ކަން އާޒިމް ފާހަގަ ކުރެއްވި އެވެ.
