ވެރިކަން ބަދަލުވި އިރު ފިނިޝިންގ މަސައްކަތް ކުރަމުން ދިޔަ މަނަދޫ ސްކޫލުގެ 3 ބުރީގެ އިމާރާތުގެ ބޭނުން ކުރެވޭނެ ގޮތެއް އަދިވެސް ނުވޭ
ނ. މަނަދޫ ސްކޫލުގެ ޖާގައިގެ ދަތިކަން ހައްލުކުރުމަށް އިމާރާތްކުރާ ތިން ބުރީގެ އިމާރާތުގެ މަސައްކަތް ފިނިޝިން މަރުހަލާގައި އޮތް ނަމަވެސް، އެ މަސައްކަތް ނުނިމި ދިގުލައިގެންދާތާ އެތައް ދުވަހެއް ވަނީ ވެފައި. ކޮންޓްރެކްޓަރަށް ފައިސާ ނުލިބޭތީ މަސައްކަތް ހުއްޓިފައިވާ ކަމަށް ބުނާއިރު، ސަރުކާރުން ބުނަނީ ފައިސާގެ ކަންކަން ހަމަޖެހިފައިވާ ކަމަށް. މި މަޝްރޫއު ނުނިމި ލަސްވުމުގެ ސަބަބުން މިއަހަރުގެ ދިރާސީ އާ އަހަރަށް އިމާރާތް ބޭނުންކުރަން ފެށޭގޮތް ވަނީ ނުވެފައި.
މަނަދޫ ސްކޫލުގައި ރައީސް ސޯލިހުގެ ސަރުކާރުގައި އިމާރާތް ކުރަން ފެށި 3 ބުރީގެ އިމާރާތް. | ރާއްޖެ އެމްވީ
ވެރިކަން ބަދަލުވި އިރު ފިނިޝިންގ މަސައްކަތް ކުރަމުން ދިޔަ މަނަދޫ ސްކޫލުގެ 3 ބުރީގެ އިމާރާތުގެ މަސައްކަތް ހުއްޓިފައި ހުންނަތާ 2 އަހަރަށްވުރެ ގިނަ ދުވަސްވެއްޖެ އެވެ.
ރާއްޖެޓީވީ އަށް މައުލޫމާތު ދެއްވަމުން މަނަދޫ ކައުންސިލް މެންބަރު މޫމިނާ ސޯލިހު ވިދާޅުވީ އެ އިމާރާތަކީ ކުރީގެ ރައީސް އިބްރާހިމް މުހައައްދު ސޯލިހުގެ ސަރުކާރުގައި ސްކޫލުގެ ޖާގައިގެ ދަތިކަން ހައްލުކުރުމަށްޓަކައި ކުރިއަށް ގެންދިޔަ މަޝްރޫއެއް ކަމަށެވެ. އަދި މި މަސައްކަތުގައި ހިމެނެނީ ޖާގައިގެ ދަތިކަން ހައްލު ކުރުމަށް އިމާރާތް ކުރަމުންދިޔަ 3 ބުރީގެ އިމާރާތެއް ކަމަށާއި، އެތަނުގައި ކްލާސްްރޫމުގެ އިތުރުން ސައިންސްލެބާއި ލެބޯޓަރީ ހިމެނޭ ކަމަށެވެ.
މޫމިނާ ވިދާޅުވީ ރައީސް ސޯލިހުގެ ވެރިކަން ނިމި ރައީސް ޑރ. މުހައްމަދު މުއިއްޒު ވެރިކަމާއި ހަވާލުވި އިރު، އިމާރާތުގައި ކުރަމުންދިޔައީ ފިނިޝިންގ މަސައްކަތް ކަމަށެވެ.
މި ޕްރޮޖެކްޓުގެ މުއްދަތަކަށް ދިނީ އެއް އަހަރު ދުވަސް. މިކަން ހަވާލުކުރީ ސްވިފްޓް އިންޖިނިއަރިން. ސަރުކާރު ހަވާލުވި އިރު ގާތްގަނޑަކަށް ފިނިޝިންގެ މަސައްކަތް ކުރަމުން ދިޔައީ.މަނަދޫ ކައުންސިލް މެންބަރު މޫމިނާ ސޯލިހު
މުއުމިނާ ވިދާޅުވީ އަދިވެސް މަސައްކަތް އެއްކޮށް ނުނިމޭ ކަމަށާއި، ކުދިކުދި މަސައްކަތް އަދިވެސް ކުރަމުން އަންނަ ކަމަށެވެ. އޭނާ ވިދާޅުވީ މި އަހަރުގެ ދިރާސީ އަހަރު ފެށެންވާއިރަށް އިމާރާތުގެ މަސައްކަތް އެއްކޮށް ނިންމާ ބޭނުން ކުރެވެނޭ ކަމަށް އުއްމީދު ކުރި ކަމަށާއި، ނަމަވެސް ކައުންސިލުން މައުލޫމާތު ސާފުކުރުމުން އެނގުނީ ކުރިއަށް އޮތް ދެ މަހެއްހާ ދުވަހުގެ ތެރޭގައި މަސައްކަތް ނިމޭނެ ކަމަށެވެ.
މިދިޔަ އަހަރު ތެރޭގައި ބެލި އިރުގައި، އަދި އެޑިއުކޭަޝަން މިނިސްޓްރީ އާއި ބައްދަލުކުރިން 1 އަހަރަށްވުރެ ގިނަ ދުވަސްވީ އިރު ވެސް މި މަސައްކަތް ނުނިމޭތީ. އެއިރު މިނިސްޓްރީ އިން ބައްދަލުވީ ސްޓޭޓް މިނިސްޓަރަކާއި. މިނިސްޓްރީ އިން ބުނީ ފައިސާގެ ބިލްތައް ހުންނާނީ ފިނޭންސް މިނިސްޓްރީ އަށް ފޮނުވާފައޭ، ކޮންޓްރެކްޓަރު ބުނެއޭ ފައިސާ ހަވާލުނުކުރާތީއޭ މަސައްކަތް ކުރިއަށް ނުދަނީ. ވާހަކައަކީ ފައިސާ ނެތިއްޔާ އަޅުގަނޑުމެން ވެސް ގަބޫލުކުރަން އެއްޗެހި ނުގަނެވޭނެކަން.މަނަދޫ ކައުންސިލް މެންބަރު މޫމިނާ ސޯލިހު
މޫމިނާ ވިދާޅުވީ މިނިސްޓްރީ މީހުންނާއި ބައްދަލުކުރިތާ ހަފްތާއެއްހާ ދުވަސް ފަހުން މިދިޔަ އަހަރުގެ ޖުލައި މަހުގެ ތެރޭގައި ރައީސް އެރަށަށް ވަޑައިގެންނެވި ކަމަށެވެ. އެ ދަތުރުފުޅުގައި އެޑިއުކޭޝަން މިނިސްޓަރު ވިދާޅުވެފައިވަނީ ފައިސާގެ ހުރިހާ ކަމެއް ހުރީ ނިންމާފައި ކަމަށާއި، ރައީސް ވެސް ހުދު އެފަދައިން ވިދާޅުވެ މަސައްކަތް ނުނިމި ހުރީ ކީއްވެގެން ކަމެއް އެނގިވަޑައިނުގަންނަވާ ކަމަށް ވިދާޅުވި ކަމަށް މުއުމިނާ ވިދާޅުވި އެވެ.
