"މާލެ ސަރަހައްދުގެ ބިންތައް ފޮތިފޮތިކޮށް ވިއްކާ ހުސްނުކުރަނީސް ޕީއެންސީ ބޭރުކޮށްލަން ޖެހޭ، އެހެންނޫނީ މި މާލެ ސަލާމަތެއް ނުކުރެވޭނެ"
މާލެ ސިޓީ ކައުންސިލުން ދާދިފަހުން އާންމުކުރި އޮޑިޓް ރިޕޯޓުން ފެންނަނީ ކަންބޮޑުވާންޖެހޭ ފަދަ ކަންތައްތަކެއް ކަމަށާއި، ރައީސް މުއިއްޒުގެ މޭޔަރުކަމުގައި މާލޭގެ ބިންތައް ނުއަގުގައި ވިއްކާފައިވާ ކަމަށް އާދަމް އާޒިމް ވިދާޅުވި.
މާލޭގެ މޭޔަރ އާދަމް އާޒިމް ހޭވައްލާ ތައްޔާރު ޖަލްސާގައި ވާހަކަދައްކަވަނީ | އެމްޑީޕީ
މާލެ ސަރަހައްދުގެ ބިންތައް ފޮތިފޮތިކޮށް ވިއްކާ ހުސްނުކުރަނީސް ޕީއެންސީ ބޭރުކޮށްލަން ޖެހޭ ކަމަށާއި އެހެންނޫން ނަމަ މާލެ ސަލާމަތް ނުކުރެވޭނެ ކަމަށް މާލޭގެ މޭޔަރު އަދި އެމްޑީޕީގެ ޓިކެޓުގައި މާލޭގެ މޭޔަރު ކަމަށް ވާދަކުރައްވާ އާދަމް އާޒިމް ވިދާޅުވެއްޖެ އެވެ.
އާޒިމް އެފަދައިން ވިދާޅުވީ އެމްޑީޕީގެ ހޭވައްލާ ތައްޔާރު ކެމްޕެއިން ޖަލްސާގައި ވާހަކަދައްކަވަމުންނެވެ.
އިހަށް ދުވަހު މާލެ ސިޓީ ކައުންސިލުން އާއްމު ކުރި އޮޑިޓަށް ބަލާލުމުން ފެންނަނީ ފިތްކަނޑަައިގެން ދާ ފަދަ ކަންތައްތައް ކަމަށް އާޒިމް ވަނީ ވިދާޅުވެފަ އެވެ. އެއީ މިހާރުގެ ރައީސް ޑރ.މުހައްމަދު މުއިއްޒު މާލޭގެ މެޔަރުކަމުގައި ހުންނެވި ދުވަސް ވަރުގެ އޮޑިޓެވެ. އެ އޮޑިޓުން އެނގޭ ގޮތުން އެއް ބިމެއް ތަކުރާރުކޮށް އެތައް ބަޔަކަށް ދީފައިވާކަން އެނގޭ ކަމަށް އާޒިމް ފާހަގަކުރެއްވި އެވެ. މާލެ ބިމުގެ އޮޑިޓުން ރައީސް މުއިއްޒު މޭޔަރަކަށް ހުންނެވި ދުވަސް ވަރު ނުއަގުގައި އެތައް ތަނެއް ވިއްކާލިކަން އެނގެން އޮތްކަން އާޒިމް ވަނީ ފާހަގަކުރައްވާފަ އެވެ.
ރަށްފުށުގެ ދިރިއުޅުމުގެ ހިތްހަމަޖެހުން ހޯދާދެވޭނެ ހަމައެކަނި ޕާޓީ އަކީ އެމްޑީޕީ ކަމަށް އާޒިމް ވިދާޅުވި އެވެ. ބޯފެނާއި ނަރުދަމާ އާއި ކަރަންޓު ފަދަ ޚިދުމަތްތައް ރަނގަޅަށް ދިނުމަކީ އެމްޑީޕީގެ ފިކުރުގެ ތެރެއިން އަންނަ ކަންކަން ކަމަށް އާޒިމް ވިދާޅުވި އެވެ.
ޤައުމު ހަމަ މަގަށް އެޅުވޭނީ އެމްޑީޕީ އަށް ވޯޓުދީގެން ކަަމަށް އާޒިމް ވަނީ ވިދާޅުވެފަ އެވެ. އެމްޑީޕީ ނޫން ބަޔަަކަށް ރައްޔިތުންނަށް ހެޔޮ ވެރިކަމެއް ނުކޮށްދެވޭނެ ކަމަށް ވެސް އޭނާ ވިދާޅުވި އެވެ. އާޒިމް ވިދާޅުވީ އެމްޑީޕީ އަށް ދެއްވާ ވޯޓަކުން ފައިދާ އާއި ލާބަ ނޫންއެއްޗެއް ނޯންނާނެ ކަމަށެވެ.
