ކައުންސިލް އިންތިޚާބުގެ ދެ ރަށެއްގެ ގުރުއަތު ނަގާފައި ނުވަނީ ސުޕްރީމް ކޯޓުގައި މައްސަލަ އެއް ކުރިއަށް ދާތީ: އީސީ

ކުރިއަށް އޮތް ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބަށް ކުރިމަތިލާފައިވާ ކެންޑިޑޭޓުންގެ ތެރެއިން، ގުރުއަތުލުން ކުރިއަށް ނުގެންދާ، ދެ ރަށަކީ ކ.ގުރައިދޫ އާއި ކ.ތުލުސްދޫ ކަމަށާއި އެ ދެ ރަށުގެ ކެންޑިޑެސީ އާއި ގުޅޭ މައްސަތަކެއް ސުޕްރީމްކޯޓުގައި ކުރިއަށް ދާތީ ކަމަށް އިލެކްޝަންސް ކޮމިޝަން (އީސީ) ގެ ރައީސް މުހައްމަދު ޒާހިދު ވިދާޅުވެއްޖެ އެވެ.

 ކައުންސިލް އިންތިޚާބުގެ ގުރުއަތު ނެގުން ބާއްވާފައި ވަނީ ބުރާސްފަތި ދުވަހު ހެނދުނު 10:00 އިން ފެށިގެންނެވެ.

އޭނާ އެފަދައިން ވިދާޅުވީ ރާއްޖެ އެމްވީ އަށް ދެއްވި ބަސްތީގަތުމެއްގަ އެވެ. އޭނާ ވިދާޅުވީ ސުޕްރީމްކޯޓަށް ހުށަހަޅާފައިވާ މައްސަލަތައް ނިމުނުހާ އަވަހަކަށް އެ ތަންތަނުގެ ކެންޑިޑޭޓުންގެ ގުރުއަތުލުން ކުރިއަށް ދާނެ ކަަމަށެވެ.  އިތުރު އެއްވެސް ދާއިރާ އެއްގެ ގުރުއަތުލުމުގައި ބޮޑު މައްސަލަ އެއް ދިމާ ނުވާ ކަމަށް ޒާހިދު ވިދާޅުވި އެވެ.

"ބައެއް އިދާރީ ކަންކަން ދިމާވި ނަމަވެސް އިތުރު ބޮޑު މައްސަލަ އެއް ދިމާ ނުވޭ. އެއްފަހަރާ ގުރުއަތުލުން ރާއްޖޭގެ ހުރިހާ ރަށެއްގައި ފަށައިގެން ވަރަށް އަމާން އޮމާންކޮށް ކުރިއަސް ދިޔައީ. އިދާރީ މައްސަލަ އަކަށް ދިމާވީ ތަރުތީބު އޮޅުން. ގުރުއަތުލުން ބާތިލްކޮށްފައި އެފަދަ ހާލަތުގައި އަލުން އޮމާންކަމާއި އެކު އެ މަރުހަލާ ވާނީ ކުރިއަށް ގެންގޮސްފައި." ޒާހިދު ވިދާޅުވި އެވެ. 

އީސީ އިން ބުނެފައި ވަނީ ކުރިމަތިލި ކެނޑިޑޭޓުންގެ ތެރެއިން ލޯކަލް ކައުންސިލް އިންތިޚާބަށް ވާދަކުރި 36 ކެންޑިޑޭޓަކު ނަން އަނބުރާ ގެންގޮސްފައިވާ ކަމަށާއި، ޑަބްލިއުޑީސީ އަށް ވާދަކުރި 31 ކެނޑިޑޭޓުން ނަން އަނބުރާ ގެންގޮސްފައިވާ ކަމަށެވެ.

67 ކެންޑިޑޭޓުން ނަން އަނބުރާ ގެންދިޔުމާއެކު އިންތިޚާބު ގައި ވާދަ ކުރާ ޖުމްލަ ކެންޑިޑޭޓުންގެ އަދަދަކީ 2،927 އެވެ.

އިންތިޚާބުގައި 294,937 މީހުންނަށް ވޯޓުލުމުގެ ޙައްގު ލިބިގެންވާ ކަމަށް އިލެކްޝަންސް ކޮމިޝަނުން ބުނެފައިވެ އެވެ.

މި އިންތިޚާބުގައި ރަށު ކައުންސިލްތަކަށް 626 އަދި ސިޓީ ކައުންސިލްތަކަށް 52 ކައުންސިލަރުން އިންތިޚާބު ކުރާނެ އެވެ. އަދި އަންހެނުންގެ ކޮމިޓީތަކަށްވެސް އެ އަދަދަށް މެންބަރުން އިންތިޚާބު ކުރުމަށް ވަނީ ހަމަ ޖެހިފަ އެވެ.

މި އިންތިޚާބު ގައި ވޯޓު ލާނީ އެޕްރީލް މަހުގެ 4 ވަނަ ދުވަހު އެވެ.