ކައުންސިލް، ޑަބްލިޔުޑީސީ ކެންޑިޑޭޓުންގެ ނަންބަރު ތަރުތީބު ކުރުން ބުރާސްފަތި ދުވަހު
ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ ކެންޑިޑޭޓުންގެ ނަންބަރު ތަރުތީބުކުރުމަށް ބާއްވާ ގުރުއަތުލުން، ބުރާސްފަތި ދުވަހުގެ ހެނދުނު 10:00 ގައި މުޅި ރާއްޖޭގައި އެއްވަގުތެއްގައި ބޭއްވުމަށް އިލެކްޝަންސް ކޮމިޝަނުން ވަނީ ނިންމާފައޮ. މި އިންތިޚާބުގައި ޖުމްލަ 2,994 ކެންޑިޑޭޓުން ވާދަކުރާއިރު، ކެންޑިޑޭޓުންގެ ދާއިމީ ލިސްޓު އަންނަ ހޮނިހިރު ދުވަހު އާންމުކުރުމަށް ވަނީ ހަމަޖެހިފައި. ނަން އަނބުރާ ގެންދަން ބޭނުންވާ ފަރާތްތަކަށް އެ ފުރުސަތު ގުރުއަތުލުން ފެށުމާ ހަމައަށް އޮންނާނެ.
ލޯކަލް ކައުންސިލް އަދި ޑަބްލިޔުޑީސީގެ ކެންޑިޑޭޓުންގެ ގުރުއަތު ނެގުން މާލެއާއި ސިޓީތައް އަދި އެހެނިހެން ރަށްތަކުގައިވެސް ކުރިއަށްދާނީ، ބުރާސްފަތި ދުވަހުގެ ހެނދުނު 10:00ގައި. | އިލެކްޝަންސް ކޮމިޝަން
އަންނަ އޭޕްރީލް މަހުގެ 4 ވަނަ ދުވަހު އޮންނަ ލޯކަލް ކައުންސިލް އަދި އަންހެނުންގެ ތަރައްޤީއަށް މަސައްކަތްކުރާ ކޮމެޓީ (ޑަބްލިޔުޑީސީ) ތަކުގެ އިންތިޚާބަށް ކުރިމަތިލާފައިވާ ކެންޑިޑޭޓުންގެ ކެންޑިޑޭޓް ނަންބަރު ތަރުތީބު ކުރުމަށް ބާއްވާ ގުރުއަތުނެގުން ރާއްޖޭގެ ހުރިހާ ރަށެއްގައި ވެސް އެއް ވަގުތެއްގައި ބުރާސްފަތި ދުވަހު އޮންނާނެ ކަމަށް އިލެކްޝަންސް ކޮމިޝަނުން ހާމަ ކޮށްފި އެވެ.
294,937 މީހުންނަށް ވޯޓުލުމުގެ ޙައްގު ލިބިގެންވާ މި އިންތިޚާބުގައި 2،994 ކެންޑިޑޭޓުން ވާދަ ކުރާއިރު، މި ދެ އިންތިޚާބުގެ ކެންޑިޑޭޓުންގެ ނަންބަރުތައް ތަރުތީބު ކުރުމަށް ގުރުއަތު ނެގުން އޮންނާނީ ބުރާސްފަތި ދުވަހު ހެނދުނު 10:00 ގަ އެވެ.
މާލެ ސިޓީގެ ގުރުއަތު ނެގުން ކުރީގެ ޑްރަގް ކޯޓު ހިންގި އިމާރާތުގައި ގާއިމު ކޮށްފައިވާ އިންތިޚާބާ ބެހޭ މަރުކަޒު ގައި ބޭއްވުމަށް ހަމަޖެހިފައިވާއިރު ސިޓީތަކާއި އެހެނިހެން ރަށްތަކުގައި ގުރުއަތު ނެގުން ކުރިއަށްދާނީ ކައުންސިލް އިދާރާގައި ނުވަތަ އެރަށެއްގެ ކައުންސިލުން ކަނޑައަޅާ ތަނެއްގަ އެވެ.
އިލެކްޝަންސް ކޮމިޝަނުން ހާމަ ކޮށްފައިވާ ގޮތުގައި ކެންޑިޑޭޓުގެ ބަދަލުގައި އެހެން ފަރާތަކުން ގުރުއަތު ނެގުމަށް އަންނަ ނަމަ، އަންނަ މީހާގެ ނަން، އައިޑީ ނަންބަރު އަދި އައިޑީ ކޮޕީ ހިމަނޭ ކެންޑިޑޭޓުގެ ސިޓީ އެއް ގެންނަން ޖެހެ އެވެ. ބަދަލުގައި އަންނަ ފަރާތުން އައި.ޑީ ކާޑުގެ އަސްލު ގެންނަން ޖެހެ އެވެ.
ކެންޑިޑޭޓް ނަމްބަރާ އެކު ކެންޑިޑޭޓުންގެ ދާއިމީ ލިސްޓް ހޮނިހިރު ދުވަހު ހާމަ ކުރަން ހަމަޖެހިފައިވާ މި އިންތިޚާބުގައި 6 ސިޔާސީ ޕާޓީއަކުން 1،210 ކެންޑިޑޭޓުންނާއި އަމިއްލަ ގޮތުން 401 ކެންޑިޑޭޓުން ވާދަ ކުރުމަށް ހުށަހަޅާފައިވެ އެވެ.
އިލެކްޝަންސް އިން ހާމަ ކޮށްފައިވާ ގޮތުގައި، މިހާރު ކެންޑިޑޭޓަކަށް ވުމަށް ހުށަހަޅާފައިވާ ފަރާތްތަކުން ނަން އަނބުރާ ގެންދަން ބޭނުން ނަމަ އެ ފުރުސަތު ބުރާސްފަތި ދުވަހުގެ ހެނދުނު 10:00އާ ހަމައިން ބަންދުވާނެ އެވެ.
ރަށު ކައުންސިލްތަކަށް 626 އަދި ސިޓީ ކައުންސިލްތަކަށް 52 ކައުންސިލަރުން އިންތިޚާބު ކުރާ އިރު ހަމަ އެ އަދަދުތަކަށް ރަށް ތަކަށާއި ސިޓީ ތަކަށް އަންހެނުންގެ ތަރައްގީ އަށް މަސައްކަތް ކުރާ ކޮމިޓީތަކަށް ވެސް މެންބަރުން އިންތިޚާބު ކުރުމަށް ވަނީ ހަމަޖެހިފަ އެވެ.
