ކުރީގެ ނައިބް ރައީސް ފައިސަލް ނަސީމް ބައިވެރިވަޑައިގެންނެވި، އެމްޑީޕީގެ މާފަންނު ދެކުނު ދާއިރާގެ ދޮރުން ދޮރަށް ހަރަކާތަށް ހޫނު ތަރުހީބެއް

މާލެ ސިޓީގެ ކައުންސިލް އިންތިޚާބަށް އެމްޑީޕީ އިން ނުކުންނަ ކެންޑިޑޭޓުންނާ އެކު ކުރީގެ ނައިބް ރައީސް ފައިސަލް ނަސީމް، މާފަންނު ދެކުނު ދާއިރާގައި ދޮރުން ދޮރަށް ހިންގަވައިފި އެވެ.

އާދީއްތަ ދުވަހު ހަވީރު ކުރިޔަށް ގެންދިޔަ މި ހަރަކާތުގައި މާލެ ސިޓީ ކައުންސިލްގެ މޭޔަރު ކަމަށް އެމްޑީޕީގެ ފަރާތުން ވާދަކުރައްވާ މިހާރުގެ މޭޔަރު އާދަމް އާޒިމް އަދި މާފަންނު ދެކުނު ދާއިރާގެ ކައުންސިލް މެންބަރުކަމަށް ވާދަކުރައްވާ ލަބާން ޝަރީފް ބައިވެރިވެވަޑައިގެންނެވި އެވެ. އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސާ ކަމަށް ވާދަކުރައްވާ އައިޝަތު ރީޝާ އާއި އެ ކޮމިޓީގެ މެންބަރުކަމަށް ވާދަކުރައްވާ ބަދޫރާ ވެސް މި ހަރަކާތުގައި ބައިވެރިވެވަޑައިގެން ރައްޔިތުންނާ ބައްދަލުކުރެއްވި އެވެ.

މި ކެމްޕެއިން ހަރަކާތުގެ ތެރެއިން ރާއްޖެ އެމްވީ އަށް ދެއްވި ހާއްސަ އިންޓަވިއު އެއްގައި ކުރީގެ ނައިބް ރައީސް ފައިސަލް ވިދާޅުވީ، ރައީސް މުއިއްޒު ގެ މި ސަރުކާރުގެ އަމަލުތައް ހުރި ގޮތުން ކުރިޔަށް އޮތް ލޯކަލް ކައުންސިލް އަދި އަންހެނުންގެ ތަރައްގީ އަށް މަސައްކަތް ކުރާ ކޮމިޓީ ތަކުގެ އިންތިހާބުގައި އެމްޑިޕީ އަށް މެޖޯރިޓީ ދިނުމަކީ ދިވެހިރައްޔިތުން ކޮންމެހެން ވެސް ކުރަން ޖެހޭ ކަމެއް ކަމުގަ އެވެ. އަދި މިހާރުވެސް އެމްޑީޕީ ގެ މޭޔަރަކު 2 އަހަރެއްހާ ދުވަހުން މާލެ އަށް ގެނެސްފައިވާ ހެޔޮ ބަދަލު ތައް ފާހަގަ ކުރައްވާފަ އެވެ. 

ރާއްޖެ އެމްވީ އަށް މައުލޫމާތު ދެއްވަމުން މޭޔަރ އާޒިމް ވިދާޅުވީ، އެމްޑީޕީގެ ފަރާތުން ކުރިޔަށް ގެންދާ މި ކެމްޕެއިން ހަރަކާތުން ފާހަގަވި އެއް ކަމަކީ، މާލޭގެ ރައްޔިތުންގެ ބޮޑު ތާއީދެއް އެމްޑީޕީ އަށް އޮތް ކަމެވެ. ރައްޔިތުން އެދޭ ހެޔޮ ބަދަލު ގެނެވޭނީ އެމްޑީޕީގެ ކެނޑިޑޭޓުންނަށް ކަމަށާއި، މިހާރު ވެސް އެމްޑީޕީ ގެ މެޖޯރިޓީ އޮތް ކައުންސިލް ތަކުން ރައްޔިތުންނަށް ދެމުން ގެންދާ ފުރިހަމަ ހިދުމަތްތައް ރައްޔިތުން ފާހަގަ ކުރާކަމަށް އާޒިމް ވިދާޅުވި އެވެ. އަދި ރާއްޖޭގެ ރައްޔިތުންނަށް މިހާތަނަށް ލިބިފައިވާ ތަރައްގީ އެއް ލިބިފައިވަނީ އެމްޑީޕީ އަށް ރައްޔިތުންގެ ވޯޓު ދީގެން ކަމަށް އާޒިމް ވިދާޅުވި އެވެ.

މާފަންނު އުތުރު ދާއިރާގައި އެމްޑީޕީ އިން ބޭއްވި މި ކެމްޕެއިން ހަރަކާތުގައި މޭޔަރު އާޒިމް އާއި އެމްޑީޕީގެ ކެންޑިޑޭޓުން ވަނީ އެ ދާއިރާގެ ގިނަ އަދަދެއްގެ ރައްޔިތުންނާ ބައްދަލުކޮށް، އެ ފަރާތްތަކުގެ ހުރި ކަންބޮޑުވުންތައް އޮޅުންފިލުވާފަ އެވެ. އާއްމު ރައްޔިތުންގެ ބޮޑު ތަރުހީބެއް ލިބުނު މި ފޯރިގަދަ ކެމްޕެއިން ހަރަކާތުގައި އެމްޑީޕީގެ ގިނަ އަދަދެއްގެ މެމްބަރުންނާއި ސަޕޯޓަރުން ބައިވެރިވެފައިވާކަން ފާހަގަކުރެވެ އެވެ.