ކައުންސިލް، ޑަބްލިޔުޑީސީ އިންތިޚާބުގައި އޮބްޒާވަރުންނާއި މޮނިޓަރުންނަށް ފުރުސަތު ހުޅުވާލައިފި
މި އިންތިޚާބުގެ ކަންކަން އޮބްޒާވްކޮށް މޮނިޓަރކުރުމަށް ޝައުގުވެރިވާ ސިޔާސީ ޕާޓީތަކާއި، ޖަމިއްޔާތަކާއި، މީޑިއާތަކުގެ އިތުރުން އަމިއްލަ ފަރާތްތަކަށް މި މަހުގެ 28 ވަނަ ދުވަހުގެ ނިޔަލަށް ވަނީ ފުރުސަތު ހުޅުވާލާފައި. އަމިއްލަ ގޮތުންނާއި ޖަމިއްޔާތަކުން ކުރިމަތިލާ ފަރާތްތަކަކީ އެއްވެސް ސިޔާސީ ޕާޓީއަކަށް ނިސްބަތްވާ ބަޔަކަށް ވެގެންނުވާނެ ކަމަށް އިލެކްޝަންސް ކޮމިޝަނުން ބުނެފައިވޭ.
ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2026ގައި ހަރަކާތްތެރިވާ އޮފިޝަލުން ތަމްރީން ކުރަނީ. | އިލެކްޝަންސް ކޮމިޝަން
ކުރިއަށް އޮތް ލޯކަލް ކައުންސިލް އަދި އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ އިންތިޚާބުގެ އޮބްޒާވަރުންނާއި މޮނިޓަރުންނަށް ވާން ބޭނުންވާ ފަރާތްތަކަށް ފުރުސަތު ހުޅުވާލައިފި އެވެ.
އިންތިޚާބުގެ ވޯޓު ނެގުމާއި، ވޯޓު ގުނުމުގެ ކަންތައްތައް އޮބްޒާވް ކުރުމާއި މޮނިޓަރަކަށްވުމަށް ސިޔާސީ ޕާޓީތަކަށާއި، އަމިއްލަ ފަރާތްތަކަށާއި، ޖަމްއިއްޔާ ތަކާށާއި މީޑިއާ ތަކަށް ފުރުސަތު ހުޅުވާލާފައިވާއިރު އެކަމަށް އެދި ހުށައެޅުމަށް ހުޅުވާލާފަވަނީ 28 ފެބްރުއަރީވާ ހޮނިހިރު ދުވަހުގެ 15:00ގެ ނިޔަލަށެވެ.
އަމިއްލަގޮތުން ނުވަތަ ޖަމިއްޔާއަކުން ހުށައަޅާ ފަރާތެއްނަމަ، އެއްވެސް ސިޔާސީ ޕާޓީއެއްގައި ނަން އޮވެގެން ނުވާނެ ކަމަށް އިލެކްޝަންސް އިން ބުނެފައިވެ އެވެ.
ސިޔާސީ ޕާޓީތަކުން މިކަމަށް އެދި ހުށަހަޅަން ޖެހެނީ "ސިމެދަ ޕޯޓަލް" މެދުވެރިކޮށެވެ.
މީޑީއާތަކުން މޮނިޓަރުންގެ ގޮތުގައި ހުށަހެޅޭނީ ބަހައްޓާ ވޯޓު ފޮށީގެ އަދަދަށް ކަމަށާއި، މޮނިޓަރުންގެ ގޮތުގައި ހަރަކާތްތެރިވާނެ ފަރާތްތަކުގެ މަޢުލޫމާތާއި އަދި މީޑިއާގެ ރެޖިސްޓްރީ ލައިންސަންސްގެ މަޢުލޫމާތު ހުށަހަޅަން ޖެހެ އެވެ.
އިންތިޚާބުގައި ބެހެއްޓުމަށް ހަމަ ޖެހިފައިވަނީ 621 ވޯޓު ފޮއްޓެވެ.
ސިޔާސީ ޕާޓީތަކާއި ޖަމްއިއްޔާ ތަކަށް ފޮށީގެ އަދަދަށް ވުރެ 10 އިންސައްތަ އިތުރުނުވާ އަދަދަކަށް މޮނިޓަރުންނަށް ވުމަށް ހުށަހެޅިދާނެ ކަމަށް ބުނެފައިވެ އެވެ. އެ އަދަދަކީ 683 އެވެ.
