މިސްކިތްތަކަށް ގެއްލުން ދިނުމަކީ ޓެރަރިޒަމްގެ ކުށަކަށް ހެދުމަށް އެމްޑީޕީ އިން ހުށަހެޅި ބިލު ބަލައިގަނެ، ކޮމިޓީ އަށް
މިސްކިތްތަކަށް ގެއްލުންދިނުން އިތުރުވަމުންދާތީ، އެފަދަ އަމަލުތަކަކީ ޓެރަރިޒަމްގެ ކުށެއްގެ ގޮތުގައި ކަނޑައެޅުމަށް ޓެރަރިޒަމް މަނާކުރުމުގެ ގާނޫނަށް ހުށަހެޅި އިސްލާހު 56 މެންބަރުންގެ އިއްތިފާގުން ވަނީ ބަލައިގެންފަ. މި އިސްލާހަކީ މިސްކިތްތަކުގެ ކަރާމަތް ހިފެހެއްޓުމަށާއި އިސްލާމްދީނަށް ހުރުމަތްތެރިކޮށް ހިތުމުގެ މަގުސަދުގައި ހުށަހެޅި ބިލެއް ކަމަށް މެންބަރު މުޙައްމަދު އިބްރާހިމް ފާހަގަ ކުރެއްވި. މި ބިލު އިތުރަށް ދިރާސާ ކުރުމަށްޓަކައި މިހާރު ވަނީ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީއަށް ފޮނުވާފަ.
ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) | ރައްޔިތުންގެ މަޖިލިސް
މިސްކިތްތަކަށް ގެއްލުން ދިނުމަކީ ޓެރަރިޒަމްގެ ކުށަކަށް ހެދުމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް (ކުޑޫ) ހުށަހެޅުއްވި ބިލު ބަލައިގަނެ، ދިރާސާ ކުރުމަށް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ އަށް ފޮނުވައިފި އެވެ.
ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި މެންބަރު ކުޑޫ ހުށަހެޅުއްވި ބިލުގެ ބަހުސް ވަނީ ކުރިއަށް ގެންގޮސްފަ އެވެ. އަދި ބިލުގެ ބަހުސް ނިންމާ ބިލު ބަލައިގަތުމާ މެދު ވޯޓުގެ ވަގުތުގައި ވޯޓަށް އަހާފައިވެ އެވެ.
ވޯޓުގެ ވަގުތުގައި މި ބިލު ބަލައިގެންފައި ވަނީ 56 މެންބަރުންގެ އިއްތިފާގުންނެވެ. އެއާއެކު ބިލު ދިރާސާ ކުރުމަށް މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ އަށް ވަނީ ފޮނުވާފަ އެވެ.
ޓެރަރިޒަމް މަނާކުރުމުގެ ގާނޫނަށް ހުށަހެޅި މި އިސްލާހުގެ ބިލު ހުށަހަޅާ ސަބަބެއް ކަމަށް ބަޔާންކޮށްފައި ވަނީ ދިވެހިރާއްޖޭގެ ޖުމްހޫރިއްޔާގެ ގާނޫ އަސާސީ ގެ 10 ވަނަ މާއްދާގައި ދިވެހި ދައުލަތުގެ ދީނަކީ އިސްލާމްދީން ކަމަށް ބަޔާންކޮށްފައި ވާއިރު، ސައްތައިން ސައްތަ މުސްލިމުން ދިރިއުޅޭ މި ގައުމުގައި، މިސްކިތްތަކަށް ގެއްލުން ދިނުން އާންމުވެ އެފަދަ އަމަލުތައް ތަކުރާރު ވަމުންދާތީ އެކަން ހުއްޓުވުމެވެ.
މީގެ އިތުރުން، އެފަދަ އަމަލުތަކަކީ މިސްކިތުގެ ކަރާމަތަށް އުނިކަން ލިބޭފަދަ އަމަލުތަކެއް ކަމަށާއި މިސްކިތުގެ ކަރާމަތް ހިފެހެއްޓުމަކީ އިސްލާމްދީނަށް ހުރުމަތްތެރި ކޮށް ހިތުމުގެ ތެރެއިންވާ ކަމެއްކަމަށް ވެސް ފާހަގަކޮށްފައިވެ އެވެ.
އެ ބިލު ހުށަހަޅަނީ އެފަދަ އަމަލުތައް ޓެރަރިޒަމްގެ އަމަލުތަކުގެ ތެރޭގައި ހިމެނުމަކީ މުހިންމު ކަމެއްކަމަށް ގަބޫލު ކުރާ ކަމަށް މެންބަރު ވަނީ ފާހަގަކުރައްވާފަ އެވެ.
މެމްބަރު މީގެ ކުރިން ކުޑޫ އެކްސް ގައި ކުރެއްވި ޕޯސްޓެއްގައި ވިދާޅުވީ މިސްކިތްތަކަށް ގެއްލުންދޭ ވާހަކަ އާންމުކޮށް ނުދެއްކި ނަމަވެސް މިސްކިތްތަކަށް ގެއްލުން ދިނުން މިހާރު އާންމުވެފައިވާ ކަމަށެވެ. ބިލު ހުށަހެޅީ އެހެންވެ ކަމަށް އޭނާ ވިދާޅުވި އެވެ.
