ކައުންސިލް އިންތިޚާބުގައި ޕީއެންސީން ކެމްޕޭނުގެ ނަމުގައި މަސައްކަތް ކުރަނީ ކެންޑިޑޭޓުން ގަތުމަށް: އެމްޑީޕީ

ލޯކަލް ކައުންސިލް އިންތިޚާބާ ދިމާކޮށް ސަރުކާރުގެ ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ)ން ހިންގާ ކެންޕޭނަކީ ކެންޑިޑޭޓުން ގަތުމުގެ މަސައްކަތް ކަމަށް ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ން ބުނެފި އެވެ.

ބުދަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެމްޑީޕީގެ ވިލިނގިލި ދާއިރާގެ ރައީސް ހުސައިން ހަސަން ވިދާޅުވީ، ކައުންސިލް އިންތިޚާބަށް ކެންޕޭން ކުރުމުގެ މަސައްކަތްތައް ކުރިއަށް ގެންދާއިރު، ޕީއެންސީން ކުރަމުންދަނީ ތަފާތު ކެންޕޭނެއް ކަމަށެވެ.

އެގޮތުން ދޮރުން ދޮރަށް ހިނގާ ކުރިއަށް ގެންދާ ކެންޕޭންތަކުގައި ޕީއެންސީގެ ޓީމުތައް ގޭތަކަށް ގޮސް، ވަޒީފާ ބޭނުންވަނީ ކިތައް މީހުންނަށްތޯއާއި، ޕްރޮމޯޝަން ބޭނުންވޭތޯ ބަލައި ސުވާލު ކުރާ ކަމަށެވެ. އަދި ވިދާޅުވީ  ރައްޔިތުންގެ ކުރިމައްޗަށް ނުކުންނަނީ ރިޝްވަތުގެ ކަޅު ފައިސާ ހިފައިގެން ކަމަށާއި، ފަސާދައިގެ އަމަލު ހިންގަމުންދަނީ ފާޅުގައި ކަމަށެވެ. 

މީގެ އިތުރުން ހުސެއިން ވިދާޅުވީ ސަރުކާރާ އިދިކޮޅު ކެންޑިޑޭޓުން ގަތުމުގެ މަސައްކަތް ކުރާ ކަމަށާއި، މިލިއަނުން ފައިސާ ހުށަހަޅަމުންދާ ކަމަށެވެ. ކެންޑިޑޭޓުންގެ އިތުރުން ސަރުކާރު ޖަވާބުދާރީ ކުރުވުމުގެ މަސައްކަތް ކުރާ ފަރާތްތައް ވެސް ގަތުމުގެ މަސައްކަތް ކުރާ ކަމަށާއި، މީޑިއާތައް ކޮންޓްރޯލް ކުރުމަށް 27 މިލިއަން ރުފިޔާ ބަހާލި ކަމަށެވެ. އަދި ސަރުކާރުން މިގޮތަށް އަމަލު ކުރަމުންދަނީ އިދިިކޮޅު ފަރާތްތަކުގެ އަޑު ކަނޑުވާލުމުގެ މަގުސަދުގައި ކަމަށް އޭނާ ވިދާޅުވި އެވެ.

ފާހަގަވަގެންދާ އަނެއް ކަމަކީ އިންތިޚާބުގެ ވޯޓުގެ ކުރިން ވޯޓުލާން އޮތް ދުވަހަކީ އޭޕްރީލް މަހުގެ 4 ވަނަ ދުވަސް. މިއޮތީ 52 ދުވަސް. އެ މުއްދަތުގެ ތެރޭގައި އަޅުގަނޑުމެންނަށް ފާހަގަކުރެވިގެން މިހާރު މިދަނީ އިންތިޚާބުގެ ކުރިން ވޯޓުގެ ކުރީން ކެންޑިޑޭޓުން ގަތުމުގެ މަސައްކަތް ސަރުކާރުން ކުރަމުންދާ ކަމަށް. އެގޮތުން އަޅުގަނޑުމެންނަށް މި ފާހަގަކުރެވެނީ ސަރުކާރާ ވާދަވެރި ކެންޑިޑޭޓުން، އިދިކޮޅު ކެންޑިޑޭޓުން ގަތުމަށްޓަކައި މިލިއަނުން ފައިސާ ހުށަހަޅަމުންދާ ކަމަށް. ކެންޑިޑޭޓުންގެ ނަން ނެގުމަށް މިއޮތް ފުރުސަތުގައި އެކަން އަޅުގަނޑުމެންނަށް ފާހަގަކުރެވެމުން މިދަނީ އެ ކެންޑިޑޭޓުންގެ ފަރާތުން މިވެނި ހުށަހެޅުންތަކެއް ސަރުކާރުން ހުށަހަޅަމުންދާ ކަމަށް. ސަރުކާރުން ކުރަމުންދާ ކެންޕޭނަކީ އެއީ ކެންޑީޑޭޓުން ގަތުމުގެ މަސައްކަތް. މިހާ ފާޅުކަން ބޮޑު ގޮތެއްގައި ކަރަޕްޝަނަށް ފައިސާ ހުށަހަޅާގެން ކެންޑިޑޭޓުން ގަތުމުގެ މަސައްކަތް އެއްވެސް އިރަކު ރާއްޖޭގައި ހިނގާފައިނެތް މި ނޫނިއްޔާ.

އެމްޑީޕީގެ ވިލިނގިލި ދާއިރާގެ ރައީސް ހުސައިން ހަސަން

މީގެ އިތުރުން ހުސެއިން ވަނީ އަންގާރަ ދުވަހުގެ ރޭ ކުޅުދުއްފުށީގައި އެމްޑީޕީން ބޭއްވި ޖަލްސާއާ ގުޅޭގޮތުން ވެސް ވާހަކަ ދައްކާވާފަ އެވެ.

ހުސެއިން ވިދާޅުވީ އިންތިޚާބަށް ވަރަށް ފުރިހަމަ އަށް ތައްޔާރުވަމުންދާ ކަމަށާއި، ދެވަނަ ވައުދު ކަމަށްވާ ''ވިޔަފާރިއަށް ފަހި'' ލޯންޗު ކޮށްފައިވާ ކަމަށެވެ. ޖަލްސާތައް ބާއްވަމުން ދަނީ ލާމަރުކަޒު ކޮށްގެން ކަމަށާއި، މާލެއާއި ކުޅުދުއްފުށި ގުޅިގެން މި ބޭއްވި ޖަލްސާއަށް ގިނަ ބައެއްގެ ތަރުހީބު ލިބުނު ކަމަށް އޭނާ ވިދާޅުވި އެވެ.