ކުރިއަށް އޮތް ކައުންސިލް އިންތިޚާބުގައި އެމްޑީޕީ ޓިކެޓުގައި ވާދަ ކުރަން އީސީ އަށް 912 ކެނޑިޑޭޓުން ހުށަހަޅައިފި
ކުރިއަށް އޮތް ލޯކަލް ކައުންސިލް އަދި ޑަބްލިއުޑީސީ އިންތިޚާބުގައި އެމްޑީޕީ ޓިކެޓުގައި ވާދަކުރާ ކެނޑިޑޭޓޫންގެ ހައްގުތައް ގެއްލޭ ގޮތަށް އީސީ އިން އަމަލުކުރާ ކަމަށް އެ ޕާޓީ އިން ބުނެފައިވޭ.
އެމްޑީޕީ އިން މީގެ ކުރިން ބޭއްވި ޙަރަކާތެއްގެ ތެރެއިން އެ ޕާޓީގެ ދިދަ ހިފައިގެން އާންމު މެމްބަރުން. | ސޯޝަލް މީޑިއާ
ކުރިއަށް އޮތް ލޯކަލް ކައުންސިލް އަދި ޑަބްލިއުޑީސީ އިންތިޚާބުގައި ރާއްޖޭގެ އެންމެ ބޮޑު އިދިކޮޅު ޕާޓީ މޯލްޑިވިއަލް ޑިމޮކްރެޓިކް ޕާޓީ (އެމްޑީޕީ) ޓިކެޓުގައި ވާދަ ކުރުމަށް އިލެކްޝަންސް ކޮމިޝަނަށް ޖުމްލަ 912 ކެނޑިޑޭޓުން ހުށަހަޅައިފި އެވެ.
އޭގެ ތެރޭގައި ހިމެނެނީ ކައުންސިލްތަކުގެ މަޤާމުތަކަށް ވާދަކުރާ 495 ކެނޑިޑޭޓުންނާއި ޑަބްލިއުޑީސީ އަށް ވާދަކުރާ 417 ކެނޑިޑޭޓުންނެވެ.
ކުރިއަށް އޮތް އެޕްރީލް މަހު ބޭއްވުމަށް ތާވަލްކޮށްފައިވާ ލޯކަލް ކައުންސިލް އިންތިހާބަށް ކުރިމަތިލުމުގެ މުއްދަތު 10 ދުވަހަށް އިތުރުކުރަން އެމްޑީޕީ އިން އީސީގައި އެދުނެވެ. އިންތިހާބަށް ކުރިމަތިލެވޭ ވަގުތު އީސީ އިން އިތުރުކޮށްދިން ނަމަވެސް ދުވަސް އިތުރުކޮށްދީފަ އެއް ނުވެ އެވެ.
މިގޮތުން އިލެކްޝަނުން ވަގުތު އިތުރުކޮށްފައި ވަނީ ހުކުރު ދުވަސް ފިޔަވައި ކޮންމެ ދުވަހަކު ހެނދުނު 08:30 އިން ހަވީރު 05:30 އަށް އަދި ހުކުރު ދުވަހު މެންދުރުފަހު 15:30 އިން ރޭގަނޑު 20:00 އަށެވެ.
އެމްޑީޕީން މިވަނީ އެ ޕާޓީގެ ކެންޑިޑޭޓުންގެ ހައްގުތައް ގެއްލޭ ގޮތަށް އަމަލުތައް ކުރަމުންދާކަން ފާހަގަކޮށްފަ އެވެ. އަދި ކައުންސިލް އިންތިޚާބުގައި ސަރުކާރަށް ފައިދާވާ ގޮތަށް އިލެކްޝަންސް ކޮމިޝަން ހިމެނޭހެން އިދާރާތަކުން މަސައްކަތް ކުރާ ކަމަށް އިދިކޮޅު ފަރާތްތަކުން ތުހުމަތުކުރެ އެވެ.
