އިންތިޚާބާ ދިމާކޮށް ސަރުކާރުގެ ކޮރަޕްޝަންގެ ތުހުމަތުތަކަށް އޭސީސީން ދިނީ ބީރު ކަންފަތެއް
ކޮރަޕްޝަންގެ ތުހުމަތުތައް ފެންމަތިވިޔަސް އޭސީސީން އެއްވެސް މައުލޫމާތެއް ދިނުމަށް ވަނީ ދެކޮޅު ހަދާފަ
އޭސީސީގެ ރައީސް | ރާއްޖެ އެމްވީ
މި އަންނަ އެޕްރީލް މަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބާ ދިމާކޮށް ސަރުކާރުން ގިނަ އަދަދެއްގެ ވަޒީފާތަކެއް ބަހައި، މަޝްރޫޢުތައް އިޢުލާން ކުރަމުންދާތީ ކޮރަޕްޝަންގެ ބޮޑެތި ތުހުމަތުތަކެއް ފެންމަތިވެފައިވީ ނަމަވެސް، އެންޓި ކޮރަޕްޝަން ކޮމިޝަން (އޭސީސީ) އިން އެކަމާ ގުޅޭގޮތުން މައުލޫމާތު ދިނުމަށް ދެކޮޅު ހަދައިފިއެވެ.
ލޯކަލް ކައުންސިލް އިންތިޚާބު ގާތްވެފައިވަނިކޮށް، އެކި މިނިސްޓްރީތަކާއި ސަރުކާރު ހިއްސާވާ ކުންފުނިތަކަށް (އެސްއޯއީ) ގިނަ އަދަދެއްގެ މުވައްޒަފުން ނަގަމުންދާކަން ވަނީ ފާހަގަކުރެވިފައެވެ. މިގޮތުން، ޕަބްލިކް ވޯކްސްއަށް އެކަނިވެސް 500 އަށްވުރެ ގިނަ މުވައްޒަފުން ނަގަން އުޅޭކަމަށް ލޯކަލް ގަވަރންމަންޓް މިނިސްޓަރު އާދަމް ޝަރީފް ދާދި ފަހުން ވިދާޅުވެފައިވެއެވެ.
ނަމަވެސް، މި މައްސަލައިގައި މީޑިއާތަކުން ސުވާލު ކުރުމުންވެސް އޭސީސީން ވަނީ އެއްޗެއް ބުނަން އިންކާރުކޮށްފައެވެ. އަދި މާލޭގައި ހުންނަ މިނިސްޓްރީތަކުގެ މުވައްޒަފުންގެ ނަމުގައި ރަށްރަށުން މީހުން ވަޒީފާއަށް ނަގަމުންދާއިރު، ބައެއް ރަށްރަށުގައި ކުރާނެ މަސައްކަތެއް ނެތިވެސް އެސްއޯއީތަކަށް މުވައްޒަފުން އިތުރުކުރަމުންދާ ކަމުގެ ޝަކުވާ ވަނީ ބޮޑުވެފައެވެ.
މީގެ އިތުރުން، އިންތިޚާބާ ދިމާކޮށް ބޯހިޔާވެހިކަމުގެ ގިނަ މަޝްރޫޢުތަކަކަށް ކުރިމަތިލުމުގެ ފުރުސަތު ސަރުކާރުން މިހާރު ވަނީ ހުޅުވާލާފައެވެ. އޭގެ ތެރޭގައި ރަސްމާލެއިން ދޫކުރާ 15,000 ބިމާއި 7,900 ފްލެޓް ހިމެނެއެވެ. އަދި ބ. ތުޅާދޫ އާއި ތ. ވިލުފުށީގައި އިމާރާތްކޮށްފައިވާ 100 ހައުސިންގ ޔުނިޓަށް ކުރިމަތިލާން ހުޅުވާލާފައިވަނީ، ތުޅާދޫ ކައުންސިލުން އެ މަސައްކަތް ކުރަމުން ދަނިކޮށް ކައުންސިލްގެ އަތުން އެކަން އަތުލުމަށްފަހުކަން ފާހަގަކޮށްލެވެއެވެ.
މި ޖެނުއަރީ މަހުގެ 12 ވަނަ ދުވަހު އޭސީސީން ނެރުނު ބަޔާނެއްގައި، އިންތިޚާބާ ދިމާކޮށް ރިޝްވަތު ދީފިނަމަ އެކަން ރިޕޯޓް ކުރުމަށް އެދިފައިވެއެވެ. އަދި ރިޝްވަތު ދިނުމާއި ހިފުމަކީ ކުށެއް ކަމަށާއި، އެފަދަ އެއްވެސް މައްސަލައެއް ނުބަލައި ދޫކޮށްނުލާނެ ކަމުގެ ޔަގީންކަންވެސް އެ ކޮމިޝަނުން ދީފައިވެއެވެ. އެހެންނަމަވެސް، ސަރުކާރުން މިހާރު ކުރިއަށްގެންދާ މި ހަރަކާތްތަކާ ގުޅިގެން އެއްވެސް މައްސަލައެއް ހުށަހެޅިފައިވޭތޯ ސުވާލު ކުރުމުން އޭސީސީން އެއްވެސް ތަފްސީލެއް ހާމަކޮށްފައެއް ނުވެއެވެ.
މިކަމާ ގުޅިގެން އާންމުންގެ މެދުގައި ބޮޑެތި ފާޑުކިޔުންތަކެއް އަމާޒުވަމުންދާއިރު، އޭސީސީގެ މިހާރުގެ ރައީސް އަކީ މީގެ ކުރިންވެސް މަގާމު ދިފާއުކުރުމަށްޓަކައި އޭރު އޮންނަ ސަރުކާރަކަށް ތާއީދުކޮށް، ސަރުކާރުގެ އިސް ފަރާތްތަކާ ގުޅުންހުރި މައްސަލަތައް ބެލުމަށް ފަސްޖެހިވަޑައިގަންނަވާ ބޭފުޅެއްގެ ގޮތުގައި ވަނީ ތުހުމަތު ކުރެވިފައެވެ.
