ކައުންސިލް އިންތިޚާބާ އެކު ރިފަރެންޑަމް ވޯޓު ނަގާނަމަ އިތުރު 20 މިލިއަން ބޭނުންވާނެ: އީސީ
ލޯކަލް ކައުންސިލް އިންތިޚާބާއެކު ރިފަރެންޑަމް ވޯޓު ކުރިއަށްގެންދާ ނަމަ، ވޯޓު ކަރުދާސް ޗާޕުކުރުމާއި އޮފިޝަލުންގެ އެލަވަންސްތަކަށް އިތުރު 20 މިލިއަން ރުފިޔާ ބޭނުންވާނެ ކަމަށް އިލެކްޝަންސް ކޮމިޝަނުން ވަނީ ބުނެފަ. ވަކިން މި ވޯޓު ނަގާ ނަމަ 60 އާއި 80 މިލިއަން ރުފިޔާއާ ދެމެދުގެ ބޮޑު ޚަރަދެއް ހިނގާނެ ކަމަށް އެ ކޮމިޝަނުން ލަފާކުރޭ. އެހެންކަމުން، މިކަމަށް ބޭނުންވާ ގާނޫނީ ބަދަލުތައް ވީހާވެސް އަވަހަށް ނިންމައި، އާންމުން ހޭލުންތެރިކުރުމުގެ ފުރުސަތު ފަހިކޮށްދިނުމަށް އެ ކޮމިޝަނުން ވަނީ މަޖިލީހުގައި އެދިފަ.
މަޖިލީހުގެ މިނިވަން މުއައްސަސާތަކުގެ ކޮމިޓީ އިން އިލެކްޝަންސް ކޮމިޝަން އަދި ބަންޑާރަނައިބުގެ އޮފީހުގެ ބޭފުޅުންނާ ބައްދަލުކުރުން. | ރައްޔިތުންގެ މަޖިލިސް
ރިޔާސީ އިންތިޚާބާއި މަޖިލިސް އިންތިޚާބު އެއްކޮށް ބޭއްވުމާ ގުޅޭގޮތުން ފެންނަ ނުފެންނަ ވޯޓު ނެގުން ލޯކަލް ކައުންސިލް އިންތިޚާބާ އެކު ބާއްވާ ގޮތަށް ގާނޫނު ފާސް ކޮށްފި ނަމަ އިތުރު 20 މިލިއަން ރުފިޔާ ޚަރަދުވާނެ ކަމަށް، އިލެކްޝަންސް ކޮމިޝަން ގެ ރައީސް މުހައްމަދު ޒާހިދު ވިދާޅުވެއްޖެ އެވެ.
ހޯމަ ދުވަހު ބޭއްވި މިނިވަން މުއައްސަސާތަކުގެ ކޮމިޓީގައި ވާހަަކަދައްކަވަމުން ޒާހިދު ވިދާޅުވީ މި ދެ އިންތިޚާބު އެއް ދުވަހެއްގައި ކުރިއަށްގެންދާ ނަމަ ވޯޓު ކަރުދާސް ޗާޕު ކުރުމާއި އޮފިޝަލުން ވެސް އިތުރަށް ނެގުމާއެކު އެލަވަންސް ދިނުމަށް އިތުރު ޚަރަދު ކުރަންޖެހޭނެ ކަމަށެވެ.
އޭގެ އިތުރުން ޚިޔާލު ހޯދުމަށް ރިފަރެންޑަމް ވޯޓަށް ބޭނުންވާ އިތުރު ފޮށިތައް ވެސް ރަށް ރަށަށް ފޮނުވަން ޖެހޭނެ ކަމަށާ އެކަމަށް ވެސް ފުދޭވަރެއްގެ ޚަރަދެއްގެ ދާނެ ކަމަށް ޒާހިދު ވިދާޅުވި އެވެ. އެހެންކަމުން ރިފަރެންޑަމް ވޯޓާ ކައުންސިލް އިންތިޚާބު ވޯޓު އެއްކޮށް ނަގަން ގާނޫނު ފާސް ކޮށްފި ނަމަ އިތުރަށް 20 މިލިއަން ރުފިޔާގެ ބަޖެޓް އެއް އެ ކޮމިޝަނަށް ބޭނުންވާނެ ކަމަށް އޭނާ ވިދާޅުވި އެވެ.
އުސޫލެއްގެ ގޮތުން ވަކިން ބާއްވާކަމުގަ ވަނީނަމަ އަޅުގަނޑުމެން މި ބަލަނީ ގާތްގަނޑަކަށް ވަކިން މިސާލަކަށް ރިފަރެންޑަމް ބާއްވަންޏާ ގާތްގަނޑަކަށް 60 މިލިއަން އާ 80 މިލިއަން އާ ދޭތެރޭގެ ޚަރަދެއް ދާނެ ވަކިން ބާއްވާ ކަމަށް ވަންޏާ. އެކަމު އެއްކޮށް ބާއްވާ ކަމަށް ވާނަމަ 20 މިލިއަނުން އަޅުގަނޑުމެންނަށް ވާނެ،އިލެކްޝަންސް ކޮމިޝަން ގެ ރައީސް މުހައްމަދު ޒާހިދު
ކޮމިޓީގައި ޒާހިދު ވިދާޅުވީ ދެ އިންތިޚާބު އެއްކޮށްލުމަކީ ރާއްޖޭގެ ޑިމޮކްރެޓިކް ވެއްޓަށް ބޮޑު ބަދަލެއް އަންނާނެ ކަމެއް ކަމަށެވެ. އެހެންކަމުން ރައްޔިތުންނަށް އެކަމާ ބެހޭ މައުލޫމާތު ފޯރުކޮށްދޭނެ ފުރުސަތު އޮންނަން ޖެހޭނެ ކަމަށް ވެސް އޭނާ ވިދާޅުވި އެވެ.
އެހެން ކަމުން ލޯކަލް ކައުންސިލް އިންތިޚާބާ އެކު ރިފަރެންޑަމް ބާއްވާ ނަމަ ރައްޔިތުންގެ މަޖިލީހުން ގާނޫނު އަސާސީ އަށް ބަދަލުގެނައުމާއި އެކަމާ ގުޅިގެން ދެން ކުރަން ޖެހޭ ކަންކަން ވީ އެންމެ އަވަހަކަށް ކޮށް އިލެކްޝަނަށް މިކަން ފަސޭހަކަމާއެކު ކުރެވޭނެ މަގު ތަނަވަސްކޮށްދިނުމަށް ވެސް ޒާހިދު ވަނީ އެދިވަޑައިގެންފަ އެވެ.
ރިފަރެންޑަމް ގާނޫނުގައިވާ ގޮތުން، ރައްޔިތުންގެ ހިޔާލު ހޯދުމުގެ އާންމު ވޯޓެއް ބޭއްވުމަށް އެދި ހުށަހަޅާ ތާރީހާއި ވޯޓު ނެގުމާ ދެމެދު މަދުވެގެން 45 ދުވަސް އަދި ގިނަވެގެން 90 ދުވަހުގެ މުއްދަތެއް އޮންނަންޖެހެ އެވެ. އަދި އެ މުއްދަތުގެ ތެރޭގައި އާންމުން ހޭލުންތެރިކުރުމުގެ މަސައްކަތްތައް ކުރިއަށް ގެންދަންޖެހޭނެ ކަމަށް ވެސް ގާނޫނުގައި ބަޔާންކޮށްފައިވެ އެވެ.
