ޕީއެންސީގެ ލަދެއް ހަޔާތެއް ހުރި ނަމަ ކެންޑިޑޭޓުން ނެރެގެން، ލޯގޯ ޖަހައިގެން ކައުންސިލް އިންތިޚާބަށް ނުނިކުންނާނެ - އައްޑޫ މޭޔަރ
ޕީއެންސީގެ ފިކުރަކީ ހަރުކަށި ރައްޔިތުންނާއި ބީރައްޓެހި ފިކުރެއް ކަމަށް ނިޒާރު ވަނީ ވިދާޅުވެފަ. މަޖިލީހުގެ ފުރިހަމަ މެޖޯރިޓީ ޕީއެންސީ އަށް އޮތް ނަމަވެސް ލާމަރުކަޒީ ޤާނޫނަށް އެއްވެސް ހެޔޮ ބަދަލެއް ނުގެންނަ ކަަމަށް ނިޒާރު ވިދާޅުވި.
އައްޑޫ ސިޓީގެ މޭޔަރު އަލީ ނިޒާރު | ރާއްޖެ އެމްވީ
ޕްރޮގްރެސިވް ނޭޝަނަލް ކޮންގްރެސް (ޕީއެންސީ)ގެ ލަދެއް ހަޔާތެއް ހުރި ނަމަ ކެންޑިޑޭޓުން ނެރެގެން، ލޯގޯ ޖަހައިގެން ކައުންސިލް އިންތިޚާބަށް ނުނިކުންނާނެ ކަމަށް އައްޑޫގެ މޭޔަރ އަދި އެމްޑީޕީގެ މޭޔަރ ކެންޑިޑޭޓް އަލީ ނިޒާރު ވިދާޅުވެއްޖެ އެވެ.
އޭނާ އެފަދައިން ވިދާޅުވީ އަންގާރަ ދުވަހުގެ ރޭ އެމްޑީޕީގެ ހަރުގެ ޖަލްސާގައި އޮންލައިންކޮށް ބައިވެރިވެވަޑައިގެން ވާހަކަދައްކަވަމުންނެވެ.
ކައުންސިލްތަކުގެ ބާރުތައް އެއްކޮށް ކަނޑުވާލައި، ސަރުކާރުން އިންތިޚާބަށް ކުރިމަތިލުމަކީ ލަދުވެތި ކަމެއްގެ ގޮތުގައި ނިޒާރު ސިފަކުރެއްވި އެވެ. ކައުންސިލްތަކުގެ ބާރުތައް ނިގުޅައިގަނެ، އަމަލީ ގޮތުން އެ އިދާރާތައް ސަސްޕެންޝަނެއްގައި އޮންނަތާ އަހަރެއްވާން ކައިރިވެފައިވާ ކަން ނިޒާރު ފާހަގަކުރެއްވި އެވެ. ނިޒާރު އެގޮތަށް ފާހަގަކުރެއްވީ، ކައުންސިލްތަކުގެ މަސައްކަތްތައް ހުއްޓޭ މިންވަރަށް ބާރުތައް ކޮންޓްރޯލް ކޮށްފައިވާތީ އެވެ.
ޕީއެންސީން ރިޔާސީ އިންތިޚާބު ކާމިޔާބުކުރީ އަވަށްޓެރި ގައުމުތަކާމެދު ނަފްރަތު އުފައްދައި، ރައްޔިތުންނަށް ހަގީގަތް އޮޅުވާލައިގެން ކަމަށާއި، އެކަން ނޭނގޭ ދިވެހި ރައްޔިތަކު ނެތް ކަމަށް ނިޒާރު ވިދާޅުވި އެވެ. މީގެއިތުރުން، ކުރިއަށް އޮތް ކައުންސިލް އިންތިޚާބުގައި ވެސް ސަރުކާރުން ކާމިޔާބީ ހޯދުމަށް މަސައްކަތް ކުރަމުންދަނީ އޮޅުވާލުމާއި މަކަރުވެރިކަމުގެ ތެރެއިން ކަމަށް އޭނާ ވިދާޅުވި އެވެ. ނިޒާރު އިތުރަށް ސިފަކުރެއްވި ގޮތުގައި، ޕީއެންސީގެ ފިކުރަކީ ރައްޔިތުންނާ ބީރައްޓެހި، ހަރުކަށި ފިކުރެކެވެ.
"ޕީއެންސީ އިން ގެންގުޅެނީ ހަރުކަށި ވަތަނީ ފިކުރެއް. އެމްޑީޕީ އިން ގެންގުޅެނީ ހުޅުވިފައިވާ ފިކުރެއް." ނިޒާރު ވިދާޅުވި އެވެ.
ކައުންސިލްތައް ބާރުވެރިކުރުވައިގެން ހިންގުމުގައި އެމްޑީޕީން ތަފާތު ދައްކާފައިވާކަން ފާހަގަކުރައްވައި، ނިޒާރު ވިދާޅުވީ ޕީއެންސީން ލާމަރުކަޒީ ގާނޫނަށް ގެއްލުންވާ ގޮތަށް ވިޔާނުދާ ކޮށް އެތައް ކަމެއް ކޮށްފައިވާ ކަމަށެވެ. އަދި ރައްޔިތުންގެ މަޖިލީހުގެ ފުރިހަމަ އަގުލަބިއްޔަތު ޕީއެންސީއަށް ލިބިފައިވީ ނަމަވެސް، ލާމަރުކަޒީ ނިޒާމު ހަރުދަނާކުރުމަށް ގާނޫނަށް އެއްވެސް ހެޔޮ ބަދަލެއް ނުގެންނަ ކަމަށް ނިޒާރު ވިދާޅުވި އެވެ.
