ރައީސް މުއިއްޒު އަކީ ޑިކްޓޭޓަރެއް ކަމަށް އަމިއްލަފުޅަށް ތަކުރާރުކޮށް އެބަ އިއުތިރާފްވެވަޑައިގަންނަވާ: މީކާއިލް

ރައީސް ޑރ.މުހައްމަދު މުއިއްޒު އަކީ ޑިކްޓޭޓަރެއް ކަމަށް އަމިއްލަފުޅަށް ތަކުރާރުކޮށް އެބަ އިއުތިރާފްވެވަޑައިގަންނަވާ ކަމަށް ރައްޔިތުން ގެ މަޖިލީހުގެ ގަލޮޅު ދެކުނު ދާއިރާ ގެ މެންބަރު މިކާއިލް އަހުމަދު ނަސީމް ވިދާޅުވެއްޖެ އެވެ.

އޭނާ އެފަދައިން ވިދާޅުވީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ހަރުގެ ޖަލްސާގައި ވާހަކަދައްކަވަމުންނެވެ. 

Advertisement

ރައީސް މުއިއްޒު ގެންދަވަނީ އިލެކްޝަންސް ކޮމިޝަން ހިމެނޭހެން އެކި އިދާރާތަކުގެ ކޮންޓްރޯލް އެ މަނިކުފާނުގެ އަތްޕުޅުގައި އޮންނަން ޖެހޭ ކަމަށް ބުނަމުން ކަމަށާއި އެއީ ވަރަށް ޚުދުމުހުތާރު ކަމެއް ކަމަށް އޭނާ ވިދާޅުވި އެވެ. މީކާއިލް ވިދާޅުވީ ޖަވާބުދާރީ ކުރެވޭ ގޮތަށް އެކުލަވާލާފައިވާ ވެރިކަމުގެ ނިޒާމް ސަރުކާރުން އެއްކޮށް ނިގުޅައިގަންނަމުންދާ ކަމަށެވެ. މީގެ އިތުރުން ރައީސް މުއިއްޒު، ބޭރު ފައިސާ މާރުކުރާނެ ކަމަށް ވިދާޅުވުމާއި، އެމްއެމްއެމްއޭ އަށް އެކަން ފާސްކުރަން ފުރުސަތު ނުދޭނެ ކަަމަށް ވިދާޅުވުމާއި، ސިވިލް ސަރވިސް ޤާނޫނާއި މެދު ރައީސް ބަސް ވިދާޅުވުމަކީ އަމިއްލަފުޅު ޚުދުމުހުތާރުކަން އަމިއްލަ އަށް ވިދާޅުވެދެއްވުން ކަމަށް މީކާއިލް ވިދާޅުވި އެވެ. އިންތިޚާބީ ވެރިއެއްގެ އެއްވެސް ސިފަ އެއް މުއިއްޒުގެ ކިބައިން ނުފެންނަ ކަމަށް މީކާއިލް ވިދާޅުވި އެވެ. 

"މިކަމަށް ފާރަވެރިވާން ޖެހޭ. މި ކެމްޕެއިން ބާރަށް ކުރިއަށް ގެންގޮސް ބޮޑުކޮށް ބަލިކޮށްލަން އެބަ ޖެހޭ. އަދި މި އިންތިޚާބަށް ނުކުންނަ އިރު ކޮމިޝަން އޮތީ ކޮން ހާލަތެއްގައި ކަން ވަރަށް ސާފު. ރައީސް އާއި އެކު ސިއްރު ބައްދަލުވުންތައް އެބަ ބާއްވާ، އެއީ ޤާނޫނުއަސާސީ ތަސައްވުރު ކުރާ ގޮތެއް ނޫން." އޭނާ ވިދާޅުވި އެވެ.

މީކައިލް ވިދާޅުވީ ކުރިއަށް އޮތް ލޯކަލް ކައުންސިލް އިންތިޚާބު މުހިންމުވާ ސަބަބަކީ އުމްރާނީ ތަރައްޤީ ފުރިހަމަ ވުން އިންތިޚާބާއި ގުޅިފައިވާތީ ކަމަށެވެ. އެ އިންތިޚާބު މުހިންމުވާ އަނެއް ސަބަބަކީ މިއީ ޑިމޮކްރަސީ އާއި ލާމަރުކަޒީ ނިޒާމް ދަމަހައްޓަން ލިބޭ ފަހު ފުރުސަތަށް ވާތީ ކަަމަށް ވެސް އޭނާ ވަނީ ވިދާޅުވެފަ އެވެ. ކައުންސިލް އިންތިޚާބުގައި އެންމެން އެކު އެކީގައި މަސައްކަތް ކުރުން ވަރަށް މުހިންމު ކަމަށް ވެސް މީކާއިލް ވިދާޅުވި އެވެ.