އިންތިޚާބުވާ މީހުންނަކީ ރައްޔިތުންގެ ޚާދިމުން ކަމުގެ ވިސްނުން ގެންގުޅޭ ހަމައެކަނި ޕާޓީ އަކީ އެމްޑީޕީ، ޚިދުމަތް ދިނުމުގައި ތަފާތު ވަނީ އެ ސަބަބާއި ހުރެ: ސަލީމް

އިންތިޚާބުވާ މީހުންނަކީ ރައްޔިތުންގެ ޚާދިމުން ކަމުގެ ވިސްނުން ގެންގުޅޭ ހަމައެކަނި ޕާޓީ އަކީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ކަމަށާއި ޚިދުމަތް ދިނުމުގައި އެމްޑީޕީ ތަފާތު ވަނީ އެ ސަބަބާއި ހުރެ ކަމަށް ރައްޔިތުން މަޖިލީހުގެ ހޯރަފުށީ ދާއިރާގެ ކުރީގެ މެންބަރު އަހުމަދު ސަލީމް ވިދާޅުވެއްޖެ އެވެ.

ސަލީމް އެފަދައިން ވިދާޅުވީ ހޮނިހިރު ދުވަހުގެ ރޭ އެމްޑީޕީ އިން ފޯކައިދޫގައި ބޭއްވި ހޭވައްލާ ތައްޔާރު ޖަލްސާގައި ވާހަކަދައްކަވަމުންނެވެ. އެމްޑީޕީ އާއި  އެހެނިހެން ޕާޓީތަކާއި އޮތް ތަފާތަކީ ރައްޔިތުންނަށްޓަކާ ހިތުގައި އޯގާތެރިކަން އޮތް ޕާޓީ އަކަށް އެ ޕާޓީ ވުން ކަމަށް ސަލީމް ވަނީ ވިދާޅުވެފަ އެވެ. 

އެމްޑީޕީ އަށް ވޯޓުލައިގެން ނޫނީ ރަނގަޅު ފަހި މުސްތަގްބަލެއް ނުލިބޭނެ ކަމަށް ވެސް ސަލީމް ވިދާޅުވި އެވެ. ށ.ފޯކައިދޫ އަށް ކުރީގެ ރައީސް އިބްރާހިމް މުހައްމަދު ސޯލިހު ވަޑައިގަތުމުން އެ ރަށުން ކީ ހޫނު މަރުޚަބާ ފާހަގަކުރައްވާ ސަލީމް ވިދާޅުވީ އެކަމުގެ ސަބަބުން އެމްޑީޕީ އިން ކައުންސިލް އިންތިޚާބު ކާމިޔާބުކުރުމަށް ކުރަމުންދާ މަސައްކަތަށް އުންމީދެއް ލިބުނު ކަމަށެވެ. 

މީގެ އިތުރުން ށ.ފޯކައިދޫ އޮތީ ބީވެދިޔަ އެމްޑީޕީގެ ހެޔޮ، އޯގާވެެރި ވެރިކަމަށް ބޭނުންވެފައި ކަން، ފޯކައިދޫ އަށް ކުރި ދަތުރުން އެނގުނު ކަމަށް ސަލީމް ވިދާޅުވި އެވެ. އެމްޑީޕީގެ ވެރިކަމެއް އަލުން ހޯދުމަށް އެންމެ ފުރަތަމަ ކުރަންވީ ކަމަކީ ކައުންސިލް އަދި ޑަބްލިއުޑީސީ އިންތިޚާބުގައި އެ ޕާޓީ އަށް ވޯޓު ދިނުން ކަމަށް ސަލީމް ވަނީ ވިދާޅުވެފަ އެވެ

ރައީސް ސޯލިހު އަށް މަރުޚަބާ ކިޔުމަށް އެމްޑީޕީ ނޫން ރަށަށް ލޯބިވާ މީހުން ވެސް ގޮސް ތިބި ކަމަށް ސަލީމް ވިދާޅުވި އެވެ. ރަށަށް ހެޔޮ އެދޭ މީހާ ޕާޓީ އަށް ވުރެ ބޮޑަށް އިސްކުރާނީ ރަށުގެ މަސްލަހަތުކަން ށ.ފޯކައިދޫ އިން ދައްކުވައިދީފައިވާ ކަމަށް ސަލީމް ވިދާޅުވި އެވެ. 

"މި ރަށުގެ ރައްޔިތުންނަކީ މި ރަށަށް ވާނެ އެއްޗެއް ވާން އެ ގޮތް ބައްލަވައިގެން ތިއްބަވާނެ ބައެއް ނޫނޭ ދޭހަވީ. އެހެންވީމަ އުންމީދު އާވީ. މި ރަށަށް ވެރިން ވަޑައިގެން ހާދަ ވާހަކަ އެއް ދައްކަވާފައި އެބަ އޮތޭ. މުޅިން ވެސް ބަނދަރުގެ ވާހަކަ. ރުހުން ހޯދަން ތާއީދު ހޯދަން އެންމެ ބޮޑަށް ދެއްކެވީ ބަނދަރުގެ ވާހަކަ. އެކަމަކު ހަވީރު ބަނދަރުން ދިމާވި މީހެއް ބުނި މާގިނަ ވާހަކަ ނުދައްކަވާ އެކަން ކޮށްދެއްވީ ރައީސް ސޯލިހު އޭ." ސަލީމް ވިދާޅުވި އެވެ.

ށ.ފޯކައިދޫގައި ވެސް އެހެނިހެން ކައުންސިލްތަކުގައި ވެސް ކުރިމަގު ރަނގަޅުވާނީ އެމްޑީޕީ އާއި އެކުގައި ކުރިއަށް ގޮސްގެން ކަމަށް ސަލީމް ވިދާޅުވި އެވެ. އޭގެ އިތުރުން ސަލީމް ވިދާޅުވި ގޮތުގައި މައި ސަރުކާރަށް ވުރެ ރަނގަޅަށް ރަށްރަށުގެ ކަންކަން ކުރެވޭނީ ކައުންސިލްތަކަށެވެ. އެގޮތުން މައި ސަރުކާރަށް ވުރެ ރަށު ފެންވަރުގައި ކަންކަން ކުރަން ކައުންސިލްތައް މާ ޤާބިލްކަން ކައުންސިލްތަކުން ދައްކުވައިދީފައިވާ ކަަމަށް ސަލީމް ވަނީ ވިދާޅުވެފަ އެވެ. ލާމަރުކަޒީ ނިޒާމް އިތުރަށް ފައްކާކުރަން އަދިވެސް ވަރަށް ބައިވަރު މަސައްކަތް ކުރަން ޖެހޭ ކަމަށް ސަލީމް ވިދާޅުވި އެވެ.