ވެރިކަމުގެ ބާރާއި ނުފޫޒުގައި ވެސް ކައުންސިލްގެ ހުރިހާ ގޮނޑިއަކަށް ވެރިކަން ކުރާ ޕީއެންސީ އަށް ކެންޑިޑޭޓުން ނުނެރެވުނު!

ކުރިއަށް އޮތް ކައުންސިލް އިންތިޚާބުގައި ޖުމްލަ 678 ކެންޑިޑޭޓުން އިންތިޚާބުކުރާއިރު ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ކެންޑިޑޭޓުން ނެރެވުނީ 665 ގޮނޑިއަށް ކަމަށް އިލެކްޝަންސް ކޮމިޝަންގެ މައުލޫމާތުން ހާމަ ވެއްޖެ އެވެ.

އޭގެ އިތުރުން އަންހެނުންގެ ތަރައް ޤީއަށް މަސައްކަތްކުރާ ކޮމިޓީ (ޑަބްލިޔުޑީސީ) ތަކަށް ޖުމްލަ 678 ކެންޑިޑޭޓުން އިންތިޚާބުކުރާއިރު ޕީއެންސީ އިން ވާދަ ކުރަނީ 665 ކެންޑިޑޭޓުންނެވެ.

ކައުންސިލް އަދި ޑަބްލިޔުޑީސީ ގެ އިންތިޚާބަށް އިއުލާނު ކުރުމުގެ މާކުރިން ރަށްރަށަށް ސަރުކާރުގެ އެކިވަރުގެ ނުފޫޒު ހުރި ފަރާތްތައް ހިމެނޭ ވަފުދުތައް ފޮނުވައިގެން ކެންޑިޑޭޓުން ހޯދުމުގެ މަސައްކަތް ކޮށްފައިވާކަން ފާހަގަ ކުރެވެ އެވެ.

އަންނަ އޭޕްރީލު މަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީ އަށް މަސައްކަތްކުރާ ކޮމިޓީތަކުގެ އިންތިޚާބުގައި 6 ސިޔާސީ ޕާޓީ އަކުން 1،210 ކެންޑިޑޭޓުންނާއި އަމިއްލަ ގޮތުން 401 ކެންޑިޑޭޓުން ވާދަ ކުރާ ކަމަށް އިލެކްޝަންސް ކޮމިޝަނުން ވަނީ ހާމަ ކޮށްފަ އެވެ.

ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިޚާބުގައި ވާދަ ކުރާ ޖުމްލަ ކެނޑިޑޭޓުންގެ އަދަދަކީ 2،993 އެވެ.

އިލެކްޝަންސް ކޮމިޝަނުގެ ނާއިބު ރައީސް ޢަބްދުއްރަޙްމާން ޞަލާޙް ރަޝީދު ޕީއެސްއެމް އަށް މައުލޫމާތު ދެއްވަމުން ހޯމަ ދުވަހު ވިދާޅުވީ، ކައުންސިލް އިންތިޚާބުގައި ވާދަކުުރުމުގެ ޝަރުތު ހަމަވާ ކަމަށް 1،611 ފަރާތެއްގެ އެޕްލިކޭޝަން ގަބޫލު ކޮށްފައިވާ ކަމަށެވެ.

ކައުންސިލްތަކަށް ޖުމްލަ 678 ކެންޑިޑޭޓުން އިންތިޚާބުކުރުމަށް ހަމަޖެހިފައިވާއިރު، ޕީއެންސީ އިން 665 ކެންޑިޑޭޓުން ވާދަކުރާ އިރު، ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އިން 495 ކެންޑިޑޭޓުން ވާދަ ކުރެ އެވެ. މީގެ އިތުރުން އަމިއްލަ ގޮތުން ވާދަ ކުރާ 401 ކެންޑިޑޭޓުންގެ އިތުރުން ދެން ހިމެނެނީ ކުދި ޕާޓީތަކުން ނެރޭ މަދު އަދަދެއްގެ ކެންޑިޑޭޓުންނެވެ. އެ ގޮތުން މޯލްޑިވްސް ޑިވެލޮޕްމެންޓް އެލަޔަންސް (އެމްޑީއޭ) އިން 31 ކެނޑިޑޭޓުން، ޖުމްހޫރީ ޕާޓީ އިން 8 ކެންޑިޑޭޓުން، ދަ ޑިމޮކްރެޓްސް އިން 8 ކެންޑިޑޭޓުން އަދި ޢަދާލަތު ޕާޓީ އިން 3 ކެންޑިޑޭޓުން ވާދަ ކުރެ އެވެ.

އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް  678 ކެނޑިޑޭޓުން އިންތިޚާބު ކުރުމަށް ހަމަޖެހިފައިވާއިރު، މި އިންތިޚާބަށް ހުށަހެޅި 1،611 ފޯމުގެ ތެރެއިން 1،383 ފަރާތުގެ ކެނޑިޑެންސީ ގަބޫލުކޮށްފައިވެ އެވެ. މީގެ ތެރެއިން ސިޔާސީ ޕާޓީ ތަކަށް ނިސްބަތްވަނީ، 5 ސިޔާސީ ޕާޓީ ތަމްސީލު ކުރާ 1،116 ކެނޑިޑޭޓުންނެވެ.

އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް ޕީއެންސީ އިން 658 ކެންޑިޑޭޓުން ވާދަކުރާއިރު، އެމްޑީޕީ އިން 417 ކެންޑިޑޭޓުން ވާދަ ކުރެ އެވެ. ދެން އެންމެ ގިނަ ކެންޑިޑޭޓުން ވާދަ ކުރަނީ އަމިއްލަ ގޮތުންނެވެ. އެއީ 267 ކެންޑިޑޭޓުންނެވެ. އޭގެ އިތުރުން މޯލްޑިވްސް ޑިވެލޮޕްމެންޓް އެލަޔަންސް (އެމްޑީއޭ) އިން 28 ކެނޑިޑޭޓުން، ޖުމްހޫރީ ޕާޓީ 7 ކެންޑިޑޭޓުން، ދަ ޑިމޮކްރެޓްސް 8 ކެންޑިޑޭޓުން އަދި އަދާލަތު ޕާޓީ އިން 6 ކެންޑިޑޭޓުން ވާދަ ކުރާނެ އެވެ.

އަންނަ ހަފްތާގެ ތެރޭގައި، ފެބްރުއަރީ 12 ނުވަތަ 13 ގައި ކެންޑިޑޭޓުންގެ ނަން ތަރުތީބު ކުރުމަށް ގުރުއަތު ނެގުން ކުރިއަށް ގެންދިއުމަށް ހަމަޖެހިފައިވާ ކަމަށާއި، އޭގެ ކުރިން ނަން އަނބުރާ ގެންދިޔުމުގެ ފުރުޞަތު އޮންނާނެ ކަމަށް ވެސް އިލެކްޝަންސް އިން ބުނެފައިވެ އެވެ.