ސްޓާމާގެ ހޫނު ރައްދެއް: މި ހުރީ ފަސް އަހަރަށް، އިސްތިއުފާ ނުދޭނަން

އިނގިރޭސިވިލާތުގެ ރައްޔިތުން އޭނާއާ ހަވާލު ކުރީ ފަސް އަހަރު ދުވަހުގެ މެންޑޭޓެއް ކަމަށާއި، މަޤާމުން އިސްތިއުފާ ނުދެއްވާނެ ކަމަށް އެ ޤައުމުގެ ބޮޑު ވަޒީރު ކިއާ ސްޓާމާ ވިދާޅުވެއްޖެ އެވެ. 

ސަފީރު ކަމަށް ޕީޓާ މެންޑެލްސަން އައްޔަން ކުރެއްވި މައްސަލައިގައިި އެތައް ޕްރެޝަރެއް ކުރިމަތިވެފައި ވަނިކޮށް، ބޮޑު ވަޒީރުގެ އޮފީހުން ވަނީ ސްޓާމާ އިސްތިއުފާ ނުދެއްވާނެ ކަމަށް ވިދާޅުވެފަ އެވެ. އޭގެ ފަހުން އަންގާރަ ދުވަހު ކުރިއަށް ގެންދިޔަ، ޚަރަދު ބޮޑުވުމުގެ މައްސަލައިގެ ބައްދަލުވުމެއްގައި ބައިވެރިވެ ވަޑައިގެން ސްޓާމާ ވެސް ވަނީ، މަޤާމުން އިސްތިއުފާ ނުދެއްވާނެ ކަމަށް ވިދާޅުވެފަ އެވެ. 

އިސްތިއުފާގެ ޕްރެޝަރުގެ ފަހުން ފުރަތަމަ ފަހަރަށް އާންމުންގެ ތެރޭގައި ވާހަކަ ދައްކަވަމުން ސްޓާމާ ވިދާޅުވީ، ވެރިކަން ކުރާ ލޭބާ ޕާޓީ އޮތީ ވަރަށް ބޮޑަށް އެއްބައިވެފައި ކަމަށެވެ. އެކަން ފާހަގަ ކުރައްވައި ސްޓާމާ ވިދާޅުވީ ދިރިއުޅުމުގެ އިޙުތިރާމް އާއި، ޝަރަފު އަދި އެ ފުރުސަތު ނެތް ނަމަ، އެކަމާ ދެކޮޅަށް ހަނގުރާމަ ވެސް ކުރަން ޖެހޭ ކަމަށެވެ. 

މީގެ އިތުރުން ބޮޑު ވަޒީރު ސްޓާމާ ވިދާޅުވީ، އޭނާގެ ކެބިނެޓު އެކުލަވާލެވިފައި އޮތީ ވަރަށް ތަފާތު ވިސްނުމާއި، ތަފާތު ޚިޔާލު ތަކުގެ މީހުންގެ މައްޗަށް ކަމަށެވެ. އެއީ ވަރަށް އުފާވާ އަދި ފަޚުރުވެރިވެ ވަޑައިގަންނަވާ ކަމެއް ކަމަށް ފާހަގަ ކުރައްވައި ސްޓާމާ ވިދާޅުވީ، ސަރުކާރު ދެމި އޮތީ އިނގިރޭސިވިލާތުގެ ރައްޔިތުންނަށް ފުރިހަމަ އަށް ޚިދުމަތް ކުރުމުގެ މަޤުސަދުގައި ކަމަށެވެ. 

ހަމަ އެއާ އެކު، އިނގިރޭސިވިލާތުގެ ރައްޔިތުން ލޭބާ ޕާޓީ އަށް ހަވާލު ކޮށްފައި ވަނީ ވަރަށް ބޮޑު މަސައްކަތެއް ކަމަށް ވެސް ސްޓާމާ ވިދާޅުވި އެވެ. އޭނާ ވިދާޅުވީ ރައްޔިތުން ހަވާލު ކުރީ ފަސް އަހަރު ދުވަހުގެ މެންޑޭޓެއް ކަަމަށާއި، އެ މަސައްކަތުން އެންމެ ހިނދު ކޮޅަކަށް ވެސް ދުރަށް ވަޑައި ނުގަންނަވާނެ ކަމަށެވެ. ކުރިމަތިވާ ކޮންމެ ކަމަކާ ދެކޮޅަށް ހަނގުރާމަ ކުރައްވާނެ ކަމުގެ އިންޒާރު ދެއްވަމުން ސްޓާމާ ވަނީ، ޤައުމު ދޫކޮށް ވަޑައި ނުގަންނަވާނެ ކަމަށް ވެސް ވިދާޅުވެފަ އެވެ. 

ލޭބާ ޕާޓީ އިން ބަދަލު ތަކެއް ގެންނަން ޖެހޭ ކަމަށް ބޮޑު ވަޒީރު ޤަބޫލު ކުރައްވަ އެވެ. އެއާ އެކު ވިދާޅުވީ، އެ ޕާޓީ އިން ޕާޓީގެ ސްޓްރެޓެކީ ބަދަލު ކުރަން ޖެހޭ ކަމަށާއި، ފަހުގެ ދުވަސް ތަކުން އެކަން ސާފުވެގެން ގޮސްފައިވާ ކަމަށެވެ. އެކަން ފާހަގަ ކުރައްވައި ސްޓާމާ ވިދާޅުވީ ބޭރުގައި ތިބި ބަޔަކު ދައްކަމުން އަންނަ ވާހަކަ އިން އެކަން ނުކުރެވޭނެ ކަމަށާއި، އެކަން ކުރެވޭނީ ޕާޓީގެ އެތެރޭގައި ފުރިހަމަ އަށް މަޝްވަރާ ކޮށްގެން ކަމަށެވެ. 

ސްޓާމާގެ ލީޑާޝިޕާ މެދު ސުވާލު ތަކެއް އުފެދިފައި ވީ ނަމަވެސް، ސްޓާމާ ވިދާޅުވީ ކުރިއަށް އޮތް އިންތިޚާބާ ހަމައަށް ލޭބާ ޕާޓީ ދާނީ އޭނާގެ ލީޑަރު ކަމުގެ ދަށުން ކަމަށެވެ. އެއާ އެކު، ޕާޓީ އިތުރަށް ކުރިއަރުވައި، ރައްޔިތުންނަަށް ލުއި ފަސޭހަ ދިރިއުޅުމެއް ހޯދުމާ އެކު، ޤައުމު ހަމަ މަގުގައި ކުރިއަށް ގެންދިޔުމުގެ މަސައްކަތް ކުރައްވާނެ ކަމަށް ވެސް ސްޓާމާ ވިދާޅުވި އެވެ.

ސްޓާމާ އަށް އެތައް ޕްރެޝަރެއް ކުރިމަތިވެފައިވާއިރު، އޭނާގެ ސަރުކާރުގެ ކެބިނެޓުގައި ހިމެނި ވަޑައިގަންނަވާ އެންމެހާ މިނިސްޓަރުން ވަނީ ސްޓާމާ ދިފާއު ކުރައްވައިފަ އެވެ.