ބޮޑު ވަޒީރު ސްޓާމާ އިސްތިއުފާ ނުދެއްވާނެ ކަމަށް ބުނެފި

އިނގިރޭސިވިލާތުގެ ބޮޑު ވަޒީރު ކިއާ ސްޓާމާ، މަގާމުން އިސްތިއުފާ ނުދެއްވާނެ ކަމަށް ހާމަ ކޮށްފި އެވެ. 

އެމެރިކާގެ ޖިންސީ ކުށްވެރިޔާ ޖެފްރީ އެޕްސްޓީންއާ ގުޅުން އޮތްކަން އެނގިހުރެ، ޕީޓާ މެންޑެލްސަން ސަފީރު ކަމަށް އައްޔަން ކުރި މައްސަލައިގައި ސްޓާމާ އަށް ވަނީ އެތައް ޕްރެޝަރެއް އަމާޒުވެފަ އެވެ. އެކަމުގެ ތެރެއިން ސްޓާމާ އިސްތިއުފާ ދިނުމަށް ވެސް އެތައް ބަޔަކު އަންނަނީ ގޮވާލަމުންނެވެ. 

ހޯމަ ދުވަހުގެ ވަގުތެއްގައި ބޮޑު ވަޒީރުކަމުން ސްޓާމާ އިސްތިއުފާ ދެއްވަފާނެ ކަމުގެ އަޑު ތަކެއް ފެތުރެމުން އަންނަނިކޮށް، ބޮޑު ވަޒީރުގެ އޮފީން ޑައުނިން ސްޓްރީޓް އިން ބުނެފައި ވަނީ، ބޮޑު ވަޒީރު އިސްތިއުފާ ނުދެއްވާނެ ކަމަށެވެ. އޭގެ ބަދަލުގައި ބޮޑު ވަޒީރު ގެންދަވަނީ މަސައްކަތަކަށް ފޯކަސް ކުރައްވައި، ކަންކަން ފުރިހަމަ ކުރައްވަމުން ކަމަށް އެ އޮފީހުން ބުނެފައިވެ އެވެ. 

މީގެ އިތުރުން ބޮޑު ވަޒީރުގެ ތަރުޖަމާނު ވިދާޅުވީ ސަރުކާރުގެ ފުރިހަމަ ކޮންޓްރޯލް ބޮޑު ވަޒީރުގެ އަތްޕުޅުގައި އޮތް ކަމަށެވެ. ސަރުކާރުގެ ވަޒީރުންގެ ފުރިހަމަ އިތުބާރާއި ތާއީދު ވެސް ބޮޑު ވަޒީރަށް އެބަ އޮތް ކަމަށާއި، ބޮޑު ވަޒީރު ހުންނެވީ ޔަގީންކަމާއި، އިތުބާރާ އެކު ކަމަަށް އޭނާ ވިދާޅުވި އެވެ.

ހޯމަ ދުވަހު ޑައުނިން ސްޓްރީޓްގެ މުވައްޒަފުންނާ ވާހަކަ ދައްކަވަމުން ސްޓާމާ ވިދާޅުވެފައި ވަނީ، މަސައްކަތައިގެން ކުރިއަށް ދިޔުމަށް އެދޭ ކަމަށާއި، އޭނާގެ ސަރުކާރުން ޙާސިލު ކުރަން ބޭނުންވާ ކަންކަން ހުރި ކަމަށެވެ. އެޕްސްޓީންއާ ގުޅުމެއް އޮތް މެންޑެލްސަން ސަފީރު ކަމަށް އައްޔަން ކުރެެވުމަކީ ހިތާމަ ކުރައްވާ ކަމެއް ކަމަށާއި، އެކަމާ މައާފަށް އެދިވަޑައިގެންފައި ވާނެ ކަމަށް ވެސް ސްޓާމާ ވިދާޅުވެފައިވެ އެވެ. 

މީގެ އިތުރުން ހޯމަ ދުވަހު ސްޓާމާ ވަނީ ލޭބާ ޕާޓީގެ މެމްބަރުންނާ ވަކިން ބައްދަލު ކުރައްވަން ނިންމަވައިފަ އެވެ. އެގޮތުން އެ ބައްދަލުވުމުގައި އޭނާގެ ތާއީދު ދަމަހައްޓައި، ސަރުކާރު ކުރިއަށް ގެންދިޔުމާ ގުޅޭ ގޮތުން ސްޓާމާ ޕާޓީގެ މެމްބަރުންނާ މަޝްވަރާ ކުރައްވާނެ އެވެ.