ޕްރިންސް ވިލިއަމް ސައުދީ އަށް ކުރައްވާ ފުރަތަމަ ރަސްމީ ދަތުރުފުޅުގައި ރިޔާޟް އަށް ވަޑައިގެންފި

އިނގިރޭސިވިލާތުގެ ވަލީއަހުދު ޕްރިންސް ވިލިއަމް، ސައުދީ އަރަބިއްޔާއަށް ކުރައްވާ ފުރަތަމަ ރަސްމީ ދަތުރުފުޅުގައި ހޯމަ ދުވަހު ރިޔާޟަށް ވަޑައިގެންފި އެވެ.

ރިޔާޟަށް ވަޑައިގަތުމަށްފަހު އިންސްޓަގްރާމްގައި ހިއްސާކުރެއްވި ފޮޓޯތަކާއެކު ވިލިއަމް ވިދާޅުވީ، ރިޔާޟްގެ ޑެޕިއުޓީ ގަވަރުނަރު، ހިޒް ރޯޔަލް ހައިނަސް ޕްރިންސް މުހައްމަދު ބިން އަބްދުލްރަހްމާން ބިން އަބްދުލްއަޒީޒް ވިދާޅުވި ހޫނު މަރުހަބާއަށްޓަކައި އުފާކުރައްވާ ކަމަށެވެ.

ހޯމަ ދުވަހުގެ ފަހުގެ ވަގުތެއްގައި، ސައުދީގެ ވަލީއަހުދު މުހައްމަދު ބިން ސަލްމާން، އިނގިރޭސި ވަލީއަހުދު ވިލިއަމްއާ ބައްދަލުކުރައްވައި، ޔުނެސްކޯގެ ދުނިޔޭގެ ތަރިކައިގެ ދަފްތަރުގައި ހިމެނޭ އައް-ތުރައިފް އަށް ޒިޔާރަތްކުރައްވައި އެތަން ބައްލަވާލެއްވުމަށް ވަނީ ހަމަޖެހިފަ އެވެ. މި ޒިޔާރަތަށްފަހު ދެ ބޭފުޅުންގެ ރަސްމީ ބައްދަލުވުމެއް ބޭއްވުމަށް ވެސް ވަނީ ނިންމާފަ އެވެ.

އަންނަ ބުދަ ދުވަހުގެ ނިޔަލަށް ކުރިއަށްދާ މި ދަތުރުފުޅުގެ މައިގަނޑު މަގްސަދަކީ، ދެ ގައުމުގެ ދެމެދުގައި ސިޔާސީ ގުޅުން ގާއިމުކުރިތާ 100 އަހަރު ފުރުން ފާހަގަކުރުމުގެ ކުރިން، ވިޔަފާރިއާއި ހަކަތަ އަދި އިންވެސްޓްމަންޓްގެ ދާއިރާއިން އޮތް ގުޅުން އިތުރަށް ބަދަހިކުރުމެވެ.

ތިމާވެށީގެ ދާއިރާގައި ފާހަގަކޮށްލެވޭ މަސައްކަތްތަކެއް ކުރައްވާ ޕްރިންސް ވިލިއަމް، މި ދަތުރުފުޅުގައި ސައުދީގެ ތާރީޚީ ސިޓީއެއް ކަމަށްވާ އަލްއުލާ އަށް ޒިޔާރަތްކުރައްވައި، އެ ސަރަހައްދު ހިމާޔަތްކުރުމަށް ކުރަމުންދާ މަސައްކަތްތައް ބައްލަވާލައްވާނެ ކަމަށް ކެންސިންގޓަން ޕެލަސް އިން މައުލޫމާތުދެ އެވެ.

ސައުދީ އަރަބިއްޔާއަކީ މެދުއިރުމަތީގައި އިނގިރޭސިވިލާތުގެ އެންމެ މުހިންމު ސްޓްރެޓީޖިކް ބައިވެރިޔާގެ ގޮތުގައި ބެލެވޭ ގައުމެކެވެ. އެގޮތުން 2025 ވަނަ އަހަރުގެ ޖޫން މަހުގެ 30 ވަނަ ދުވަހުގެ ނިޔަލަށް، ފާއިތުވި އެއް އަހަރު ދުވަހުގެ ތެރޭގައި ދެ ގައުމުގެ ދެމެދުގައި ކުރެވުނު މުދަލާއި ޚިދުމަތުގެ ވިޔަފާރީގެ އަދަދު 17.2 ބިލިއަން ޕައުންޑް (23.5 ބިލިއަން އެމެރިކާ ޑޮލަރު) އަށް އަރަ އެވެ.