އިސްތިއުފާގެ އަޑު ގަދަވެފައި ވަނިކޮށް، ބޮޑު ވަޒީރު ސްޓާމަރ ޤައުމާ މުޚާތަބު ކުރައްވައި، ޕާޓީގެ މެމްބަރުންނާ ބައްދަލު ކުރައްވަނީ

އިނގިރޭސިވިލާތުގެ ބޮޑު ވަޒީރު ކިއާ ސްޓާމަރގެ އިސްތިއުފާ އަށް ގޮވާލުން ގިނަ ވެފައި ވަނިކޮށް، ޤައުމާ މުޚާތަބު ކުރައްވައި، އަދި އަމިއްލަ ޕާޓީގެ މެމްބަރުންނާ ބައްދަލު ކުރައްވަން ނިންމަވައިފި އެވެ.

އެމެރިކާގެ ޖިންސީ ކުށްވެރިޔާ ޖެފްރީ އެޕްސްޓީންއާ ގާތް ގުޅުމެއް އޮތް، ޕީޓަރ މެންޑެލްސަން އަށް ސަފީރުކަން ދިން މައްސަލައިގައި ސްޓާމާ ވަނީ ވަރަށް ބޮޑަށް ހޫނު ފެނަށް ވެއްޓިފަ އެވެ. އެ މައްސަލައިގައި ސްޓާމަރގެ ޗީފް އޮފް ސްޓާފް ވެސް އިސްތިއުފާ ދެއްވާފައިވާއިރު، ލޭބަރ ޕާޓީގެ މެމްބަރުންގެ މެދުގައި ވެސް ނުތަަނަވަސްކަން ވަނީ އުފެދިފަ އެވެ.

އިނގިރޭސި މީޑިއާ ތަކުގައި ބުނެފައިވާ ގޮތުން ހޯމަ ދުވަހުގެ ވަގުތެއްގައި ބޮޑު ވަޒީރު ސްޓާމަރ ޤައުމާ މުޚާތަބު ކުރައްވާނެ އެވެ. އިނގިރޭސި ބޮޑު ވަޒީރުގެ ރަސްމީ އޮފީސް، ޑައުނިންގ ސްޓްރީޓް ގައި ހުންނަވާ ޤައުމާ މުޚާތަބު ކުރައްވާނެ ކަމަށް ރިޕޯޓު ކޮށްފައިވެ އެވެ. އަދި އެއަށް ފަހު، ސްޓާމަރ ލީޑަރުކަން ކުރައްވާ ލޭބަރ ޕާޓީގެ މެމްބަރުންނާ ހޯމަ ދުވަހުގެ ރޭ ބައްދަލު ކުރައްވާނެ ކަމަށް ވެސް ރިޕޯޓު ކޮށްފައިވެ އެވެ. މިއީ ލޭބަރ ޕާޓީގެ ތެރޭގައި ސްޓާމަރ އަށް އޮތް ތާއީދު ދަމަހައްޓައި، މެމްބަރުންގެ އިތުބާރު އަލުން ހޯއްދެއްވުމަށް ބޮޑު ވަޒީރު ކުރައްވާ ކަމެއް ކަމަށް ބުނެފައިވެ އެވެ. 

ލޭބަރ ޕާޓީގެ އިސް މެމްބަރަކު ވިދާޅުވި ގޮތުގައި، ސްޓާމަރ މިހާރު ޖެހިވަޑައިގެންފައި ވަނީ ސިޔާސީ މަސްރަހު ވަރަށް ބޮޑަށް ސާފު ކުރުމަށެވެ. އެކަން ކުރުމަށްޓަކައި އޭނާ ގިނަ ފިޔަވަޅު ތަކެއް އަޅުއްވަން ޖެހޭނެ ކަމަށާއި، ޕާޓީގެ މެމްބަރުންގެ އިތުބާރާއި، ޤައުމުގެ ރައްޔިތުންގެ އިތުބާރު ހޯދަން ޖެހޭނެ ކަމަށް ފާހަގަ ކޮށްފައިވެ އެވެ. ބޮޑު ވަޒީރުގެ އޮފީހުގެ މަސްދަރަކުން ބުނެފައިވާ ގޮތުގައި، މެންޑެލްސަންގެ މައްސަލައިގައި ފާހަގަވި ކަންކަަމަށް ހައްލު ހޯދުމުގެ މަސައްކަތް ހުސްވި ހަފުތާގައި ވަނީ ފަށައިފަ އެވެ. 

މިކަމާ ގުޅޭ ގޮތުން ޔޯކް ސެންޓްރަލްގެ މެމްބަރު ރޭޗަލް މަސްކެލް ވިދާޅުވީ، ބޮޑު ވަޒީރުގެ ޗީފް އޮފް ސްޓާފްގެ މަގާމުގައި ހުންނެވި މޯގަން މެކްސްވީނީ އިސްތިއުފާ ދިނުމަކީ ފެށުމެއް ކަމަށެވެ. ނަމަވެސް، ޕާޓީގެ ތެރޭގައި ނިންމުންތައް ނިންމަމުންދާ ގޮތް ސާފު ވާން ޖެހޭ ކަމަށް އޭނާ ވިދާޅުވި އެވެ. ޚާއްސަކޮށް އޭނާ ވިދާޅުވީ މެކްސްވީނީ އާއި މެންޑެލްސަން ހިންގި "ކިޗަން ކެބިނެޓު"ގެ ދައުރާއި، ޕާޓީގެ އެތެރޭގައި އޮތް ވަކި ޕެކްޝަން ތަކަކަށް ތާއީދު ކުރުމުގެ ސަގާފަތް ނައްތާލައި، އަދި ހުރިހާ މެމްބަރުންގެ އަޑު އަހާ ސިޔާސަތެއް ޤާއިމު ކުރަން ޖެހޭ ކަމަށެވެ. 

ބައެއް މެމްބަރުން ބޮޑު ވަޒީރު ސްޓާމަރގެ އިސްތިއުފާ އަށް ގޮވާލަމުން އަންނައިރު، ލިވަޕޫލް ވެސްޓް ޑާބީގެ މެމްބަރު އިއާން ބާން ވިދާޅުވީ، ހަމައެކަނި އިސްތިއުފާ ދެއްވުމަކުން މައްސަލަ ނުނިމޭނެ ކަމަށެވެ. އޭނާ ވިދާޅުވީ، ބޮޑު ވަޒީރު އަމިއްލަފުޅަށް މަގާމުން ދުރުވާންވީތޯ ވިސްނަވަން ޖެހޭ ކަމަށެވެ. ސްޓާމަރގެ އިސްތިއުފާ އަށް މެމްބަރުން ގޮވާލަމުން އަންނައިރު، ބައެއް މެމްބަރުން އޭނާ އަށް ތާއީދު ކޮށްފައިވެ އެވެ.