ޑރ. ވަހީދު ދައުލަތުގެ ސިއްރުތައް ވިއްކާލައްވައި، ރަށްތައް އަމިއްލަ ކުރެއްވުމަށް ރޭއްވެވި މަކަރުވެރި ރޭވުންތައް!

ދިވެހިރާއްޖޭގެ ކުރީގެ ރައީސް އަދި ނައިބު ރައީސްކަން ކުރައްވާފައިވާ ޑރ. މުޙައްމަދު ވަޙީދު ޙަސަން މަނިކު، އެމެރިކާގެ ކުޑަކުދިންގެ ޓްރެފިކިންގ ނެޓްވާރކެއް ހިންގިކަމަށް ސާބިތުވެފައިވާ ޖެފްރީ އެޕްސްޓައިންއާ ގާތް ގުޅުމެއް ބާއްވަވައި، ދައުލަތުގެ އެންމެ މަތީ ސިއްރުތަކާއި ރައްޔިތުންގެ މުދާ ނަހަމަ ގޮތުގައި ބޭނުންކުރެއްވުމަށް މަސައްކަތްކުރަށްވާފައި ވާކަން އެމެރިކާގެ ކަމާބެހޭ އިދާރާތަކުން ހާމަކޮށްފައިވާ ލިޔެކިޔުންތަކުން ވަނީ ކަށަވަރު ވެފައެވެ. މިކަމާ ގުޅިގެން ސަރުކާރުގެ ސްޕެޝަލް އެންވޯއީގެ މަޤާމުން އެމަނިކުފާނު އިސްތިއުފާ ދެއްވި ނަމަވެސް، މިއީ ހަމައެކަނި އިސްތިއުފާއަކުން ނިންމާލެވޭނެ ވަރުގެ ކަމެއް ނޫންކަން މިހާރު ވަނީ ހާމަވެފައެވެ. ގިނަބަޔަކު އެދަނީ އެކަމަށް ގޮވާވެސް ލަމުންނެވެ.

ދައުލަތުގެ ސިއްރުތައް ބޭރުގެ މީހަކަށް ހާމަކުރުންލީކުވެފައިވާ އީމެއިލްތަކުން އެނގޭ ގޮތުގައި، 2013 ވަނަ އަހަރުގެ ޖެނުއަރީ މަހު، ރައީސުލްޖުމްހޫރިއްޔާގެ މަޤާމުގައި ހުންނަވައިގެން ޑރ. ވަހީދު ވަނީ ވަޒީރުންގެ މަޖިލީހުގެ ސިއްރު މަޝްވަރާތައް އެޕްސްޓައިންއާ ހިއްސާކުރައްވާފައެވެ. އޭރުގެ ފިނޭންސް މިނިސްޓަރު އަބްދުﷲ ޖިހާދަށް ލިބުނު 4 ބިލިއަން ޑޮލަރުގެ ޑިޕޮޒިޓް ސްކީމަކާ ގުޅޭގޮތުން، ޤައުމީ ސަލާމަތާއި އިޤްތިޞާދާ ގުޅިފައިވާ ސިއްރު މައުލޫމާތު، ކުށުގެ ރެކޯޑު އޮތް ބޭރު މީހަކާ ހިއްސާކުރަށްވައި އޭނާގެ ލަފަޔަށް އެދިވަޑައިގެންފައިވެއެވެ. މީގެ އިތުރުން ދައުލަތުން ހޯދަން މަސައްކަތްކުރި 500 މިލިއަން ޑޮލަރުގެ ލޯނުގެ ތަފްސީލުތައްވެސް ވަނީ ހިއްސާކުރައްވާފައެވެ. މިއީ ދައުލަތުގެ އިސްވެރިއެއްގެ ފަރާތުން ފެނިގެންވާނެ ކަންކަމެއް ނޫނެވެ.

ޕްރޮޖެކްޓް 1: ފުއްގިރި" – އަމިއްލަ މަންފާއަށް ރަށެއް ވިއްކާލަން އުޅުން

އެންމެ ބޮޑަށް ފާހަގަކޮށްލެވޭ ކަމަކީ، ފަހުން އެމްއެމްޕީއާރުސީގެ ޚިޔާނާތުގެ މުހިއްމު ރަށެއްގެ ގޮތުގައި ފާހަގަވި "ރ. ފުއްގިރި"، ޑރ. ވަހީދުގެ "ޕާރސަނަލް ޕްރޮޖެކްޓެއް" ގެ ގޮތުގައި އެޕްސްޓައިންއަށް ހުށަހެޅުއްވިކަމެވެ.

މި ރަށުގައި 10 ވިލާގެ އެކްސްކްލޫސިވް ރިސޯޓެއް ހަދައި، މުއްސަނދި ރަޝިޔާ މީހުންނާއި އަރަބި ޝާހީ އާއިލާތަކަށް ވިއްކުމަށް ރޭއްވެވިއެވެ."މި ރީތި ކުޑަ ރަށަކީ ކޮންމެ ކޮންމެ މީހަކަށް ވިއްކާލެވޭ ވަރަށްވުރެ އަގުހުރި ރަށެއް" ކަމަށް ވިދާޅުވެ، މި ޕްރޮޖެކްޓުގައި އަމިއްލަފުޅަށް ބައިވެރިވެވަޑައިގަންނަވަން ބޭނުންފުޅުވާކަން ވަނީ ހާމަކުރައްވާފައެވެ.

"ޕްރޮޖެކްޓް 2: އިންނަރެހާ" އަދި ޤާނޫނީ ބާރުގެ ނަހަމަ ބޭނުން

މީގެ އިތުރުން "އިންނަރެހާ" ކިޔާ ފަޅު ރަށްތަކެއްގެ ކްލަސްޓާއެއް ތަރައްޤީކުރުމަށް 400 މިލިއަން ޑޮލަރުގެ މަޝްރޫޢެއްވެސް ހުށަހެޅުއްވިއެވެ. މިކަމުގައި "ދީދީ" ނަމަކަށް ކިޔާ ވިޔަފާރިވެރިޔަކާ ގުޅިގެން، އިންވެސްޓަރުގެ އަތުން އެއްވެސް ޚަރަދަކާ ނުލައި 40% ހިއްސާ ހޯދުމަށް ޑރ. ވަހީދު ޝަރުތުކުރެއްވިއެވެ. އަދި އޭރު އާންމުވެފައިނުވާ "99 އަހަރަށް ރަށްތައް ކުއްޔަށް ދޫކުރުމުގެ" ޤާނޫނީ ބަދަލުތައް އަންނަން އުޅޭކަމުގެ ސިއްރު މައުލޫމާތު އެޕްސްޓައިންއަށް ދެއްވައި، ނާޖާއިޒު ފައިދާ ނެންގެވުމަށް މަގުފަހިކޮށްދެއްވިއެވެ.

އެޕްސްޓައިންގެ ޝިކާރައަކަށްވީ ކުދިންނަށް ނިސްބަތްކުރެއްވުން

މި ހުރިހާ ވިޔަފާރީގެ މުއާމަލާތްތަކެއްގެ ތެރެއިން، ޑރ. ވަހީދު ވަނީ އެޕްސްޓައިން ގެންގުޅުނު ޅަ އަންހެން ކުދިންނަށް ނިސްބަތްކޮށް "ބިއުޓިފުލް ސްޓޫޑެންޓްސް" (ރީތި ދަރިވަރުން) އޭ ވިދާޅުވެ ސަލާމް ފޮނުއްވާފައެވެ. މިއީ އެޕްސްޓައިންގެ ޖަރީމާތައް އެނގިހުރެ އެކަމަށް ހިތްވަރުދިނުން ކަމުގައި ބެލެވޭ، އަޚުލާޤީ ގޮތުން ދަށު ދަރަޖައިގެ އަމަލެކެވެ.

ސަރުކާރުން މިކަން ތަޙުޤީޤުކުރަންޖެހޭ

މިއީ ހަމައެކަނި ސިޔާސީ ބޭފުޅެއްގެ އަބުރާ ގުޅިފައިވާ ކަމެއް ނޫނެވެ. މިއީ ދިވެހި ދައުލަތުގެ ސިޔާދަތާއި، ރައްޔިތުންގެ މުދަލާއި، ޤައުމީ ސަލާމަތާ ގުޅިފައިވާ ސީރިއަސް މައްސަލަތަކެކެވެ. ޑރ. ވަހީދުގެ މި ޢަމަލުތަކަކީ ކޮރަޕްޝަނާއި، މަޤާމުގެ ނުފޫޒު ބޭނުންކުރުމާއި، އަދި ދައުލަތުގެ ސިއްރުތައް ބޭރުގެ ފަރާތްތަކަށް ވިއްކާލުން ކަމަށް ބެލެވޭތީ، މިކަންކަން "ޚިޔާނާތް" (Treason) ނުވަތަ ބޮޑެތި ޖިނާއީ ކުށްތަކުގެ ގޮތުގައި ތަޙުޤީޤުކުރުމަށް ދައުލަތުގެ ކަމާބެހޭ އިދާރާތަކުން ކުރުމަށް ރަޢީސް ޑރ. މުއިއްޒު ކުރައްވަން ޖެހެނޭ ކަމެކެވެ.

ރައީސުލްޖުމްހޫރިއްޔާކަން ކުރައްވާފައިވާ ބޭފުޅަކު، ރައްޔިތުންގެ އިތުބާރަށް ޚިޔާނާތްތެރިވެ، އަމިއްލަ މަންފާއަށްޓަކައި ޤައުމުގެ ރަށްތައް ބޭރުގެ ކުށްވެރިންނަށް ވިއްކާލަން އުޅުމަކީ ދިވެހި ރައްޔިތުން ދުވަހަކުވެސް މާފުކުރާނެ ކަމެއް ނޫނެވެ. އެހެންކަމުން، މި މައްސަލަ ބަލައި، ޑރ. ވަހީދު ޖަވާބުދާރީ ކުރުވުމަށް މި ސަރުކާރަށްޖެހެނެ އެވެ.