ބޮޑު ވަޒީރުކަން ބޭނުމެއް ނޫން، މިއީ ލޭބާ ޕާާޓީ އަށް ބަދަލު ތަކެއް ގެންނަންވީ ވަގުތު: އެނާޖީ މިނިސްޓަރު މިލިބޭންޑް

އިނގިރޭސިވިލާތުގެ ބޮޑު ވަޒީރު ކިއާ ސްޓާމާއާ ވާދަކުރައްވައި ބޮޑު ވަޒީރުކަން ހޯދަން ބޭނުންފުޅު ނުވާ ކަމަށާއި، މިއީ ލޭބާ ޕާޓީ އަށް ބަދަލު ތަކެއް އަންނަންވީ ވަގުތު ކަމަށް، އެ ޤައުމުގެ އެނާޖީ މިނިސްޓަރު އެޑްވާޑް މިލިބޭންޑް ވިދާޅުވެއްޖެ އެވެ. 

ބީބީސީގެ ޕްރޮގްރާމެއްގައި ވާހަކަ ދައްކަވަމުން މިލިބޭންޑް ވަނީ، ވެރިކަން ކުރާ ލޭބާ ޕާޓީގެ ލީޑާޝިޕް އަށް ގޮން ޖައްސަވައި، މިހާރުގެ ލީޑާޝިޕްއާ ދެކޮޅަށް އޭނާ ނިކުންނަވާނެ ކަމަށް ދެކެވޭ ވާހަކަތައް ދޮގު ކުރައްވައިފަ އެވެ. 

އިނގިރޭސިވިލާތުގެ ބޮޑު ވަޒީރު ކަމަށް ވަޑައިގެންނެވުމުގެ އެއްވެސް ޝައުޤުވެރި ކަމެއް އޮތްތޯ ސުވާލު ކުރުމުން މިލިބޭންޑް ވިދާޅުވީ، އޭނާގެ އެފަދަ އެއްވެސް ޝައުޤުވެރި ކަމެއް ނެތް ކަމަށާއި، އެކަން ބޭނުން ނުވާ ކަމަށެވެ. އަދި މީގެ ކުރިން ވެސް އެ ވާހަކަ ހިއްސާ ކޮށްފައި ވާނެ ކަމަށް އޭނާ ވިދާޅުވި އެވެ.

ލޭބާ ޕާޓީގެ ސަރުކާރުގެ އެތެރެއިން ފެންނަނީ، މީގެ ކުރިން ކޮންޒަވޭޓިވް ޕާޓީގެ އެތެރެއިން ވެސް ފެނުނު ކަހަލަ މަންޒަރެއް ކަމަށް ޕްރެޒެންޓަރު ފާހަގަ ކުރުމުން، މިލިބޭންޑް ވިދާޅުވީ އާންމުންގެ ކަންބޮޑުވުން ހުރި ސަބަބުން އޭނާ އަށް ވިސްނޭ ކަމަށެވެ. ނަމަވެސް، ލޭބާ ޕާޓީގެ ސަރުކާރަކީ ކޮންޒަވޭޓިވް ޕާޓީގެ ސަރުކާރާ އެއްގޮތް ސަރުކާރެއް ނޫން ކަމަށް މިލިބޭންޑް ވަނީ ވިދާޅުވެފަ އެވެ. 

މީގެ އިތުރުން ބޮޑު ވަޒީރުގެ މަގާމުގައި ސްޓާމާ އަށް ދެން ހުންނެވޭނީ ކިހާ މުއްދަތަކަށްތޯ ސުވާލު ކުރުމުން މިލިބޭންޑް ވިދާޅުވީ، ހޯމަ ދުވަހަކީ ބޮޑު ވަޒީރަށް ނުރައްކާތެރި ވަގުތު ކޮޅެއް ކުރިމަތިވި ދުވަހެއް ކަމަށް ޤަބޫލު ކުރައްވާ ކަމަށެވެ. އެހެން ނަމަވެސް، ލޭބާ ޕާޓީ އިން ނިންމާފައި ވަނީ ލީޑާޝިޕް ބަދަލު ކުރުމުގެ ހަލަބޮލި ކަމުގެ ތެރެއަށް ދިޔުމުގެ ބަދަލުގައި، މިހާރުގެ ލީޑަަރަށް ތާއީދު ކޮށްގެން ކުރިއަށް ދާން ކަމަށް އޭނާ ވިދާޅުވެފައިވެ އެވެ. 

ސްޓާމާގެ ދިފާއުގައި ހޯމަ ދުވަހު އެކްސްގައި ޕޯސްޓު ވެސް ކުރެެއްވި މިލިބޭންޑް ވިދާޅުވީ، ބޮޑު ވަޒީރު ސްޓާމާ އަކީ ރައްޔިތުންގެ ސާފު އަޣުލަބިއްޔަތުން، ބޮޑު މެންޑޭޓަކާ އެކު އިންތިޚާބުވެފައި ހުންނެވި ބޭފުޅެއް ކަމަށެވެ. އަދި ސަރުކާރުގެ ކަންކަން ރަނގަޅުކޮށް، ސަރުކާރު ހިންގައި ހަނެ، ޤައުމުގެ ކަންކަން ރަނގަޅު މިސްރާބުގައި ކުރިއަށް ގެންދިޔުމަށް ބޮޑު ވަޒީރު ސްޓާމާ އަށް ވަގުތު ދެއްވަން ޖެހޭ ކަމަށް ވެސް އޭނާ ވަނީ ވިދާޅުވެފަ އެވެ.  

މީގެ އިތުރުން އެ ޕްރޮގްރާމްގައި މިލިބޭންޑް ވިދާޅުވީ، މިއީ ލޭބާ ޕާޓީ އަށް ބަދަލު ތަކެއް ގެންނަން ޖެހޭ ވަގުތެއް ަކމަށެވެ. އެގޮތުން ޕާޓީގެ އެތެރޭގެ މަސްލަޙަތު ތަކަަށް ވުރެ ބޮޑަށް، މުޅި ޤައުމުގެ މަސްލަޙަތަށް އިސްކަން ދީގެން މަސައްކަތް ކުރަން ޖެހޭ ކަމަށް އޭނާ ވިދާޅުވި އެވެ. ބޮޑު ވަޒީރުގެ މަގާމުގައި ދެން ސްޓާމާ އަށް މާ ގިނަ ދުވަހު ނުހުންނެވޭނެ ކަމަށް ބުނެ ދައްކަމުން އަންނަ ވާހަކަ ތަކަށް ރައްދު ދެއްވައި މިލިބޭންޑް ވިދާޅުވީ، ސްޓާމާ އަކީ ވަރަށް ބޮޑެތި ގޮންޖެހުން ތަކުން އަރައި ގަނެފައިވާ، ވަރަށް ވަރުގަދަ ލީޑަރެއް ކަމަށެވެ. 

މި ވަގުތަކީ އިނގިރޭސިވިލާތުގެ ސަރުކާރުގެ އެތެރޭގެ ހަމަނުޖެހުންތަކާ ގުޅޭ ގޮތުން ގިނަ ފާޑު ކިޔުން ތަކެއް އަމާޒުވަމުން އަންނަ ވަގުތެކެވެ. ނަމަވެސް، އެނާޖީ މިނިސްޓަރުގެ ވާހަކަ އިން ދޭހަވަނީ، ސަރުކާރުގެ އިސް ސަފުގައި ތިއްބެވި ބޭފުޅުން އަދި ވެސް ތިއްބެވީ ބޮޑު ވަޒީރު ސްޓާމާ އަށް ތާއީދު ކޮށްގެން ކަމެވެ.