ދެ އިންތިޚާބު އެއްކޮށްލުމަކީ ރައްޔިތުންނާއި ތަރައްޤީ އާއި ހައްތަހާ ދުރުކުރުން، މިއީ އަތޮޅު ތެރެއަށް ދެވޭ ދެރަ އެއް: ޒިޔާދު

ދެ އިންތިޚާބު އެއްކޮށްލުމަކީ ރައްޔިތުންނާއި ތަރައްޤީ އާއި ހައްތަހާ ދުރުކުރުން ކަމަށާއި މިއީ އަތޮޅު ތެރެއަށް ދެވޭ ދެރަ އެއް ކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ހުސެއިން ޒިޔާދު ވިދާޅުވެއްޖެ އެވެ.

ޒިޔާދު އެފަދައިން ވިދާޅުވީ އެމްޑީޕީ ޕީޖީ އިން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުންނެވެ. ޒިޔާދު ވަނީ މިހާރު ޤާނޫނުއަސާސީ އަށް އިސްލާހު ގެނެސް ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއްކޮށްލުމަކީ އެއީ ރައްޔިތުންނަށް ހެޔޮ އެދިގެން ކުރާ ކަމެއް ނޫން ކަަމަށް ވިދާޅުވެފަ އެވެ.

މީގެ ކުރިން ވެސް ވެރިކަން ކުރާ ޕީއެންސީގެ މެޖޯރިޓީ ބޭނުންކޮށްގެން ޤާނޫނުއަސާސީ އަށް ކުއްލިއަކަށް ބަދަލުގެނައި ކަމަށާއި މި ފަހަރު ވެސް މަޖިލިސް ރިސެސް އަށް ދިއުމުގެ އެއް ދުވަސް ކުރިން ޤާނޫނުއަސާސީ އަށް އިސްލާހު ހުށަހެޅީ ހަމަ އެ މޭރުމުން ކަމަށް ޒިޔާދު ވިދާޅުވި އެވެ.

މީގެ އިތުރުން،  ކޮންމެ އިންތިޚާބަކާއި ދިމާކޮށް ހުއްޓިފައި ހުންނަ މަޝްރޫޢުތައް ވެސް ކުރިއަށް ގެންދާ ކަމަށާއި އެއީ ރައްޔިތުން ވިސްނާލަން ޖެހޭ ކަމެއް ކަމަށް އޭނާ ވިދާޅުވި އެވެ. ރައްޔިތުންގެ ކައިރި އަށް ވެރިކަމުގައި ތިބޭ މީހުން ދާން ޖެހޭ މިންވަރު މަދުވާ މިންވަރަކަށް ރައްޔިތުންނާއި ތަރައްޤީ އާއި ދުރުވާނެ ކަމަށް އޭނާ ވިދާޅުވި އެވެ. 

އިންތިޚާބުތައް އެއްކޮށްފި ނަމަ ރައްޔިތު މީހާ ކައިރިއަށް ސަރުކާރުން ދާން ޖެހޭނީ ކޮންމެ 5 އަހަރަކުން އެއް ފަހަރު ކަަމަށާއި އެކަމުގެ ސަބަބުން ރައްޔިތުންނަށް ވާނީ ގެއްލުން ކަމަށް ވެސް ޒިޔާދު ވިދާޅުވި އެވެ.

"ރިޔާސީ އިންތިޚާބުގައި ވައުދުވެފަ، މަޖިލިސް އިންތިޚާބުގައި ފެށިފައި، ކައުންސިލް އިންތިޚާބަށް ކިރިޔާ މި ހިނގައިގަންނަނީ. މިއީ ކަންކަން ހިނގާ އުސޫލަކީ." ޒިޔާދު ވިދާޅުވި އެވެ.

ޒިޔާދު އިތުރަށް ވިދާޅުވީ ރައްޔިތުންގެ މަޖިލީސް އިންތިޚާބު ކުރުމުގެ މައިގަނޑު ބޭނުމަކީ ރައީސުލްޖުމްހޫރިއްޔާ އަށް ފާރަވެރިވުން ކަމަށެވެ. ފާރަވެރިވާ މީހުންނާއި ވެރިކަން ކުރާ މީހާ އާއި އެކައްޗަކަށް ވުމުން ވާނެ ގޮތް މިއަދު މަޖިލީހުން ފެންނަމުންދާ ކަމަށް ޒިޔާދު ވިދާޅުވި އެވެ. އަދި ރައްޔިތުންގެ މަޖިލީހުގެ ދައުރު ކުރާ ނަމަ އެކަން ކުރަން ވާނީ ރައްޔިތުންގެ ވޯޓަކުން ކަމަށް ވެސް އޭނާ ވިދާޅުވި އެވެ.

ޤާނޫނުއަސަސީ އަށް ބަދަލު ގެންނަ ނަމަ ރިފަރަންޑަމް އަކަށް ދިއުމުގެ ކުރިން އާއްމުން ވަރަށް ބޮޑަށް ހޭލުންތެރިކުރަން ޖެހޭ ކަމަށް އޭނާ ވިދާޅުވި އެވެ. މިއަދާއި ހަމައަށް އައި އިރު ފެންނަނީ ވަރަށް ސިއްރުން އެ މަސައްކަތް ކުރަން އުޅޭތަން ކަމަށާއި އެއީ ކަންބޮޑުވާ ކަމެއް ކަމަށް ޒިޔާދު ވިދާޅުވި އެވެ.