ގައުމު މިދަނީ ފާލުން ނެއްޓެން: ޝެއިޚް ޒައިދު
ތަކެތީގެ އަގު ބޮޑުވެ ގިނަ ބަޔަކު އަންނަނީ ކަންބޮޑުވުން ފާޅު ކުރަމުން
ޝެއިޚް އަލީ ޒައިދު
ތަކެތީގެ އަގު ބޮޑުވެ ގައުމު މިދަނީ ފާލުން ނެއްޓެން ކަމުގައި ޝެއިޚް އަލީ ޒައިދު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ޝެއިޚް ޒައިދު ވިދާޅުވީ، "ހުރިހާ ތަކެއްޗެއްގެ އަގުވެސް ހުރީ އަތް ނުފޯރާ ހިސާބުގައި،" ކަމަށެވެ.
އޭނާ ވަނީ އިގްތިސާދީ މި ދަތިކަމުން އަރައިގަންނަން ކުރެވިދާނެ ކަމަކީ ކޮބާތޯ ސުވާލު ކުރައްވާފައެވެ.
އަސާސީ ކާބޯތަކެއްޗާއި މޭވާ ފަދަ ތަކެތީގެ އަގު އަތް ނުފޯރާ ފަށަށް އުފުލިފައިވާ ކަމަށް ބުނެ ގިނަ ބަޔަކު އަންނަނީ ސޯޝަލް މީޑިއާ ގައި ކަންބޮޑުވުން ފާޅު ކުރަމުންނެވެ.
އެންމެ ފަހުން މޯލްޑިވްސް މަނިޓަރީ އޮތޯރިޓީ އިން ނެރުނު އިކޮނިމިކް އަޕްޑޭޓް ގައި ބުނެފައިވަނީ ރާއްޖޭގެ އިންފްލޭޝަން ހުރީ 4% ގައި ކަމަށެވެ.
ސެޕްޓެމްބަރު 2 ވަަނަ ދުވަހު ރާއްޖޭގެ ތަފާސް ހިސާބާ ބެހޭ ގައުމީ އިދާރާ - މޯލްޑިވްސް ބިއުރޯ އޮފް ސްޓެޓިސްޓިކްސް އިން ހާމަ ކޮށްފައިވާ ގޮތުގައި، މަހުން މަހަށް ތަކެތީގެ އަގަށް އަންނަ ބަދަލަށް ބަލާއިރު، ކާބޯތަކެތީގެ އަގުތައް ވަނީ ފާހަގަ ކުރެވޭ މިންވަރަކަށް އުފުލިފައެވެ. ޖުލައި މަހާއި އަޅާ ބަލާއިރު ހުސްވި އޮގަސްޓް މަހު އެންމެ ބޮޑަށް އަގުތައް މައްޗަށް ގޮސްފައިވަނީ މޭވާގެ ބާވަތްތަކުން ކަމަށް ވެސް ބުނެފައިވެއެވެ.
ތަކެތީގެ އަގުތައް ނުހިފެހެއްޓި މައްޗަށް ދާއިރު ސަރުކާރުން ބުނެފައިވާ ގޮތައް ޑޮލަރުގެ އަގުވެސް ހިފެހެއްޓިފައެއް ނުވެއެވެ. އޭގެ ބަދަލުގައި ކަޅު ބާޒާރުގައި ޑޮލަރުގެ އަގުތައް ވެސް ދަނީ ދުވަހެއް ދުވަހަކަށް މައްޗަށެވެ.
ޝެއިޚް ޒައިދު ވަނީ ތަކެތީގެ އަގުތައް، ޚާއްސަ ކޮށް މޭވާގެ ބާވަތްތަކުގެ އަގު މައްޗަށް ދާތީ ދޭތެރެ ދޭތެރެއިން ސޯޝަލް މީޑިއާގައި އެކަން ފާހަގަ ކުރައްވާފައެވެ.
