ދެ ވަނަ ހާފުގައި ޖެހި ލަނޑު ތަކުން މޮޅުވެ، ބާސެލޯނާ އަލުން އެއް ވަނަ އަށް

ސްޕެނިޝް ލީގުގައި ރެއާލް އޮވިއޭޑޯއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބާސެލޯނާ އިން އަނެއްކާ ވެސް ލީގު ތާވަލްގެ އެއް ވަނަ މަގާމަށް ޖެހިލައިފި އެވެ. 

ބާސެލޯނާގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 3-0 އިންނެވެ. މެޗުގައި ބާސެލޯނާ އިން އެ ޓީމުގެ ތިން ލަނޑު ވެސް ޖެހީ މެޗުގެ ދެ ވަނަ ހާާފުގަ އެވެ.

މެޗުގެ ފުރަތަމަ ހާފުގައި ވެސް ބާސެލޯނާ އިން ވަނީ ރަނގަޅަށް ކުޅެ ލަނޑު ޖަހަން މަސައްކަތް ކޮށްފަ އެވެ. އެގޮތުން ބާސެލޯނާ އަށް ލީޑު ނަގައިދޭން ރޮބާޓް ލެވަންޑޯސްކީ އަށް ދެ ފުރުސަތެއް ލިބުނު ނަމަވެސް، ބޭނުން ކުރެވޭ ގޮތެއް ނުވި އެވެ.

މެޗުގެ ދެ ވަނަ ހާާފު ފަށައިގެން ހަތް ވަނަ މިނެޓުގައި ބާސެލޯނާ އަށް ލީޑު ނަގައިދިނީ ޑެނީ އޮލްމޯ އެވެ. އެއީ އޮވިއޭޑޯގެ އޭރިޔާ ތެރެއިން ލިބުނު ބޯޅަ ތިރި ތިރިން ގޯލިގެ ކަނަށް އަމާޒު ކޮށްލައިގެންނެވެ. އޭގެ ފަސް މިނެޓު ފަހުން ބާސެލޯނާގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ރަފީނިއާ އެވެ. މެޗުގައި ބާސެލޯނާގެ ތިން ވަނަ ލަނޑު 73 ވަނަ މިނެޓުގައި ޖެހީ ސްޕެއިންގެ ޒުވާން ކުޅުންތެރިޔާ ލަމީން ޔަމާލް އެވެ. 

މޮޅާ އެކު ބާސެލޯނާ އިން އެއް ވަނައިގައި އޮތީ މިހާތަނަށް ކުޅެފައިވާ 21 މެޗުން 52 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން، ދެ ވަނައިގައި އޮތް ވާދަވެރި ރެއާލް މެޑްރިޑަށް ލިބެނީ 51 ޕޮއިންޓެވެ. ދެ ޓީމުގެ ދެ މެދުގައި ޕޮއިންޓެއްގެ ފަރަގު އޮތްއިރު، ލީގުގެ ވާދަވެރިކަން މި ވަނީ ބޮޑުވެފަ އެވެ.