ބާސެލޯނާ އިން ފާމިން ލޮޕޭޒްގެ އެއްބަސްވުން އައު ކުރަނީ

ބާސެލޯނާ އަށް ކުޅެމުން އަންނަ ސްޕެއިންގެ ފާމިން ލޮޕޭޒްގެ އެއްބަސްވުން އައު ކުރަން އެ ކުލަބުން ނިންމައިފި އެވެ.

އުމުރުން 22 އަހަރުގެ ކުޅުންތެރިޔާ ބާސެލޯނާގެ ސީނިއާ ޓީމަށް ކުޅެން ފެށީ 2023 ވަނަ އަހަރު އެވެ. ބާސެލޯނާއާ އެކު މިހާރު އޭނާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2027 ވަނަ އަހަރު އެވެ. ނަމަވެސް، ބާސެލޯނާ އިން ފުރަތަމަ މަސައްކަތް ކުރީ އޭނާ ދޫކޮށްލަން ކަމަށާއި، އޭގެ ފަހުން ކުރި މަޝްވަރާ ތަކަށް ފަހު އެއްބަސްވުން އައު ކުރަން ނިންމާފައިވާ ކަމަށް ރިޕޯޓުތައް ބުނެ އެވެ.

ރިޕޯޓުތައް ބުނާ ގޮތުގައި މަޝްވަރާ ތަކަށް ފަހު، ބާސެލޯނާ އިން ވަނީ ލޮޕޭޒްގެ އެއްބަސްވުން އައު ކުރަން ނިންމައިފަ އެވެ. އެގޮތުން އެ ކުލަބުގެ އެއްބަސްވުން ލޮޕޭޒް އައު ކުރަނީ 2031 ވަނަ އަހަރުގެ ޖޫން މަހުގެ ނިޔަލަށް ކަމަށް ވެސް ރިޕޯޓުތައް ބުނެ އެވެ. އައު އެއްބަސްވުމުގެ ދަށުން، ލޮޕޭޒްގެ މުސާރަ އަށް ވެސް ބަދަލު އަންނާނެ ކަމަށް ރިޕޯޓުތައް ބުނެ އެވެ. 

ބާސެލޯނާގެ ސީނިއާ ޓީމުގައި ލޮޕޭޒް މިހާރު ހޭދަ ކުރަމުން ދަނީ އޭނާގެ ތިން ވަނަ ސީޒަނެވެ. އޭނާ ވަނީ މިހާތަނަށް ބާސެލޯނާ އަށް ކުޅެދިން 113 މެޗުގައި 29 ލަނޑު ޖަހައިފަ އެވެ. މިހާރު ކުރިއަށްދާ ސީޒަންގައި ވެސް އޭނާ ރަނގަޅު ކުޅުމެއް ދައްކަމުން އަންނައިރު، މި ސީޒަންގެ 25 މެޗުގައި ކުޅެ، އޭނާ ވަނީ 10 ލަނޑު ޖަހައިފަ އެވެ. 

ބާސެލޯނާ އާއެކު ލޮޕޭޒް ވަނީ ތިން ތައްޓެއް ވެސް ކާމިޔާބު ކޮށްފަ އެވެ. އެއީ ސްޕެނިޝް ލީގުގެ އިތުރުން، ކޮޕަ ޑެލް ރޭ އާއި ސްޕެނިޝް ސުޕަ ކަޕް އެވެ. މީގެ ތެރެއިން ސުޕަ ކަޕް ވަނީ ދެ ފަހަރު ކާމިޔާބު ކޮށްފަ އެވެ.