އެޕްސްޓީން މައްސަލައިގެ ތުހުމަތު އަމާޒުވުމުން މެންޑެލްސަން، ބޮޑު ވަޒީރު ސްޓާމާގެ ލޭބާ ޕާޓީ އިން އިސްތިއުފާ ދީފި

އިނގިރޭސި ސަރުކާރުގެ ކުރީގެ މިނިސްޓަރު ޕީޓާ މެންޑެލްސަން، ބޮޑު ވަޒީރު ކިއާ ސްޓާމާ ލީޑަރުކަން ކުރައްވާ ލޭބާ ޕާޓީގެ މެމްބަރުން ކަމުން އިސްތިއުފާ ދެއްވައިފި އެވެ.

އާދީއްތަ ދުވަހުގެ ވަގުތެއްގައި މެންޑެލްސަން ލޭބާ ޕާޓީ އިން އިސްތިއުފާ ދެއްވާފައި ވަނީ، އެމެރިކާގެ ޖިންސީ ކުށްވެރިޔާ ޖެފްރީ އެޕްސްޓީން އާއި އޭނާއާ ދެމެދު ގުޅުމެއް އޮތް ކަމަށް ތުހުމަތު ކުރެވުމާ އެކު އެވެ. 

މީޑިއާ ތަކުގައި ބުނެފައިވާ ގޮތުން، ލޭބާ ޕާޓީ އިން މެންޑެލްސަން އިސްތިއުފާ ދެއްވާފައި ވަނީ އެ ޕާޓީ އަށް އިތުރު ދެރައެއް، ނުވަތަ ބަދުނާމެއް ލިބެން ބޭނުން ނުވާތީ އެވެ. މީގެ ކުރިން ވެސް އެޕްސްޓީން އާއި މެންޑެލްސަންއާ ދެމެދު ގުޅުމެއް އޮތް ކަމަށް ހާމަވުމާ އެކު، އެމެރިކާގައި ހުންނަވާ އިނގިރޭސިވިލާތުގެ ސަފީރުކަމުން އޭނާ ވަކި ކުރެއްވީ ބޮޑު ވަޒީރު ސްޓާމާ އެވެ.

ލޭބާ ޕާޓީ އަށް މެންޑެލްސަން ފޮނުވި ސިޓީގައި ވިދާޅުވެފައި ވަނީ، އެޕްސްޓީންގެ މައްސަލައިގައި އޭނާގެ ނަން ހިމެނިފައިވާ ކަމަށް މި ހަފުތާގެ ތެރޭގައި އިތުރަށް ހާމަވެފައިވާތީ އެކަމާ ހިތާމަ ކުރައްވާ ކަމަށެވެ. އެމެރިކާގެ ޖަސްޓިސް ޑިޕާޓްމަންޓް އިން އެޕްސްޓީންގެ ފައިލް ތަކެއް އާންމު ކޮށްފައިވާއިރު، އެޕްސްޓީން ވަނީ މެންޑެލްސަން އަށް ފައިސާގެ އެހީތެރިކަން ދީފައި ކަމަަށް އިނގިރޭސި މީޑިއާ ތަކުގައި ވަނީ ބުނެފަ އެވެ. 

ނަމަވެސް މެންޑެލްސަން ވިދާޅުވެފައި ވަނީ އެޕްސްޓީންގެ ފަރާތުން އޭނާ އަށް ފައިސާ އާއި މާލީ މަންފާ ލިބިފައިވާ ކަމަށް އިނގިރޭސި މީޑިއާ ތަކުގައި ބުނެފައިވާ ވާހަކަ އަކީ ދޮގެއް ކަމަަށެވެ. އަދި އެ ތުހުމަތުތައް އިތުރަށް ބައްލަވާނެ ކަމަށް ވެސް މެންޑެލްސަން ވަނީ ވިދާޅުވެފަ އެވެ. އެއާ އެކު، އޭނާ ނިސްބަތްވާ، އަދި އިނގިރޭސިވިލާތުގައި ވެރިކަން ކުރަމުން އަންނަ ލޭބާ ޕާޓީ އަށް އިތުރު ދެރައެއް ލިބެން ބޭނުން ނުވާތީ، މެންޑެލްސަން ވަނީ އެ ޕާޓީ އިން އިސްތިއުފާ ދެއްވައިފަ އެވެ. 

މެންޑެލްސަން އަކީ އިނގިރޭސިވިލާތުގެ ސިޔާސީ މަސްރަހުގައި ނުފޫޒު ގަދަ ބޭފުޅެކެވެ. އެގޮތުން އިނގިރޭސިވިލާތުގެ ކުރީގެ ބޮޑު ވަޒީރު ޓޯނީ ބްލެއާ ވެެރިކަން ކުރެއްވި ދުވަސްވަރު، ލޭބާ ޕާޓީ އަށް އިންތިޚާބުތައް ކާމިޔާބު ކުރުމުގައި އޭނާ ވަނީ މުހިންމު ދައުރެއް އަދާ ކުރައްވައިފަ އެވެ. 

މިދިޔަ އަހަރުގެ ތެރޭގައި އެެމެރިކާާގެ ޤާނޫނު ހަދާ މަޖިލީހުގެ ނެރުނު ލިޔުން ތަކުގައި، އެޕްސްޓީން ވަނީ މެންޑެލްސަން އަކީ އޭނާގެ އެންމެ ގާތް އެކުވެރިޔާ ކަމަށް ބުނެފަ އެވެ. އެއާ އެކު، އެމެރިކާގައި ހުންނަވާ އިނގިރޭސިވިލާތުގެ ސަފީރުގެ މަގާމުން މެންޑެލްސަން ވަކި ކުރެއްވި އެވެ. 

މެންޑެލްސަންގެ ސިޔާސީ ޙަޔާތުގައި މީގެ ކުރިން ބައެއް އެހެން މައްސަލަތަކާ ވެސް ކުރިމަތިލާން ޖެހިފައިވެ އެވެ. އެގޮތުން 1998 ވަނަ އަހަރު ގެއެއް ގަތުމަށް އެހެން މިނިސްޓަރެއްގެ އަތުން ދަރަންޏަށް ފައިސާ ހޯއްދެއްވުމާ ގުޅިގެން ޖެހުނު މައްސަލައިގައި، އޭނާ ވަނީ ސެކްރެޓަރީ އޮފް ސްޓޭޓް ފޯ ޓްރޭޑް އެންޑް އިންޑަސްޓްރީގެ މަގާމުން އިސްތިއުފާ ދެއްވައިފަ އެވެ.